نورستانده مخابرات معمالری؛ اهالی علاقه اوزیلیشی و انترنت یۉقلیگیدن شکایت قیلماقده
آدرینا بهزاد
نورستان ولایتی‌نینگ بیر قطار اهالیسی بو ولایتده مخابرات ترماقلری و انترنت خدمتلری‌نینگ ضعیفلیگی همده یۉقلیگیدن شکایت قیلماقده. اولر اَیتیشیچه، کۉپلب حدودلرده مخابرات ترماقلری عموماً ایشله‌مه‌یدی یاکه جوده قویی صفتده موجود. اولر‌نینگ اَیتیشیچه، فوق العاده حالتلرده، جمله‌دن، بېمارلرنی شفاخانه‌گه آلیب باریشده علاقه یۉقلیگی کۉپلب معمالرنی کېلتیریب چیقرماقده. شونینگدېک، عایله‌لر بیلن علاقه اوزیلیب قالیشی اولر‌نینگ اۉزارا خواطرلنیشیگه سبب بۉلماقده. بو اهالی سۉنگگی سوو تاشقینلری اولر‌نینگ معمالرینی ینه‌ده کۉپه‌یتیرگنینی تأکیدله‌ماقده. عینی پیتده، بیر قطار سیاحلر هم نورستانده انترنت خدمتلری‌نینگ یۉقلیگی اولر‌نینگ عایله‌لری بیلن علاقه‌سینی ایزدن چیقرگنی و سفر دوامیده خواطرلرینی آشیره‌یاتگنینی اَیتماقده.
نورستان ولایتی‌نینگ اهالیسیدن بیری نوراحمد (مستعار)، اولر یشه‌یدیگن حدودده مخابرات ترماقلری و انترنت موجود اېمسلیگینی، بو حالت آدملر‌نینگ کونده‌لیک معمالرینی بیر نېچه برابر آشیرگنینی اَیته‌دی.
بو نورستانلیک اهالی شونده‌ی دېیدی: «بیز‌نینگ حدودیمیزده سیم‌کارت و انترنت ایشله‌مه‌یدی. بېماریمیز بۉلسه، مو‌تر تاپیش و بېمارنی شفاخانه‌گه آلیب باریش اوچون اوزاق مصافه‌نی باسیب اۉتیشگه مجبورمیز. یاکه کیم دیر وفات اېتسه یاکه خورسندچیلیک مراسمی بۉلسه، قرینداشلریمیزنی خبردار قیلیش اوچون اویمه-اوی یوریب، اوزاق یۉللرنی باسیب اۉتیشیمیز کېره‌ک.»
نوراحمد‌نینگ اَیتیشیچه، مخابرات ترماقلری‌نینگ یۉقلیگی سببلی عایله اعضالری اویدن چیقیب کېتگنیده هم عایله‌لر دایما خواطرده بۉلیشه‌دی؛ چونکه بیرار واقعه صادر بۉلسه، علاقه اۉرنه‌تیش‌نینگ امکانی یۉق.
او قۉشیمچه قیله‌دی: «اویدن چیققنیمیزده، اویده بیرار نرسه بۉلیب قالمسمی‌اېکن، دېب خواطرده بۉله‌میز، عایله اعضالریمیز هم بیز اوچون خواطرلنیشه‌دی، چونکه مخابرات ترماغی ایشله‌مه‌یدی و اوی بیلن علاقه‌میز اوزیله‌دی. انترنت‌نینگ ایشلشی اېسه عموماً گپ هم اېمس. قیسقه‌سی، معمالریمیز کۉپ. دولت خدمتلری اوزاق مصافه‌لرده جایلشگن، یۉللر و یۉلکلر یامان، سۉنگگی سوو تاشقینلری اېسه اولرنی ینه‌ده بوزیب یوباردی. مخابرات ترماقلری‌نینگ ایشله‌مسلیگی هم آدملر‌نینگ معمالرینی بیر نېچه برابر آشیردی.»
نورستان ولایتی‌نینگ ینه بیر اهالیسی سحر (مستعار)، بو ولایت‌نینگ تورلی حدودلریده مخابرات و انترنت خدمتلری‌نینگ ضعیفلیگیدن شکایت قیله‌دی. اونینگ اَیتیشیچه، کُلم قیشلاغیده انترنت فقط تونگی ساعت ۱۲ دن اېرته‌لبکی ساعت ۶ گچه ۲جی ترماغی آرقه‌لی ایشله‌یدی و حتا شو ساعتلرده هم اونینگ تېزلیگی شو قدَر پست که بیرته خبرنی یوباریش هم قیینچیلیک بیلن عملگه آشیریله‌دی.
او شونده‌ی دېیدی: «کُلم قیشلاغیده شورودمی قیشلاغی‌نینگ آنتنی آرقه‌لی مخابرات خدمتلرینی تقدیم اېته‌دیگن ترماق هم جوده ضعیف.» سحر‌نینگ اَیتیشیچه، غربی نورستانده او یشه‌یدیگن حدودده فقط افغان بیسیم ترماغی فعال؛ اما اونینگ اَیتیشیچه، کۉپلب قیشلاقلرده علاقه حالتی همان قانیقرسیز.
سحر قۉشیمچه قیله‌دی: «اۉز قیشلاغیمیزده سۉنگگی ییللرده مخابرات پایه‌سیگه اېگه بۉلدیک؛ اوندن آلدین هېچ قنده‌ی پایه یۉق اېدی و مخابرات علاقه‌لری هم بوتونله‌ی اوزیلگن اېدی.» او، شونینگدېک، غربی نورستان اهالیسی‌نینگ اکثریتی قۉنغیراق پاکتلری ارزانراق بۉلگنی سببلی افغان بیسیم سیم‌کارت‌لریدن فایده‌لنیشینی اَیته‌دی؛ بیراق مخابرات خدمتلری‌نینگ قمراوی و صفتی پستلیگی همان بو حدودلر اهالیسی‌نینگ جدّی معمالریدن بیری بۉلیب قالماقده.
سیاحلردن بیری احمد (مستعار)، نورستانده انترنت خدمتلری‌نینگ یۉقلیگی سیاحلرنی هم کۉپلب معمالرگه دچار قیلگنینی اَیته‌دی. او شونده‌ی دېیدی: «انترنت ایشله‌مه‌یدی و بیز عایله‌لریمیز اوچون دایما خواطرده‌میز. برچه اۉی-خَیالیمیز عایله‌میز بیلن؛ چونکه اولر بیلن باغلنه آلمه‌یمیز و علاقه اۉرنه‌ته آلمه‌یمیز.»
بو حالت شونده‌ی بیر پیتگه تۉغری کېلماقده که بیر نېچه کون آلدین نورستان‌نینگ بیر قطار سیاحلری طالبان اوشبو ولایتگه کیریش دروازه‌لریده اولردن پول آله‌یاتگنینی، بیراق بو درآمد آست-قورمه و سیاحلیک خدمتلرینی یخشیلشگه صرفلنمه‌یاتگنینی اَیتگن اېدی.
اولر ۸صبح گزېته‌سیگه بېرگن صحبتیده، اگر تشریف بویورووچیلردن حق آلینه‌یاتگن بۉلسه، بو‌نینگ عوضیگه دَم آلیش جایلری، طبی خدمتلر، تازه‌لیکنی سقلش و ترانسپورت یۉللرینی یخشیلش کبی دستلبکی امکانیتلر و خدمتلر هم تقدیم اېتیلیشی کېره‌کلیگینی اَیتگن اېدی.
