بیرلشگن ملتلر تشکیلاتی: قیشلاق عیاللری‌نینگ اوی شرایطیده‌گی تدبیرکارلیک فعالیتی کېنگه‌یماقده
۸صبح، کابل: بیرلشگن ملتلر تشکیلاتی‌نینگ ترقیات دستوری (UNDP) اروپا اتفاقی یاردمیده قیشلاق عیاللریگه آزیق-طعام محصولاتلری ایشلب چیقریشنی آشیریش و اوی شرایطیده‌گی تدبیرکارلیک فعالیتلرینی کېنگه‌یتیریشده یاردم بېرگنینی معلوم قیلدی.
اوشبو تشکیلات چهارشنبه کونی، ۲۲-مېزان، خلق‌ارا قیشلاق عیاللری کونی مناسبتی بیلن بېرگن بیاناتیده اَیتیشیچه، بو عیاللر تعلیم و اسکونه‌لر بیلن تأمینلنگنیدن سۉنگ اۉز محصولاتلری‌نینگ صفتینی یخشیلشگه و کۉپراق بازارلرگه چیقیشگه موفق بۉلگنلر.
تشکیلات‌نینگ تأکیدلشیچه، اسکونه‌لر‌نینگ یېتیشمسلیگی، بازارلرگه چیقیش امکانیتی‌نینگ چېکلنگنی و سودا اصوللری حقیده یېترلی معلوماتگه اېگه اېمسلیک اوشبو عیاللر تدبیرکارلیگینی کېنگه‌یتیریش یۉلیده‌گی اساسی تۉسیقلردن بۉلگن.
بمت ترقیات دستوری قۉشیمچه قیلیشیچه، افغانستان هم‌جمعیتی‌نینگ برقرارلیگینی مستحکملش دستوری (ACRP) دایره‌سیده اروپا اتفاقی یاردمیده و بیرلشگن ملتلر تشکیلاتی بیلن همکارلیکده عیاللرگه محصولاتلر صفتینی یخشیلش، قداقلش و مارکېتینگ ساحه‌لریده یاردم کۉرسه‌تیلگن.
تشکیلات‌نینگ بیلدیریشیچه، قیشلاق عیاللری‌نینگ تدبیرکارلیک فعالیتی نه‌فقط عیاللر اوچون ایش ا‌ۉرینلرینی یره‌ته‌دی، بلکه محلی دهقانلرگه هم یاردم بېره‌دی.
شونگه قره‌مه‌ی، برق انرژیسی‌نینگ اوزلوکسیز تأمینلنمسلیگی، ساووتیش انبارلری‌نینگ یۉقلیگی و مالیوی منبعلردن فایده‌لنیش امکانیتی‌نینگ چېکلنگنی اوشبو تدبیرکارلیک فعالیتلری اوچون همان معما بۉلیب قالماقده.
