8صبح، کابل: یازدهمین دور «نشست امنیتی هرات» در تاجیکستان آغاز شد.
این نشست بامداد دوشنبه، ۶ قوس، در شهر دوشنبه، پایتخت تاجیکستان، از سوی مرکز مطالعات استراتژیک افغانستان برگزار شده است.
یازدهمین دور نشست امنیتی هرات زیر عنوان «بازخوانی افغانستان؛ راه‌کارهای متفاوت» تا دو روز ادامه خواهد داشت.
در این نشست، افرادی از کشورهای مختلف، مخالفان طالبان از جمله احمد مسعود، رهبر جبهه مقاومت ملی افغانستان، اسماعیل خان، رهبر جهادی و برخی از مقام‌های دیگر حکومت پیشین حضور دارند.
در بخش نخست این نشست، رحمت الله نبیل، رییس امنیت ملی حکومت پیشین، محسن داور، عضو پارلمان پاکستان و از رهبران جنبش حفاظت از پشتون‌ها، داکتر استر زبیری، محقق در شورای امنیت سازمان ملل و نیز دیوید سدنی، محقق در مرکز مطالعات استراتژیک امریکا سخنرانی خواهد کردند.
نشست امنیتی هرات از سال ۲۰۱۲ آغاز شده و مسایل سیاسی و امنیتی مربوط به افغانستان را عمدتاً با تحلیلگران و سیاست‌مداران برجسته مورد بحث قرار داده و پیشنهاداتی را ارایه می‌کند.
پس از به قدرت رسیدن طالبان، این نشست به صورت «آنلاین» و یا در کشورهای دیگر برگزار شده است.
دهمین نشست امنیتی هرات سال پار نیز در دوشنبه پایتخت تاجیکستان برگزار شده بود و اشتراک‌کننده‌گان در آن بر تشکیل دولت موقت در افغانستان تاکید کرده بودند.
