بیرلشگن ملتلر تشکیلاتی افغانستانده زعفران و گلاب گُلینی کوکنار اېکینیگه مقابل صفتیده یېتیشتیریشنی قۉللب-قوّتلهماقده
۸صبح، کابل: بیرلشگن ملتلر تشکیلاتینینگ مخدره مادّهلر و جنایتچیلیککه قرشی کورهش باشقرمهسی (UNODC) ایتالیا یاردمیده ناقانونی کوکنار یېتیشتیریشگه مقابل تنلاولرنی یرهتیش مقصدیده افغانستانده گلاب گُلی و زعفران یېتیشتیریش همده قَیته ایشلشنی قۉللب-قوّتلهماقده.
اوشبو تشکیلات دوشنبه کونی، ۲۳ سنبله، مذکور دستور ننگرهار و هرات ولایتلریده کوکنار یېتیشتیریشدن ضرر کۉرگن حدودلرده عملگه آشیریلیشینی و اونینگ مقصدی دهقانلر اوچون مقابل تیریکچیلیک امکانیتلرینی تأمینلش اېکنینی معلوم قیلدی.
اوشبو تشکیلاتنینگ اَیتیشیچه، گلاب گُلی و زعفران یېتیشتیریش همده قَیته ایشلشنی ترغیب قیلیش بیلن بیر قطارده، اهالیگه جون ییگیریش، ایپک تۉقیش و سبزهواتلرنی قَیته ایشلش کۉنیکمهلری هم اۉرگهتیلهدی.
بیرلشگن ملتلر تشکیلاتینینگ اوشبو باشقرمهسی مذکور فعالیتلرنی قۉللب-قوّتلش کوکنار یېتیشتیریشدن ضرر کۉرگن حدودلرده یشهیدیگن عایلهلر اوچون مقابل درآمد منبعلرینی یرهتیشگه یاردم بېریشی ممکنلیگینی قۉشیمچه قیلدی.
اوشبو دستور ایتالیا یاردمیده ننگرهار و هراتده تیریکچیلیک امکانیتلرینی مستحکملش و دهقانلرنینگ ناقانونی کوکنار یېتیشتیریشگه قرهملیگینی کمهیتیریش مقصدیده عملگه آشیریلماقده.
