منبعلر: طالبان امید سبز شهرچه‌سی اهالیسی‌نینگ اویلرینی زۉرلیک بیلن بۉشه‌تتیرماقده
۸صبح، کابل: کابل شهری‌نینگ غربی قِسمیده‌گی امید سبز شهرچه‌سیدن محلی منبعلر اویلرنی مجبوری روشده بۉشه‌تتیریش جریانی دوام اېته‌یاتگنی و طالبان مسؤوللری اهالی آوازینی اېشیتمه‌یاتگنی حقیده خبر بېرماقده.
منبعلر چهارشنبه کونی، ۱۵ میزان کونی، ۸صبح گزېته‌سیگه بېرگن صحبتیده طالبان اوشبو شهرچه‌نی بۉشه‌تتیریش جریانینی مقصدلی روشده آلیب باره‌یاتگنینی و محلی اهالینی ناراضیلیک بیلدیرگن تقدیرده اۉلدیریلیش خوفیگه دوچ کېلیشلری ممکنلیگی بیلن تهدید قیلگنینی اَیتدی.
منبعلر‌نینگ اَیتیشیچه، سۉنگگی ایکّی کون ایچیده کمیده ۳۰ ته اوی و خاندان اېگه‌لریدن تارتیب آلینیب، بۉشه‌تیلگن و اوشبو تورر جایلرگه طالبان عایله‌لری جایلشتیریلگن.
منبعلرگه کۉره، ملک اېگه‌لری طالبان تامانیدن بېلگیلنگن اجاره حقینی تۉله‌شنی رد اېتگنیدن سۉنگ، اولر زۉرلیک بیلن اویلرینی ترک اېتیشگه مجبور قیلینگن.
شونینگدېک، طالبان‌نینگ عدلیه وزیرلیگی اوشبو شهرچه‌‌نینگ بیر نېچه نفر اهالیسی و وکیلینی طالبان قراریگه قرشی ناراضیلیک بیلدیرگنی اوچون حبسگه آلگن اېدی. اولر اویلرینی بۉشه‌تیش مجبوریتینی آلگنیدن سۉنگ ینه آزاد قیلینگن.
منبعلر قۉشیمچه قیلیشیچه، اولر سۉنگگی ایکّی کون دوامیده تینیمسیز حرکت قیلگن بۉلسه-ده، گروه‌نینگ بیرارته هم یوقاری مرتبه‌لی منصبداری بیلن اوچره‌شه آلمه‌گن و اۉز آوازلرینی اولرگه یېتکزه آلمه‌گن.
بو حالت طالبان کابل‌نینگ غربی قِسمیده‌گی امید سبز شهرچه‌سینی «دولتگه تېگیشلی» دېب اعلان قیلگن و اهالی‌نینگ اۉزی قورگن اویلرده‌گی هر بیر خانه اوچون آییگه ۴ مینگ افغانی مقداریده اجاره حقی بېلگیله‌گن بیر پیتده یوز بېرماقده.
