مخابرات خدمتلریده‌گی معمالر؛ اهالی الکترونیکی تۉلاولر‌نینگ قَیته یۉلگه قۉییلیشینی طلب قیلماقده
ایلیا
کابل اهالیسیدن بیر گروهی کریدیت قۉشیش‌نینگ الکترونیکی تیزیمی یاکه «اکسپریس‌پی»نی قَیته ایشگه توشیریشنی طلب قیلماقده. اولر‌نینگ اَیتیشیچه، بیر نېچه ییل آلدین مخابرات خدمتلرینی آسانلشتیریش مقصدیده یره‌تیلگن اوشبو تیزیم حاضر ایشله‌مه‌یپتی. اونینگ اَیریم اسکونه‌لری هم سابق جایلریدن یۉقالگن یاکه باشقه مقصدلرده فایده‌لنیلماقده. بو اهالی وکیللری‌نینگ قۉشیمچه قیلیشیچه، بونده‌ی تیزیملر‌نینگ دایمی ایشلشی آدملرنی الکترونیکی اصوللردن فایده‌لنیشگه عادتلنتیریشی و عنعنوی تۉلاو اصوللریگه بۉلگن احتیاجنی کمه‌یتیریشی ممکن.
«اکسپریس‌پی» تیزیمی ۱۳۹۱-ییلده کابل، مزارشریف و جلال‌آباد‌نینگ اَیریم حدودلریگه اۉرنه‌تیلگن بۉلیب، اونینگ مقصدی مخابرات ترماقلری فایده‌لنووچیلری اوچون کریدیت قۉشیش خدمتلرینی تقدیم اېتیش اېدی. فایده‌لنووچیلر مخابرات ترماغینی تنلب، کریدیت مقدارینی بېلگیلش و نقد پولنی کیریتیش آرقه‌لی کېره‌کلی کریدیتنی اۉشه زهاتی سیم-کارت‌گه اۉتکزیشلری ممکن اېدی. اوشبو تیزیمنی مملکت‌نینگ ینه بیر قطار ولایتلریده هم ایشگه توشیریش رېجه‌لشتیریلگن اېدی.
بو اهالی وکیللری ۸صبح گزېته‌سیگه بېرگن صحبتلریده «اکسپریس‌پی» تیزیمی تۉلیق و زمانوی شکلده ایشگه توشیریلسه، کونده‌لیک خریدلر، برق انرژیسی تۉلاولری و باشقه کیچیک تۉلاولرنی عملگه آشیریش امکانیتی هم یره‌تیلیشی کېره‌کلیگینی اَیتماقده. اولر‌نینگ فکریچه، تیزیم‌نینگ ینه ایشدن چیقیشی‌نینگ آلدینی آلیش اوچون «اکسپریس‌پی» اسکونه‌لری منتظم روشده نظارت قیلینیشی و بوزیلگن تقدیرده ترمیملنیشی کېره‌ک. شونینگدېک، اولر فقرالر‌نینگ الکترونیکی تۉلاو خدمتلریدن فایده‌لنیشی آسانراق بۉله‌دیگن جایلرگه اوشبو اسکونه‌لرنی اۉرنه‌تیشنی طلب قیلماقده.
کابل اهالیسیدن بیری علی سینا «اکسپریس‌پی» تیزیمی فعالیت یوریتگن ییللرده وطنداشلرگه کتّه قوله‌یلیکلر یره‌تگنینی، بیراق اعتبارسیزلیک سبب یۉق بۉلیب کېتگنینی اَیته‌دی. اونینگ سۉزلریگه کۉره، اوشبو تیزیم تۉخته‌تیلگچ، آدملر هم استه-سېکین اوندن فایده‌لنیشنی اونوتگن. او اوشبو خدمتلر نیمه سببدن تۉخته‌تیلگنیدن بېخبر اېکنینی، بیراق وطنداشلرگه قوله‌یلیک یره‌ته‌دیگن تیزیملر قیسقه مدتدن سۉنگ ایشدن چیقیب قالمسلیگی کېره‌کلیگینی تأکیدله‌یدی.
اوشبو کابل اهالیسی وکیلی دېیدی: «اکسپریس‌پی اسکونه‌لری فعال بۉلگن پیتده کېچه-یو کوندوز هېچ قنده‌ی چېکلاولرسیز کریدیت کارتیگه کریدیت قۉشه آلردیک، حتا دۉستلریمیز اوچون هم شونده‌ی قیله آلردیک. بو تیزیم یخشی قوله‌یلیک اېدی، اما افسوسکی، جوده تېز یۉق بۉلیب کېتدی.»
علی سینا‌نینگ فکریچه، «اکسپریس پی» قَیته ایشگه توشیریلسه، الکترونیکی خدمتلر تورلی ساحه‌لرده کېنگه‌یتیریلیشی کېره‌ک.
کابل‌نینگ ینه بیر اهالیسی حیات‌الله هم «اکسپریس پی»نی قَیته ایشگه توشیریش طرفداری. اونینگ اَیتیشیچه، اوشبو تیزیم وطنداشلرگه کۉپراق خدمتلرنی تقدیم اېتیشی کېره‌ک. او برق انرژیسی تۉلاولرینی هم اوشبو اپاراتلر آرقه‌لی عملگه آشیریش امکانیتینی یره‌تیشنی تکلیف قیلماقده. شونده فقرالر تۉلاولری‌نینگ بیر قِسمینی «اکسپریس پی» آرقه‌لی عملگه آشیریشلری ممکن بۉله‌دی.
حیات‌الله دېیدی: «اگر تۉلاولر رقملی شکلده عملگه آشیریلسه، آدملر اوییدن یاکه بیرار اسکونه آرقه‌لی اۉز حساب-کتابلرینی تۉله‌شلری ممکن. بو هم قوله‌یلیک یره‌ته‌دی، هم بانکلرده‌گی تیربندلیکلر‌نینگ آلدینی آلیشگه یاردم بېره‌دی.»
کابل‌نینگ ینه بیر اهالیسی سلطان‌علی «اکسپریس پی»نی قَیته ایشگه توشیریش ینگی و زمانوی اسکونه‌لر اېسکی نمونه‌لر اۉرنینی اېگه‌لله‌گن تقدیرده‌‌گینه ثمره‌لی بۉلیشی ممکنلیگینی اَیته‌دی. اونینگ فکریچه، اوشبو تیزیمنی ینگیلش اوچون باشقه مملکتلرده، جمله‌دن ایرانده موجود بۉلگن اۉخشه‌ش نمونه‌لردن فایده‌لنیش ممکن.
سلطان‌علی دېیدی: «اگر بو اسکونه‌لر ینه ایشگه توشیریلسه، اونینگ ینه‌ده رواجلنگن نسخه‌سیدن فایده‌لنیش معقول؛ مثلاً، ایرانده موجود بۉلگن تیزیملر کبی، آدملر کارت و الکترونیکی اصوللر آرقه‌لی فایده‌لنیشلری ممکن. بو آرقه‌لی نقد پولدن فایده‌لنیش هم کمه‌یه‌دی.»
کابل‌نینگ ینه بیر اهالیسی شکیب «اکسپریس پی» قَیته ایشگه توشیریلسه، اونی اۉرنه‌تیش جایی و کۉرسه‌تیله‌دیگن خدمتلر توریگه هم اعتبار قره‌تیش کېره‌کلیگینی اَیته‌دی. اونینگ قۉشیمچه قیلیشیچه، اگر اوشبو اسکونه‌لر شهر‌نینگ قوله‌ی نقطه‌لریگه ینگی امکانیتلر بیلن اۉرنه‌تیلسه، اولر ترانسپورت یۉل حقینی تۉله‌ش و تکت ساتیب آلیش کبی خدمتلرنی هم تقدیم اېتیشی ممکن.
شکیب دېیدی: «بونده‌ی اسکونه‌لر‌نینگ موجودلیگی آدملر اوچون فایده‌لی بۉلیشی ممکن، اینیقسه کیمدیر انترنت‌گه کیره آلمه‌سه یاکه انترنت نرخی او اوچون قیمت بۉلسه. اگر بو تیزیم زمانوی شکلده ایشگه توشیریلسه، ترانسپورت یۉل حقینی تۉله‌ش و تکت ساتیب آلیش کبی کۉپلب خدمتلرنی هم او آرقه‌لی عملگه آشیریش ممکن.»
«اکسپریس پی» تیزیمی مخابرات ترماقلری فایده‌لنووچیلری اوچون کریدیت قۉشیش خدمتلرینی تقدیم اېتیش مقصدیده ایشگه توشیریلگن و اونینگ فعالیت دایره‌سینی مملکت‌نینگ کۉپراق حدودلریگه کېنگه‌یتیریش رېجه‌لشتیریلگن اېدی.
بیراق کېینگی ییللرده اوشبو خدمتلر کېنگ مقیاسده دوام اېتتیریلمه‌دی و «اکسرپیس پی» اپاراتلری‌نینگ اَیریملری هم اۉرنه‌تیلگن جایلریدن یۉقالیب کېتدی. حاضرده مخابرات ترماقلری فایده‌لنووچیلری کریدیت قۉشیش اوچون رقملی اصوللردن، جمله‌دن «مې اند یاو»، یعنی «میتی‌یو» و «دینگ» علاوه‌لریدن هم فایده‌لنماقده.
کابل اهالیسی «اکسپریس پی» قَیته ایشگه توشیریلسه، زمانویراق تکنالوژی‌لردن فایده‌لنیش و اونینگ خدمتلرینی برق انرژیسی تۉلاولری، کونده‌لیک خریدلر همده باشقه کیچیک تۉلاولرنی عملگه آشیریشگچه کېنگه‌یتیریش کېره‌کلیگینی اَیتماقده. شونینگدېک، اولر اوشبو اسکونه‌لرنی شهر‌نینگ قوله‌ی نقطه‌لریگه اۉرنه‌تیش و منتظم روشده تخنیکی خدمت کۉرسه‌تیشنی، بوزیلگن تقدیرده اېسه اۉز وقتیده ترمیملشنی طلب قیلماقده.
حاضرده افغانستانده بیر نېچه ته مخابرات کمپنیسی آوازلی علاقه و انترنت خدمتلرینی تقدیم اېتماقده. کریدیت قۉشیش اېسه تورلی اصوللر، جمله‌دن « Me and you یعنی میتیو و دینگ رقملی علاوه‌لری آرقه‌لی عملگه آشیریلماقده.
