یونیسف پروان‌ده سوو و ساغلیق خدمتلر ساحه‌سیگه کیریتیلگن سرمایه‌لر‌نینگ ایجابی تأثیری حقیده معلوم قیلدی
۸صبح، کابل: بیرلشگن ملتلر تشکیلاتی‌نینگ باله‌لرنی قۉللب-قۉتلش جمغرمه‌سی (یونیسف)نینگ افغانستانده‌گی وکیلی تاج‌الدین اویوالی، پروان ولایتیده سوو و ساغلیق خدمتلر ساحه‌سیگه کیریتیلگن سرمایه‌لر ایجابی تأثیر کۉرسه‌تگنینی اَیتدی.
اویوالی پنج‌شنبه کونی، ۱۶ میزان، ترقه‌تگن حساباتیده یونیسف پروان‌نینگ تورلی حدودلریده قویاش انرژیسیده ایشله‌یدیگن سوو تأمیناتی تیزیملری همده سوو، تازه‌لیک و ساغلیق خدمتلرینی کېنگه‌یتیرگنینی معلوم قیلگن.
اونینگ اَیتیشیچه، اوشبو خدمتلر مکتبلر، ساغلیقنی سقلش مرکزلری و محلی حدودلرده یۉلگه قۉییلگن همده اهالی‌نینگ تازه سوودن فایده‌لنیش امکانیتینی یخشیلشگه یاردم بېرگن.
او جاری ییلده مذکور دستورلر قمره‌ب آلگن حدودلرده سوو تنقیصلیگی بیلن باغلیق کسللیکلر‌نینگ بیرارته حالتی هم قید اېتیلمه‌گنینی قۉشیمچه قیلگن.
یونیسف بوندن اوّل هم تازه سوو و مناسب ساغلیق خدمتلریدن فایده‌لنیش باله‌لر سلامتلیگینی سقلش و کسللیکلر‌نینگ آلدینی آلیش اوچون مهم اېکنینی تأکیدله‌گن.
