بانک تیزیمیگه ایشانچسیزلیک؛ اکثریت اهالی پوللرینی اویده سقله‌یدی
۸صبح
مملکت اَیریم وطنداشلری افغانستانده بانک خدمتلریدن فایده‌لنیشده موجود بۉلگن معمالر و تۉسیقلردن شکایت قیلماقده. اولر‌نینگ اَیتیشیچه، بانک حساب رقمیگه اېگه بۉلیشلریگه قره‌مه‌ی، نقد پولنی تېزده آلیشده‌گی قیینچیلیکلر، تۉلاو ماشینلری بیلن باغلیق معمالر و امانتده‌گی پوللرینی آلالمه‌گنلیکلریدن بۉلگن آلدینگی تجربه‌لری سببلی یوزه‌گه کېلگن ایشانچسیزلیک اولرنی پوللرینی اویده سقلشنی افضل کۉریشگه مجبور قیلماقده. اولر‌نینگ تأکیدلشیچه، بو حالت بیر تاماندن اۉغریلیک و پوللر‌نینگ تېز صرفلنیشی خوفینی آشیرسه، باشقه تاماندن جمغرمه قیلیش جریانینی قیینلشتیرگن.
کابل یشاوچیسی علی رضا فوق العاده وضعیتلرده پولگه ایریشیش امکانیتی قیین بۉلگنی سببلی نقد پوللرینی اویده سقلشنی افضل کۉریشینی اَیته‌دی. اونینگ سۉزلریگه کۉره، کسللیک یاکه باشقه معما یوزه‌گه کېلگن تقدیرده، پوللریدن تېزده فایده‌لنیش امکانیگه اېگه بۉلیشنی ایسته‌یدی.
او قۉشیمچه قیله‌دی: «افغانستانده‌گی بانک تیزیمی بیلن باغلیق معمالر سببلی ضرورت توغیلگنیده اۉز پولیمیزگه تېز و آسان یېتیشه آلمه‌یمیز. نقد پولنی اویده سقلش اۉغریلیک کبی خوفلرنی کېلتیریب چیقرسه-ده، بریبیر پوللریمنی اویده سقلشگه مجبورمن. بیر سفر خاتینیم کسل بۉلیب، شفاخانه‌گه یاتقیزیلگن اېدی، اما بانکدن پولیمنی آلیش اوچون ایکّی کون دوامیده سرسان بۉلدیم. بو تجربه بانک تیزیمیگه بۉلگن ایشانچیمنی یۉقاتیشیمگه سبب بۉلدی».
کابل یشاوچیسی مریم قریب بېش ییلدن بېری بانک حساب رقمیگه اېگه اېکنینی، بیراق شاشیلینچ ضرورت توغیلگنیده اۉز پولیگه قۉل تاپه آلمه‌گنی حقیده‌گی ناخوش تجربه اونی اېندی بانکده پول ییغمسلیککه مجبور قیلگنینی اَیته‌دی. او قۉشیمچه قیله‌دی: «پولیمگه زودلیک بیلن احتیاجیم توشگنیده، کېتمه-کېت ایکّی کون بانککه باردیم، اما بانک خادملری نقد پوللری یۉقلیگینی اَیتیشدی. اۉشه پیتده شاشیلینچ احتیاجیم بۉلیشیگه قره‌مه‌ی، اۉز پولیمنی آلالمه‌دیم. بو تجربه شوندن کېین بانک حساب رقمیمده باشقه پول سقله‌مسلیگیمگه سبب بۉلدی. حاضر حتا بانک حساب رقمیم یاپیلگنمی یاکه یۉقمی، بیلمه‌یمن، چونکه اېندی بو مېن اوچون اهمیتگه اېگه اېمس».
پرویز (مستعار) بانک حساب رقمیده‌گی پوللریگه کیریش بیلن باغلیق معمالر و بانکلرده‌گی تیربندلیک سببلی نقد پوللرینی اویده سقلشنی افضل کۉریشینی اَیته‌دی. او شونده‌ی دېیدی: «تخمیناً تۉرت ییل دوامیده بانک حساب رقمیمدن پول یېچمه‌گن اېدیم. بانکلرده‌گی چېکلاولر و حددن تشقری کۉپ آدم سببلی اۉزیمگه کېره‌کلی مقدارده‌گی پولنی آلالمه‌دیم. نهایت، ایکّی کون سرسان بۉلگنیمدن کېین پولیمنی آلیشگه موفق بۉلدیم. شوندن سۉنگ نقد پوللریمنی اویده سقلشگه قرار قیلدیم، تاکه ضرورت توغیلگنیده اولردن اۉز وقتیده فایده‌لنه آله‌ی و بانکلرده وقتیمنی بېهوده صرفله‌مه‌ی».
کوثر (مستعار) پولنی بانکده سقلش کۉپراق جمغرمه قیلیشگه یاردم بېریشی ممکنلیگینی اَیته‌دی، چونکه اونینگ فکریچه، اویده سقلنگن نقد پول تېزراق صرفلنه‌دی. شونگه قره‌مه‌ی، بانک خدمتلریدن آسان فایده‌لنیشده‌گی قیینچیلیکلر اونی پوللرینی بانککه تاپشیریشدن ساووتگن.
او قۉشیمچه قیله‌دی: «افغانستانده بانک آرقه‌لی پول ییغیش مدنیتی هلی کېنگ مقیاسده شکللنمه‌گن بۉلسه-ده، کۉپلب آدملر پوللرینی بانکلرده سقلشه‌دی. بیراق بانک تیزیمیگه نسبتاً ایشانچسیزلیک هم آرتیب بارماقده. طالبان حاکمیتنی اېگه‌لله‌گنیدن کېین بیر مدت آدملر بانک حساب رقملریدن کتّه مقدارده‌گی پوللرنی یېچه آلمه‌گن اېدی. حاضر هم پولگه زودلیک بیلن احتیاج توغیلگنیده، اونگه یېتیشیش اوچون بیر یاکه ایکّی کون وقت کېتیشی ممکن. شو سببلی آدملر اویده نقد پول سقلش خوفلی بۉلیشیگه قره‌مه‌ی، پوللرینی اویده سقلشنی افضل کۉریشه‌دی».
کوثر شونده‌ی دېیدی: «طالبان حاکمیتنی اېگه‌لله‌گنیدن کېین پول یېچیش اوچون بانککه فقط بیر مرته باردیم و بو کۉپلب معما همده قیینچیلیکلر بیلن کېچدی. اۉشندن بېری حساب رقمیمگه پول کیریتمه‌دیم هم، اوندن پول یېچمه‌دیم هم».
عینی پیتده، بیر مدت آلدین عزیزی بانکی‌نینگ اَیریم مزاجلری اوشبو بانک حساب رقمینی آچیش وقتیده اولرنی بعضی شرطلر حقیده انیق خبردار قیلمه‌گنینی اَیتیشگن اېدی. اولر‌نینگ دعوا قیلیشیچه، بانک خدمتلریدن فایده‌لنگنلریدن کېین‌گینه تۉلاو ماشینلردن پول یېچیش اوچون حق آلینیشی و بانک خدمتلری اوچون آیلیک تۉلاولر موجودلیگیدن خبر تاپیشگن. اوشبو مزاجلر بانکلردن خدمتلر اوچون هر قنده‌ی تۉلاونی اوندیریشدن آلدین اولرنی بو حقده آچیق و توشونرلی طرزده خبردار قیلیشنی سۉره‌شگن. اولر‌نینگ فکریچه، بو اولرگه پوللرینی قنده‌ی باشقه‌ریش و صرفلش حقیده آنگلیراق قرار قبول قیلیش امکانینی بېره‌دی.
