یوناما: طالبان اوچ آیده ۵۲ نفر عیال و بیر قیزنی حبسگه آلدی
۸صبح، کابل: بیرلشگن ملتلر تشکیلاتی‌نینگ افغانستانگه یاردم کۉرسه‌تیش هیاتی (یوناما) ۲۰۲۶-ییل جولاییدن سپتمبریگچه کابل و هراتده کمیده ۵۲ نفر عیال و بیر قیز حبسگه آلینگنی یاکه وقتینچه اوشلب توریلگنینی معلوم قیلدی.
یوناما پنج‌شنبه کونی، ۱۶ میزان، ترقه‌تگن بیاناتیده ینه بیر قطار عیاللر حکمران حاکمیت تامانیدن حبسگه آلینیشی بیلن تهدید قیلینگنینی اَیتدی.
بیاناتگه کۉره، بو عیاللر حکمران حاکمیت تامانیدن کیینیش طلبلرینی بوزیش دېب بهالنگن حالتلر سببلی حبسگه آلینگن یاکه اوشلب توریلگن.
رۉمال اۉره‌مه‌سلیک، ساچ‌نینگ بیر قِسمی کۉرینیب توریشی، رنگ-برنگ رۉماللردن فایده‌لنیش، پرداز قیلیش و محرمسیز جماعت جایلریده بۉلیش عیاللر‌نینگ حبسگه آلینیشیگه سبب بۉلگن حالتلر قطاریگه کیره‌دی.
یوناما حبسگه آلینگن عیاللر بیر نېچه ساعت اوشلب توریلگچ، آزاد قیلینگنینی معلوم قیلدی.
شو بیلن بیرگه، مذکور تشکیلات اَیریم حالتلر حمایه بیلن باغلیق خواطرلر و اجتماعی ننگ سببلی خبر قیلینمه‌گنی اوچون حقیقی حالتلر سانی بوندن کۉپراق بۉلیشی ممکنلیگینی اَیتدی.
تشکیلات، شونینگدېک، عیاللر، جمله‌دن، دوکاندار عیاللرگه نسبتاً آغزه‌کی حقارت، کلتکلش و تهدیدلر حقیده‌گی خبرلردن خواطر بیلدیردی.
یوناما بو چاره‌لر عیاللر و قیزلر‌نینگ حقوقلرینی، جمله‌دن، حرکتلنیش اېرکینلیگی، سۉز اېرکینلیگی و شخصی مستقللیگینی بوزیشینی همده اولرنی اجتماعی آبروسی و ینه‌ده کۉپراق چېتلشتیریلیش خوفی آستیده قالدیریشینی تأکیدله‌دی.
یوناما طالباننی عیاللر و قیزلرگه نسبتاً قاعده‌لرنی کمسیتووچی طرزده قۉللشنی تۉخته‌تیشگه، برچه افغانلر‌نینگ انسان حقوقلری و قدر-قیمتینی حرمت قیلیشگه همده افغانستان‌نینگ خلق‌ارا انسان حقوقلری قانونلری دایره‌سیده‌گی مجبوریتلریگه رعایه قیلیشگه چقیردی.
