اۉکراین نینگ دونتسکّه هجومی عاقبتیده ۲۷ کیشی هلاک بۉلدی
روسیه اداره‌سیده بۉلگن دونتسک شهری رسمیلری، اوشبو منطقه گه اوکراین حربی کۉچلری نینگ هجومی عاقبتیده ۲۷ کیشی هلاک بۉلیب و باشقه ۲۵ کیشی یره‌لنگنینی معلوم قیلگنلر.
مذکور منطقه باشلیغی دنیس پوشیلین گه کوره، بو هجوم ۲۱-جنوری، یک‌شنبه کونی یۉز بیرگن.
بو هجوم آرتیدن، پوشیلین ۲۲-جنوری، دوشنبه کون نی دونتسک ده عمومی ماتم اعلام قیلگن.
پوشیلین گه کوره، اۉشبو تینچ اهالی اوکراین حربی کۉچلری نینگ راکته هجوم‌لری عاقبتیده هلاک بۉلگنلر.
«تاور» ده اوکراین حربی کۉچلری نینگ قوماندانی فیسبوک صحېفه‌سیده، اوکراین عسکرلری بو هجوم مسوولی اېمس دېب یازگن.
مذکور قوماندان نینگ بیانیه‌‌سیده کېلیشیچه: «دونتسک اوکراین دیر. روسیه اوکراین‌لیکلر نینگ اۉلیمی گه جواب‌گر بۉلیشی کېره‌ک.»
رویترز نینگ گزارشی اساسیده، اوکراین جمهور باشلیغی ولادیمیر زلنسکی بو هجوم نی تصدیقلب، روسیه بیر کون اېچیده مملکتی نینگ توقیز منطقه‌سیده ۱۰۰ دن آرتیق شهر، شهرک و قیشلاق نی اوققه توتگنینی بېلدیرگن.
برچه‌سی بیلن، روسیه تشقی ایشلر وزیرلیگی بیر بیانیه ترقه‌تیب بو هجوم نی کی‌یف نینگ «تروریستیک وحشی‌لرچه اقدامی» دېب اته‌گن، اۉشبو وزیرلیک نینگ ایشانچی گه کوره، هجوم غرب تامانیدن یۉللنگن قۉراللر بیلن اۉیوشتېریلگن.
بیانیه ده کیلیشیچه: «روسیه تینچ اهالی گه قرشی اویۉشتېریلگن بو هجوم نی قتیق قاره‌له‌یدی.»
عین‌حالده، معلومات‌لر اساسیده، سونگی ایکّی ییل ده اوکراین نینگ تینچ اهالی یشه‌یدیگن منطقه‌لریده روسیه حربی کوچلری نینگ هجوم‌لری عاقبتیده مینگلب تینچ اهالی هلاک بولگن.