۶،۴ میلیون افغان مملکتگه قَیتدی؛ قَیتیب کېلگنلر‌نینگ ۶۹ فایزی ایش بیلن تامینلنمه‌گن
۸صبح، کابل: خلق‌ارا مهاجرت تشکیلاتی (IOM) بیر مینگ و ۵۴۷ نفر افغانستانلیک قَیتووچیلر اۉرته‌سیده اۉتکزگن بهالش نتیجه‌سیده اولر‌نینگ ۶۹ فایزی سۉراودن آلدینگی ۳۰ کون دوامیده ایش بیلن تامینلنمه‌گنینی، ۵۴ فایزی اېسه اساسی حیاتی احتیاجلرینی قاندیره آلمه‌گنینی انیقله‌دی.
تشکیلات سه‌شنبه کونی، ۷-میزان، اعلان قیلگن سۉنگگی حساباتیده اَیتیشیچه، ۲۰۲۳-ییل سپتمبر اۉرته‌لریدن ۲۰۲۶-ییل ۳۱-اگوستگچه ۶ میلیون ۴۷۳ مینگ و ۹۷۸ نفر افغانستان وطنداشی ایران و پاکستاندن مملکتگه قَیتگن.
حساباتگه کۉره، قَیتووچیلر‌نینگ ۷۷ فایزی وقتینچه‌لیک باش‌پناه‌لرده یشه‌گن، ۱۴ فایزی اېسه قَیتگنیدن سۉنگ یشه‌ش جاییدن چیقریب یوباریلگن.
حساباتده قَیتووچیلر‌نینگ ۴۳ فایزی یاکه اولر‌نینگ عایله اعضالریده خدمتلردن فایده‌لنیش اوچون ضرور حجتلر بۉلمه‌گنی قید اېتیلگن.
شونینگدېک، آزیق-آوقت ۶۹ فایز، باش‌پناه ۶۷ فایز و کۉپ مقصدلی نقد پول یاردمی ۶۴ فایز بیلن قَیتووچیلر‌نینگ اېنگ مهم احتیاجلری بۉلگن.
خلق‌ارا مهاجرت تشکیلاتی قۉشیمچه قیلیشیچه، قَیتووچیلر‌نینگ ۶۲ فایزی طبی خدمتلردن یېترلی درجه‌ده فایده‌لنه آلمه‌گن، ۵۳ فایزی اېسه تازه ایچیملیک سوویدن یېترلی درجه‌ده فایده‌لنیش امکانیگه اېگه بۉلمه‌گن.
شونگه قره‌مه‌ی، قَیتووچیلر‌نینگ ۷۵ فایزی حاضرگی یشه‌ش جایینی ترک اېتیش نیتیده اېمسلیگینی بیلدیرگن.
اوشبو سۉراو ۲۰۲۶-ییل اگوست آییده بیر مینگ و ۵۴۷ نفر قَیتووچی، جمله‌دن بیر مینیگ و ۲۶۷ ته عایله و ۲۸۰ نفر یکّه ترتیبده قَیتگن شخص اۉرته‌سیده اۉتکزیلگن.
سۉراوده قتنه‌شگنلر ۲۰۲۵-ییل ۱-جولایدن ۳۱-دسمبرگچه افغانستانگه قَیتگن شخصلر بۉلگن.
خلق‌ارا مهاجرت تشکیلاتی اوشبو تدقیقات نتیجه‌لریدن قَیته قوشیلیش‌گه تۉسقینلیک قیله‌یاتگن عامللرنی انیقلش همده قَیتووچیلر و اولرنی قبول قیله‌یاتگن جماعه‌لر اوچون انسانپرورلیک یاردم و رواجلنیش دستورلرینی مقصدلی یۉنه‌لتیریشده فایده‌لنیلیشینی معلوم قیلگن.
