ربابه محمدی ۲۰۲۶-ییل کانادا‌نینگ ییل صنعتکاری دېب تاپیلدی
۸صبح، کابل: افغانستانلیک رسّام و تدبیرکار ربابه محمدی کاناداده «مکس گالا» تشکیلاتی تامانیدن «۲۰۲۶-ییل‌نینگ اېنگ یخشی صنعتکاری» دېب تاپیلدی.
مکس گالا تشکیلاتی تورنتو شهریده اۉنلب صنعتکارلر اشتراکیده اۉتکزیلگن مراسمده ییل صنعتکاری مکافاتینی ربابه محمدیگه تاپشیردی.
«اسمایل کانادا» تشکیلاتی هم محمدی‌نینگ اوشبو مکافاتگه سزاوار بۉلگنینی اعلان قیلیب، اونی افغانستانلیک صنعتکار و تدبیرکار، شونینگدېک، تشکیلات‌نینگ «اوپن‌شاپ» دستوری اشتراکچیسی صفتیده تنیشتیردی.
اسمایل کانادا شونده‌ی دېدی: «بیز افغانستانلیک صنعتکار و تدبیرکار ربابه‌‌نینگ اسمایل تشکیلاتی‌نینگ اوپن‌شاپ دستوریده‌گی موفقیتینی همده اونینگ استعدادی و ایجادکارلیگی مناسب اعتراف اېتیلگنینی نشانلشدن فخرلنه‌میز».
ربابه محمدی هم اعلان قیلگن خبریده اوشبو مکافاتنی قۉلگه کیریتگنیدن خورسندلیگینی بیلدیریب، شونده‌ی یازدی: «بدیعی یوتوقلریم قطاریگه ینه بیر یوتوق قۉشیلدی: کاناداده‌گی مکس گالا تشکیلاتی‌نینگ ۲۰۲۶-ییل صنعتکاری مکافاتی مېنگه نصیب اېتدی».
او انستاگرام صحیفه‌سیده اوشبو هیکلچه اونینگ اوچون شونچه‌که مکافات اېمسلیگینی، بلکه قیینچیلیکلرگه قره‌مه‌ی، آرزولریگه ایشانگن و حرکتدن تۉخته‌مه‌گن کونلرینی اېسله‌تیب توریشینی یازگن.
محمدی اوشبو تنلاوده نامزاد صفتیده کۉرسه‌تیلگن ۲۰۰ نفر صنعتکار آره‌سیدن عامه‌وی آواز بېریش و حکملر بهالشی اساسیده اېنگ یخشی ۱۰ صنعتکار قطاریگه کیردی. سۉنگگی اوچ نفر نامزاد آره‌سیدن اېسه ییل صنعتکاری اېتیب تنلندی.
مکس گالا تشکیلاتی ۲۰۱۵-ییلده کاناداده تشکیل اېتیلگن بۉلیب، هر ییلی ۱۰ ته تورلی یۉنه‌لیشده فعالیت یوریتووچی و باشقه‌لرگه الهام بېرووچی شخصلرگه مکافات تاپشیره‌دی. تشکیلات هر ییلی کانادا‌نینگ ییل صنعتکاری و ییل عیالینی هم اعلان قیله‌دی.
ربابه محمدی غزنی ولایتیده توغیلگن و ۲۰۱۵-ییلدن بویان پروفیشنل روشده رسّاملیک بیلن شغللنه‌دی.
اونینگ اثرلری اساسا افغانستان عیاللری‌نینگ حیاتی تجربه‌لری، آرزو-امیدلری و قیینچیلیکلرینی عکس اېتتیره‌دی همده کۉپچیلیک‌نینگ اعتبارینی تارتگن.
محمدی ۲۰۲۱-ییل اگوست آییده طالبان حاکمیتگه قَیتگنیدن سۉنگ افغانستاننی ترک اېتیب، کېینچه‌لیک کاناداگه جایلشگن.
ایکّی قۉلی و ایکّی آیاغیده معلوللیگی بۉلگن محمدی آغزی بیلن رسم چیزه‌دی. او بوندن آلدین هم صنعتی و سعی-حرکتلری اوچون کۉپلب مکافاتلرگه سزاوار بۉلگن.
