بیرلشگن ملتلر تشکیلاتی: چرس حاضر افغانستانده اېنگ کۉپ استعمال قیلینه‌دیگن مخدر ماده اېکنینی معلوم قیلدی
۸صبح، کابل: بیرلشگن ملتلر تشکیلاتی نینگ مخدر ماده‌لر و جنایتچیلیککه قرشی کوره‌ش باشقرمسی، افغانستانده حاضرده چرس اېنگ کۉپ استعمال قیلینه‌دیگن مخدر ماده اېکنینی و او تریاکنی آرتده قالدیرگنینی معلوم قیلدی.
مذکور اداره، ۱۲- دلو، یکشنبه کونی، اعلان قیلگن گزارشیده، اۉتگن ییل‌ده فارمسیوتیکی نشه قیلووچی دارولر استعمالی هم تریاک استعمالیدن یوقاری بۉلگنینی تأکیدلدی.
بیرلشگن ملتلر تشکیلاتی مخدر ماده‌لرنی استعمال قیلیش اندازه‌لری افغانستانده حدودلرگه قره‌ب فرقلنیشینی بیلدیردی.
گزارش‌ده شهر حدودلریده «K» تابلیت‌لرینی استعمال قیلیش حالت‌لری آشگنی قید اېتیلگن.
بیرلشگن ملتلر تشکیلاتی مخدر ماده‌لرنی استعمال قیلیش افغانستانده قشاقلیک و ایشسیزلیک بیلن چنبرچس باغلیق اېکنینی تأکیدلدی.
شونینگدېک، تشکیلات عیال‌لر آره‌سیده مخدر ماده‌لر استعمالی تشویشلی درجه‌گه یېتگنینی، اخباراتده‌گی بۉشلیقلر اېسه بو باره‌ده انیق سان معلوماتلرنی تقدیم اېتیشنی قیینلشتیره‌یاتگنینی معلوم قیلدی.
گزارش‌ده شونده‌ی ایتیلیشیچه: «قشاقلیک، ایشسیزلیک و ساغلیق بیلن باغلیق معمالر مخدر ماده‌لرنی استعمال قیلیشگه مایللیکنی کوچیتیره‌دی و اونگه قره‌ملیکنی ینه‌ده چوقورلشتیره‌دی، استعمال بیلن باغلیق مالیوی خرجتلر اېسه عایله‌لر ذمه‌سیگه قۉشیمچه باسیم یوکله‌یدی».
گرچه مخدر ماده‌لرگه قره‌م شخصلر سانی بۉییچه انیق آمار موجود بۉلمسه‌ده، طالبان ایکی ییل آلدین بو رقمنی قریب بېش میلیون کیشی دېب اعلان قیلگن اېدی.
طالبان مخدر ماده‌لرگه قره‌م شخصلرنی قماقخانه‌لرگه جایلشتیرگنینی بیلدیرگن.
