بیر هفتهده ۲۱ ته سِرلی قاتللیک؛ اهالی افغانستانده خوفسیزلیکنینگ یامانلشوویدن خواطرده
۸صبح، غزنی
سۉنگگی کونلرده مملکتده جنایتلر، قاتللیک و اۉغریلیک حالتلری مثلی کۉریلمهگن درجهده کۉپهییب، وطنداشلر اوچون خواطر اویغاتماقده. ۸صبح گزېتهسینینگ انیقلشیچه، سۉنگگی بیر هفته ایچیده مملکتنینگ ۱۰ ولایتیده کمیده ۲۱ کیشی سِرلی طرزده اۉلدیریلگن. اوشبو حسابات نتیجهلریگه کۉره، اۉتگن بیر هفته دوامیده کابلده تۉرت کیشی، هراتده اوچ کیشی، بادغیسده اوچ کیشی، بغلانده تۉرت کیشی، تخارده ایکّی کیشی همده پکتیا، پکتیکا، فاریاب، غزنی و بلخ ولایتلریده ینه بېش کیشی سِرلی طرزده اۉلدیریلگن.
۸صبح گزېتهسینینگ انیقلشیچه، اۉلدیریلگنلر آرهسیده ایکّی باله، ایکّی عیال، ایکّی شفاکار، بیر سوداگر، بیر اۉقیتووچی، ایکّی قبیله آقسقالی و ۱۱ نفر یاش اېرکک بار. اوشبو شخصلرنینگ جسدلریدن ترقهتیلگن تصویرلرده کمیده آلتی کیشی اۉته شفقتسیز طرزده اۉلدیریلگنی کۉرینهدی.
اخباراتگه اېگه بۉلیش مملکتدهگی عامهوی اخبارات واسطهلری اوچون معمالردن بیری دیر و قاتللیکلر سانی بوندن هم کۉپ بۉلیشی احتمالی بار. شونگه قرهمهی، عامهوی اخبارات واسطهلری فعالیتیگه قۉییلگن چېکلاولر سببلی بو حادثهلر سانی خبر قیلینگن رقمدن کۉپراق بۉلیشی ممکن و اَیریم حالتلر مېدیاده یاریتیلمهگن بۉلیشی احتمال.
عینی پیتده مملکتنینگ تورلی ولایتلریده یشاوچی بیر قنچه اهالی ۸صبح گزېتهسیگه بېرگن صحبتلریده مملکتده سِرلی قاتللیکلر حالتلری کۉپهیهیاتگنیدن خواطر بیلدیرگن و طالباننی اهالی خوفسیزلیگینی تأمینلشده موفقیتسیزلیککه اوچرهگنلیکده عیبلهگن.
طالبان مملکت بۉیلب خوفسیزلیکنی تأمینلشنی سۉنگگی بېش ییلدهگی اېنگ مهم یوتوقلریدن بیری صفتیده تأکیدلهیاتگن بۉلسه-ده، سۉنگگی آیلرده طالبانگه قرشی جبههلر فعاللیگینینگ کوچهییشی، ایچکی ناراضیلیکلرنینگ آرتیشی و اوشبو گروه جنگریلریگه قرشی اویوشتیریلگن سوءِقصدلر بیلن بیر قطارده سِرلی قاتللیکلر سانی هم کۉپهیگن.
کابل شهریده یشاوچی محمد راشد، ۸صبح گزېتهسیگه جنایتچیلیک حالتلرینینگ کۉپهییشی حقیده گپیرر اېکن، شوندهی دېیدی: «اۉغریلیک، قاتللیک و یۉلتۉسرلیک اوّلگی حکومت دوریدهگیدېک کۉپهیگن. بیر نېچه کون آلدین بیزنینگ حدودیمیزدن بیر ییگیت غایب بۉلگن اېدی و ایکّی کون آلدین اونینگ جسدینی پغمان تومنیدن آلیب کېلیشدی. هلی اونینگ نیمه سببدن اۉلدیریلگنی انیقلنمهگن؛ اَیریملر موتری اوچون اۉلدیریلگنینی اَیتیشدی، باشقهلر اېسه دۉستلری تامانیدن اۉلدیریلگنینی اَیتیشدی.»
شو بیلن بیرگه، پکتیکا ولایتی اهالیسیدن بیری ۸صبح گزېتهسیگه شخصینی آشکار قیلمسلیک شرطی بیلن بېرگن صحبتیده طالبان اعضالرینی اوشبو قاتللیکلرگه علاقهدارلیکده عیبلهیدی. اونینگ تأکیدلشیچه، بو قاتللیکلرنینگ اکثریتی قوراللی شخصلر تامانیدن صادر اېتیلگن و بو شخصلر طالبان صفیده. او اوشبو ولایتده سابق سناتورنینگ اۉلدیریلگنیگه اشاره قیلیب، شوندهی دېیدی: «شبههسیز، طالبان ملک حسننینگ، قبیله آقسقالی و سابق سناتورنینگ اۉلدیریلیشیگه علاقهدار. قندهی قیلیب کوندوزی بیر نېچه قوراللنگن شخص کېلیب، بیر قبیله آقسقالینی آتیب تشلب، کېتیشی ممکن؟ ایکّی احتمال بار؛ یا طالبان بېواسطه اۉق اوزگن یاکه قاتللر بیلن تیل بیریکتیرگن.»
غزنی ولایتینینگ جاغوری تومنیده یشاوچی محمد حسینی اوشبو تومنده بیر ییگیتنینگ شفقتسیز طرزده اۉلدیریلیشی واقعهسینی قوییدهگیچه حکایه قیلهدی: «عبدالخالق جوده شفقتسیزلرچه اۉلدیریلگن و جسدی یاقیب یوباریلگن اېدی. اونینگ جسدینی تاغدن تاپیشگن. او بیر نېچه کون بېدرَک یۉقالگن اېدی. قندهارده قوریلیش ایشلریده ایشلهیاتگن و عایلهسینی کۉریش اوچون جاغوری تومنیگه کېلگن اېدی. اونینگ اۉلدیریلگنیگه ۱۰ کون بۉلدی، اما هنوزگچه اونی کیم اۉلدیرگنی و قاتللیک سببی نیمه بۉلگنی انیقلنمهدی. بو بارهده کیم جواب بېریشی کېرهک؟»
باشقه تاماندن، بیر نېچه ییل کاناداده یشهب، افغانستانگه قَیتگن مزارشریف شهریدهگی رضاییلاقی اسملی سوداگرنینگ اۉلدیریلیشی اجتماعی ترماقلرده فایدهلنووچیلرنینگ کېنگ مناسبتیگه سبب بۉلدی. فایدهلنووچیلر اونینگ اۉز اوییده اۉلدیریلگنینی شبههلی دېب بهالشگن.
وطنداشلرنینگ مملکتده سِرلی قاتللیکلر کۉپهییشیدن خواطری ۸صبح گزېتهسی بوندن بیر نېچه کون آلدین اعلان قیلگن حساباتیده مملکتنینگ تورلی حدودلریده بالهلرنینگ بېدرَک یۉقالیشی حالتلری هم کۉپهیگنی و فقرالرنینگ خوفسیزلیک یۉقلیگیدن خواطری اوجیگه چیققنینی انیقلهگن بیر پیتده ینهده کوچهیماقده.
