بیرلشگن ملتلر تشکیلاتی: قندوزده‌گی پارتله‌مه‌گن اۉق-دارولر جدّی تهدید سالماقده
۸صبح، کندز: بیرلشگن ملتلر تشکیلاتی‌نینگ ترقیات دستوری (UNDP) قندوزده پارتلاوچی مادّه‌لرنی تازه‌لش و اهالی‌نینگ ماینلر همده پارتله‌مه‌گن اۉق-دارولر خوفی حقیده‌گی خبردارلیگینی آشیریش بۉییچه سعی-حرکتلر دوام اېته‌یاتگنینی معلوم قیلدی.
اوشبو دستور وکیلی تورهان صالح یکشنبه کونی، ۱۲-میزان، قندوزده پارتله‌مه‌گن اۉق-دارولر هنوز جدّی معما بۉلیب قاله‌یاتگنینی و اولرنی تازه‌لش اوچون کۉپراق چاره‌لر کۉریش ضرورلیگینی اَیتدی.
اونینگ قۉشیمچه قیلیشیچه، اوشبو لایحه دایره‌سیده پارتلاوچی مادّه‌لر بیلن افلاسلنگن حدودلر تازه‌لنه‌دی و اولر سبب یوزه‌گه کېله‌دیگن خوفلرنی کمه‌یتیریش اوچون اهالیگه توشونتیریش ایشلری آلیب باریله‌دی.
صالح‌نینگ اَیتیشیچه، اوشبو دستور‌نینگ مقصدی قندوزده آدملر یشه‌شی و ایشلشی اوچون خوفسیزراق محیط یره‌تیشدیر.
اوشبو دستور خلق‌ارا مهاجرت تشکیلاتی (IOM) بیرلشگن ملتلر تشکیلاتی‌نینگ قاچقینلر بۉییچه عالی کمیسارلیگی (UNHCR) و بیرلشگن ملتلر تشکیلاتی‌نینگ اهالی یشش جایلری دستوری (UN-Habitat) همکارلیگیده همده بیرلشگن ملتلر تشکیلاتی‌نینگ افغانستان اوچون مخصوص حمایه صندیغی (UN STFA) یاردمیده عملگه آشیریلماقده.
بیرلشگن ملتلر تشکیلاتی معلوماتلریگه کۉره، افغانستان دنیاده پارتله‌مه‌گن اۉق-دارولر عاقبتیده اېنگ کۉپ تلفات قید اېتیله‌دیگن مملکتلردن بیریدیر.
اوشبو تشکیلات‌نینگ اَیتیشیچه، جاری ییل باشیدن بویان افغانستان شرقیده اوروش قالدیقلری و پارتله‌مه‌گن اۉق-دارولر بیلن باغلیق ۶۴ ته حادثه قید اېتیلگن. نتیجه‌ده ۶۴ نفر تینچ اهالی جان بېریب یاکه یره‌لنگن.
