یوناما: دنیاده ژورنالیستلیک مثلی کۉریلمهگن باسیملرگه دوچ کېلماقده
۸صبح، کابل: بیرلشگن ملتلر تشکیلاتینینگ افغانستاندهگی یاردم هیاتی (یوناما) ژورنالیستلیک بوتون دنیا بۉیلب مثلی کۉریلمهگن باسیملرگه دوچ کېلهیاتگنینی معلوم قیلدی.
یوناما دوشنبه کونی، ۲۹ سرطان، فیسبوک صحیفهسیده یازیشیچه، ژورنالیست صنعی هوش یاردمیده یرهتیلهیاتگن ناتۉغری و چلغیتووچی اخباراتلرنینگ کېنگهییشی، سانسور همده ژورنالیستلرگه قرشی هجوملرنینگ آرتیشی کبی جدّی تهدیدلرگه دوچ کېلماقده.
مذکور تشکیلات قۉشیمچه قیلیشیچه، مستقل عامهوی اخبارات واسطهلرینی قۉللب-قوّتلشنینگ کمهییشی هم جماعت منفعتلریگه خدمت قیلووچی ژورنالیستنینگ کېلهجگینی جدّی تهدیدلر آستیده قالدیرگن.
یوناما: اگر اېرکین ژورنالیستلیک ضعیفلشتیریلسه، بیز نیمهنی یۉقاتهمیز؟ دېگن سوالنی اۉرتهگه تشلهگن.
بو خواطرلر افغانستانده ژورنالیستلر و عامهوی اخبارات واسطهلری ۲۰۲۱-ییلده طالبان حاکمیتنی اېگهللهگنیدن سۉنگ کېنگ کۉلملی چېکلاولر، خوفسیزلیک باسیملری و مېدیا فعالیتی اوچون موجود مکاننینگ قیسقریشیگه دوچ کېلهیاتگن بیر پیتده بیلدیریلماقده.
ژورنالیستلرنی قۉللب-قوّتلاوچی قطار تشکیلاتلر افغانستانده ژورنالیستلرگه قرشی تهدیدلر، سانسور، اخباراتگه کیریشدهگی چېکلاولر همده مستقل عامهوی اخبارات واسطهلرینینگ اقتصادی معمالری یوزهسیدن بیر نېچه بار خواطر بیلدیرگن.
