اروپا اتفاقی افغانستانگه ۱۵ میلیون یورولیک یاردم حقیده خبر بېردی
۸صبح، کابل: اروپا اتفاقی افغانستانده آزیق-آوقت خوفسیزلیگینی قۉللب-قوّتلش و اقلیم اۉزگریشی‌نینگ عاقبتلریگه قرشی کوره‌شیش اوچون ۱۵ میلیون یورو مقداریده یاردم اجره‌تدی.
اروپا اتفاقی دوشنبه کونی، ۹-سنبله، اوشبو یاردم بیرلشگن ملتلر تشکیلاتی‌نینگ جهان آزیق-آوقت دستوری بیلن همکارلیک دایره‌سیده افغانستان‌نینگ «اقلیمگه چیدملیلیگی و آزیق-آوقت تیزیملرینی مستحکملش» اوچون تقدیم اېتیلیشینی معلوم قیلدی.
اروپا اتفاقی مکتبلرنی محلی محصولاتلردن فایده‌لنیلگن حالده آزیق-آوقت بیلن تأمینلش، اقلیم اۉزگریشلریگه چیدملی تیریکچیلیک امکانیتلرینی یره‌تیش و طبیعی منبعلرنی برقرار باشقریشنی قۉللب-قوّتلشینی قۉشیمچه قیلدی.
اوشبو اتفاق، شونینگدېک، یاردم‌نینگ بیر قِسمی قیشلاق خۉجه‌لیگی و آزیق-آوقت صناعتی ساحه‌سیده خصوصی سکتور اشتراکینی کوچه‌یتیریشگه اجره‌تیلیشینی اَیتدی.
اتفاق‌نینگ معلوم قیلیشیچه، اوشبو دستور‌نینگ مقصدی افغانستاندهگی آزیقلنیشنی یخشیلش، تیریکچیلیکنی حمایه قیلیش و ضعیف قیشلاق حدودلری‌نینگ اقتصادی صلاحیتینی آشیریشدن عبارت.
اروپا اتفاقی اوشبو یانده‌شوو شاشیلینچ آزیق-آوقت احتیاجلرینی تأمینلش بیلن بیر قطارده، محلی اهالیگه طبیعی آفتلر و اقلیم اۉزگریشی‌نینگ اوزاق مدتلی عاقبتلریگه قرشی ینه‌ده چیدملی بۉلیشگه یاردم بېریشینی قۉشیمچه قیلدی.
