یونیسف: ۲۰۲۱-ییلدن بویان افغانستانده ایکّی میلیوندن آرتیق قیز تعلیم آلیشدن محروم اېتیلگن
۸صبح، کابل: بیرلشگن ملتلر تشکیلاتی‌نینگ باله‌لرنی قۉللب-قوّتلش جمغرمه‌سی (یونیسف) ۲۰۲۱-ییلدن بویان افغانستانده ۲،۶ میلیوندن آرتیق قیز تعلیم آلیشدن محروم اېتیلگنینی معلوم قیلدی.
اوشبو تشکیلات چهارشنبه کونی، ۲۲-میزان، حسابات اعلان قیلیب، تعلیمگه قۉییلگن چېکلاولر قیزلر‌نینگ بیلیم آلیش امکانیتلرینی تارتیب آلگنی و اولر‌نینگ کۉپچیلیگینی اویده قالیشگه مجبور قیلگنینی اَیتدی.
یونیسف اوشبو حساباتده آلتینچی صنفنی توگه‌تگنیدن سۉنگ اۉقیشنی دوام اېتتیره آلمه‌گن و حاضرده وقتی‌نینگ کتّه قِسمینی اویده اۉتکزه‌یاتگن قیزلر‌نینگ احوالیگه اعتبار قره‌تگن.
حساباتگه کۉره، مکتبلر اېشیکلری‌نینگ یاپیلیشی سببلی اَیریم قیزلر اۉقیشنی دوام اېتتیریش و طبیات کبی کسبلرنی اېگه‌للش حقیده‌گی آرزولریدن واز کېچیشگه مجبور بۉلگن.
تشکیلات مکتبدن محروم اېتیلیش نه‌فقط تعلیم آلیش امکانیتلرینی چېکله‌یاتگنی، بلکه قیزلر‌نینگ روحی حالتیگه هم تأثیر کۉرسه‌تیب، اولر آره‌سیده یالغیزلیک، یکّه‌لنیش و امیدسیزلیک حسسینی کوچه‌یتیرگنینی قۉشیمچه قیلدی.
یونیسف افغانستانده قیزلر و اۉغیل باله‌لر اوچون باشلنغیچ تعلیم همده اۉقوو دستورلرینی قۉللب-قوّتلشده دوام اېته‌یاتگنینی، شونینگدېک، مکتبلرنی قوریش و قَیته تیکلش، عیال اۉقیتووچیلرنی تیّارلش همده اۉقوو ماتریاللرینی تقدیم اېتیشده همکارلیک قیله‌یاتگنینی بیلدیردی.
