مقام‌های اوزبیکستان و سازمان بین‌المللی مهاجرت در مورد افغانستان گفت‌وگو کردند
۸صبح، کابل: نماینده ویژه رییس جمهور اوزبیکستان در امور افغانستان و هماهنگ‌کننده منطقه‌ای سازمان بین‌المللی مهاجرت در آسیای مرکزی باهم دیدار و اوضاع افغانستان را بررسی کرده‌اند.
وزارت امور خارجه اوزبیکستان روز چهارشنبه، ۹ حمل، از دیدار عصمت‌الله ایرگاشف، نماینده ویژه رییس جمهور اوزبیکستان برای افغانستان، با زینال حاجی‌اف، هماهنگ‌کننده منطقه‌ای سازمان بین‌المللی مهاجرت (IOM) برای آسیای میانه، خبر داده است.
این وزارت افزوده است که حاجی‌اف بر نقش مهم اوزبیکستان در برقراری صلح طولانی‌مدت و پایدار در افغانستان تاکید کرده است.
دو طرف همچنان وضعیت کنونی و چشم‌انداز روابط میان اوزبیکستان و سازمان بین‌المللی مهاجرت از جمله در جهت افغانستان را مورد بحث و بررسی قرار داده‌اند.
گفتنی است که سازمان بین‌المللی مهاجرت در افغانستان حضور فعال دارد و به مهاجرانی که از دیگر کشورها اخراج و به افغانستان بازگردانده می‌شوند، کمک می‌کند.
