طالبان کابل بیلیم یورتینی بیر هفته تعطیل قیلدی
۸صبح، کابل: منبعلر‌نینگ معلوم قیلیشیچه، طالبان اوشبو گروه رهبری هبت‌الله آخوندزاده‌‌نینگ فرمانلرینی قۉللب-قوّتلشنی اعلان قیلیش مقصدیده ییغیلیش اۉتکزیش اوچون کابل بیلیم یورتینی تعطیل قیلگن.
منبعلر یکشنبه کونی، ۲۴-عقرب، ۸صبح گزېته‌سیگه بېرگن صحبتیده طالبان اوشبو ییغیلیش سببلی کابل بیلیم یورتی‌نینگ اۉقوو فعالیتینی بیر هفته‌گه تۉخته‌تگنینی تصدیقله‌دی.
کابل بیلیم یورتی هم اعلان چیقریب، لیسانس (کوندوزگی و کېچکی) همده ماسترلیک باسقیچی طلبه‌لری یکشنبه کونیدن پنجشنبه، ۲۸-عقرب کونیگچه تعطیلده اېکنلیگینی معلوم قیلدی.
بوندن اوّل هم منبعلر طالبان کابل بیلیم یورتی یاتاقخانه‌سی طلبه‌لرینی تشقریگه چیقریب یوبارگنی و اولر‌نینگ اۉرنیگه اوشبو گروه طرفداری بۉلگن ملالرنی یاتاقخانه‌گه جایلشتیرگنینی اَیتگن اېدی.
منبعلر‌نینگ سۉزلریگه کۉره، اوشبو ملالر طالبان‌نینگ ییغیلیشیده اشتراک اېتیش اوچون کابلگه چقیریلگن.
اَیتیلیشیچه، اوشبو ییغیلیشده قتنه‌شیش اوچون بوتون افغانستاندن تۉرت مینگگه یقین ملا تکلیف قیلینگن و اوشبو ییغیننی اۉتکزیشدن مقصد هبت‌الله آخوندزاده‌‌نینگ فرمانلرینی قۉللب-قوّتلش اېکنلیگی اَیتیلگن.
