غورده نوریهنینگ فاجعه‌لی اۉلدیریلیشی؛ فرزندلری کۉز اۉنگیده قییناققه سالینیب اۉلدیریلگن عیال
نیما
۸صبح گزېته‌سیگه یېتیب کېلگن تصویرلر بیر عیال‌نینگ اېری تامانیدن شفقتسیزلرچه اۉلدیریلگنینی آچیب بېرماقده. ویدیوده عیال‌نینگ جسدی تصویرلنگن و اونینگ تنه‌سیده قییناق ایزلری یقّال کۉرینه‌دی. اوشبو عیال‌نینگ اۉلدیریلیشی عکس اېتگن ویدیو شو قدَر دهشتلی و لرزه‌لی اېکن که اونی نشر اېتیش‌نینگ امکانی یۉق. منبعلر اونینگ اېری عیالنی قیزدیریلگن تېمیر تیاق بیلن قییناققه سالگنینی دعوا قیلماقده. شونینگدېک، منبعلر‌نینگ اَیتیشیچه، بو عیال فرزندلری‌نینگ کۉز اۉنگیده اېری تامانیدن قییناققه سالینگن و کلتکلش عاقبتیده آلگن آغیر جراحتلری سبب وفات اېتگن.
۸صبح گه نوریه اسملی عیال‌نینگ جسدی عکس اېتگن ویدیولر کېلیب توشگن بۉلیب، اولر دهشتلی و لرزه‌لی قاتللیکنی آچیب بېرماقده. اوشبو ویدیولرده عیال تنه‌سی‌نینگ اَیریم قِسملری قییناق و کلتکلش عاقبتیده کۉکرگنی، بوتون تنه‌سیده قییناق ایزلری بارلیگی کۉرینه‌دی. ویدیولر‌نینگ فانیده نوریهنینگ عیال قرینداشلری و یقینلری‌نینگ اونینگ وفاتی اوچون ییغلب، ناله قیله‌یاتگن آوازلری هم اېشیتیله‌دی.
بیراق منبعلر‌نینگ اَیتیشیچه، بو عیال‌نینگ اسمی نوریه بۉلگن و او تخمیناً ۱۴ کون اوّل غور ولایتی تیوره تومنی‌نینگ «تنگی سرپنک» قیشلاغیده اۉلدیریلگن. منبعلرگه کۉره، نوریه ۳۲ یاشده بۉلگن و اېری تامانیدن قتّیق قییناققه سالینیشی عاقبتیده اۉلدیریلگن.
منبعلرگه کۉره، نوریه غور ولایتی پسابند تومنی‌نینگ خواجه قیشلاغیده توغیلیب-اۉسگن. او ۱۰ ییل اوّل تورموشگه چیققن و اوندن اوچ قیز همده بیر اۉغیل قالگن. منبعلر دعواسیگه کۉره، نوریهنینگ اېری یقینده ایراندن اوییگه قَیتگن.
منبعلر بو قاتللیک نوریه و قَینانه‌سی اۉرته‌سیده‌گی آغزه‌کی جنجلدن سۉنگ صادر بۉلگنینی اَیتماقده. منبعلر دعواسیگه کۉره، نوریهنینگ اېری اونی فرزندلری‌نینگ کۉز اۉنگیده قییناققه سالگن و او بو‌نینگ عاقبتیده وفات اېتگن.
منبعلر دعواسیگه کۉره، نوریهنینگ جسدی بیر کېچه-کوندوز دوامیده فرزندلری‌نینگ کۉز اۉنگیده سقلنگن. اېرته‌سی کونی قیشلاق مسجدیده نماز اۉقیلگچ، اونینگ اېری قاتللیکنی تن آلیب، اۉزینی طالبانگه تاپشیرگن.
بو حالت غور ولایتی پسابند تومنیده بیر نېچه آی اوّل فرزانه اسملی ینه بیر عیال اېری تامانیدن قییناققه سالینیب، اېری‌نینگ اۉگه‌ی اۉغلی تامانیدن اۉلدیریلگن بیر پیتده یوز بېرماقده. اۉشه پیتده منبعلر ۸صبح گه فرزانه اېری و اېری‌نینگ عایله اعضالری تامانیدن بیر نېچه بار قییناققه سالینگنینی اَیتگن اېدی. شفاکارلر هم اۉشه وقتده اونینگ تاماغیده ارقان بیلن بۉغیلگنلیک ایزلری، حتا کوییش علامتلری بارلیگینی تصدیقله‌گن اېدی.
غورده عیاللر اۉلدیریلیشی دوام اېته‌یاتگن بیر پیتده، ۱۴۰۳-ییلده پسابند تومنی‌نینگ «دو برار شیخ‌ها» حدودیده ینه بیر عیال اېری تامانیدن اۉلدیریلگن اېدی. شونینگدېک، ۱۴۰۲-ییل‌نینگ ۳-ثورده غور ولایتی پسابند تومنی‌نینگ سنگان حدودیده بیر عیال اېری تامانیدن اۉلدیریلگن. ینه بیر حادثه‌ده غور مرکزی فیروزکوه شهری حدودیده هم بیر عیال سِرلی طرزده اۉلدیریلگن اېدی.
۱۴۰۲-ییلده غور ولایتیده‌گی طالبان جنگچیلریدن بیری یاش قیزگه زۉرلیک قیلیشگه اورینگن، بیراق قیز قرشیلیک کۉرسه‌تگنیدن سۉنگ آخر-عاقبت اونی اۉلدیرگن. غورده‌گی ایشانچلی منبعلر اۉلدیریلگن قیز‌نینگ اسمی زرمینه بۉلگنینی اَیتگن. او غور ولایتی مرکزی فیروزکوه شهری‌نینگ سد سیاه حدودیده‌گی آته‌سی‌نینگ اوییده اۉقاتر قورالدن آتیلیب اۉلدیریلگن. محلی منبعلر بیاناتیگه کۉره، جنسی تجاوز قیلیش موفقیتسیز توگه‌گچ، زرمینه‌نی اۉلدیرگن طالبان جنگچیسی‌نینگ اسمی عبدالقدوس بۉلگن.
بوندن آلدین بیرلشگن ملتلر تشکیلاتی‌نینگ انسان حقوقلری بۉییچه مخصوص معروضه‌چیسی ریچارد بنت طالبان اۉز محکمه-حقوق تیزیمیدن عیاللر و قیزلرنی باستیریش واسطه‌سی صفتیده فایده‌لنه‌یاتگنینی اَیتگن اېدی. اونینگ سۉزلریگه کۉره، طالبان اوّلگی حکومت‌نینگ محکمه تیزیمینی اۉزگرتیریب، اېرکک محکمه‌لر‌نینگ اکثریتینی و برچه عیال محکمه‌لرنی لوازمیدن چېتله‌تگن همده اولر‌نینگ اۉرنیگه گروه اعضالرینی ایشگه آلگن.
بیرلشگن ملتلر تشکیلاتی‌نینگ عیاللر بۉلیمی طالبان حکمرانلیگی‌نینگ بیر ییللیگیده اعلان قیلگن حساباتیده افغانستانده عیاللر و قیزلرگه نسبتاً زۉرآورلیک هنوز کېنگ ترقه‌لگنینی بیلدیرگن. حساباتگه کۉره، هر ۱۰ عیالدن قریب ۹ نفری حیاتی دوامیده اۉز تورموش اۉرتاغی یاکه همراهی تامانیدن زۉرآورلیک‌نینگ کمیده بیر تورینی باشدن کېچیرگن. اوشبو تشکیلات، شونینگدېک، یوناما معلوماتلریگه تیه‌نیب، ۲۰۲۱-ییل اگوستیدن ۲۰۲۲-ییل جونیگچه عیاللر و قیزلرگه نسبتاً ۸۷ دن آرتیق زۉرآورلیک حالتینی قید اېتگنینی معلوم قیلگن.
شونینگدېک، بیرلشگن ملتلر تشکیلاتی‌نینگ افغانستانده‌گی یاردم هیاتی (یوناما) سۉنگگی بېش ییل دوامیده اعلان قیلگن بیر قطار حساباتلریده عایله‌وی زۉرآورلیک عاقبتیده عیاللر اۉلدیریلگنینی قید اېتگن. اوشبو حساباتلرده عیاللر و قیزلرگه نسبتاً مجبوری نکاحلر، زۉرلش و عایله‌وی زۉرآورلیک کۉپه‌یگنی، عیاللرنی حمایه قیلووچی میکانیزملر و قانونلر‌نینگ بېکار قیلینیشی اېسه بو وضعیتنی ینه‌ده آغیرلشتیرگنی اَیتیلگن.
