بیرلشگن ملتلر تشکیلاتی: افغانستان عیاللری عدالت و تېنگ حقوقلردن فایدهلنه آلمهیپتی
۸صبح، کابل: بیرلشگن ملتلر تشکیلاتینینگ عیاللر بۉلیمی (UN Women) افغانستاندهگی عیاللر و قیزلر تېنگ حقوقلردن همده عدالتگه تېنگ اساسده کیریش امکانیتیدن محروم اېکنینی معلوم قیلدی.
اوشبو تشکیلات سهشنبه کونی، ۳-سنبله، ایکس صحیفهسیده یازیشیچه، طالبان حاکمیتنی اېگهللهگنیدن بېش ییل اۉتیب، افغانستان اهالیسینینگ یریمی حقوقی مقام و عدالتگه ایریشیش امکانیتی جهتیدن ایکّینچی یریمیگه نسبتاً کمراق حقوقلرگه اېگه.
بیرلشگن ملتلر تشکیلاتینینگ عیاللر بۉلیمی قۉشیمچه قیلیشیچه، بو حالت افغانستاندهگی عیاللر و قیزلر حیاتینینگ حقیقتی دیر و اولر همان اۉز حقوق و اېرکینلیکلری ساحهسیده کېنگ کۉلملی چېکلاولرگه دوچ کېلماقده.
اوشبو تشکیلات موجود معمالر و چېکلاولرگه اشاره قیلیب، عیاللرنینگ قانون آلدیده تېنگ بۉلیشی مهملیگیگه اورغو بېرگن.
بیرلشگن ملتلر تشکیلاتینینگ عیاللر بۉلیمی بوندن آلدین هم افغانستان عیاللری و قیزلریگه نسبتاً جاری اېتیلگن چېکلاولردن خواطر بیلدیرگن و اولرنینگ تېنگ حقوقلرینی تأمینلشگه چقیرگن.
