یېرلرنی تارتیب آلیش و کانچیلرنی تاولمچیلیک قیلیش؛ خواهان اهالیسی طالبان تومن حاکمی اۉرین‌باسرینی عیبله‌ماقده
نیما
خواهان اولسواللیگی اهالیسی‌نینگ بیر قِسمی طالبان‌نینگ تومن حاکمی اۉرین‌باسری امان‌الدین محمدی‌دن شکایت قیلماقده. اولر‌نینگ اَیتیشیچه، او دولت و اهالیگه تېگیشلی یېرلرنی تارتیب آلیب، اولرنی کانچیلرگه بېرگن همده اولردن تاولمچیلیک یۉلی بیلن پول اوندیرماقده.
خواهان اهالیسی وکیللری‌نینگ اَیتیشیچه، محمدی اوشبو اولسواللیک‌نینگ جرو پایان قیشلاغیدن بۉلیب، «روینزار قیشلاغی‌نینگ آخریدن زیر شره جبلیرتنگچه» بۉلگن، قریب ۱۰ کیلومتر اوزونلیکده‌گی «دولتگه تېگیشلی سنگاب» حدودینی اېگه‌للب، اونی جرو پایان و روینزار اهالیسی اۉرته‌سیده تقسیمله‌گن. اولر‌نینگ اَیتیشیچه، او هر هفته اولردن پول اوندیره‌دی.
مذکور حدودلر اهالیسی اَیتیشیچه، اوشبو محلی طالبان قوماندانی‌نینگ جنگریلری اۉز لوازملریدن و گروهگه علاقه‌دار شخصلردن فایده‌لنیب، اهالینی بېزاوته قیله‌دی، آدملردن زۉرلیک بیلن پول ییغه‌دی و اونی طالبان تومن حاکمی اۉرین‌باسریگه تاپشیره‌دی.
اوشبو حدود اهالیسی معلوماتیگه کۉره، «ملا» نامی بیلن تنیلگن تومن حاکمی اۉرین‌باسری‌نینگ اکه‌سی همده روینزاردن بۉلگن، طالبان‌نینگ خواهان تومنیده‌گی شهر حاکمی عتیق، یېرلر و آلتین قزیب آلیش اوستاخانه‌لرینی اېگه‌للش، شونینگدېک، دوکانلر اوچون یېرلرنی تقسیملش جریانیده آدملردن پول اوندیریب، زۉرآورلیک قیلماقده. اولر‌نینگ اَیتیشیچه، عتیق و تومن حاکمی اۉرین‌باسری تامانیدن ییغیلگن پوللر اۉزلشتیریلماقده.
خواهان اهالیسی اَیتیشیچه، بوستانک قیشلاغیدن پهلوان‌نینگ اۉغلی مولوی عبدالوهاب، حاضرده طالبان‌نینگ «بلاک تۉرت باالمعاوضه» حدودیده فعالیت یوریته‌یاتگن شخص، شونینگدېک، پاینده‌‌نینگ اۉغلی غلام فاروق، جرو پایان قیشلاغیدن خردمند‌نینگ اۉغلی شمس، طالبان‌نینگ جوزجان ولایتیده‌گی چېگره کندکی مالیه بۉلیمی اۉرین‌باسری و عبدالقیوم‌نینگ اۉغلی، قوراللنگن شخص شمس اوشبو حدودده فعالیت آلیب باره‌دی.
اهالی‌نینگ اَیتیشیچه، باشقه بیر کان قزیش اوستاخانه‌سی اوشبو قیشلاقدن تشقریده عینی حدودده ایش باشله‌ماقچی بۉلگنیده، یوقاریده تیلگه آلینگن شخصلر لایحه هیداوچیلری و ایشچیلرینی کلتکلب، اولرگه قره‌ته اۉق اوزگن همده اولر‌نینگ چادرلری و جهازلرینی دریاگه اولاقتیرگن. اولر‌نینگ قۉشیمچه قیلیشیچه، طالبان تومن حاکمی اۉرین‌باسری بحثلی حدود یوزه‌سیدن اهالی‌نینگ عریضه و شکایتلرینی کۉریب چیقمه‌گن.
اهالی تأکیدلشیچه، اولر طالبان‌نینگ باشقه اداره‌لریگه هم عریضه بېرگن، بیراق اوشبو گروه‌نینگ تومن حاکمی اۉرین‌باسری تامانیدن تهدید قیلینگن. او اولرگه اگر عریضه‌لریدن واز کېچمسه‌لر، «اربکی» و «عصیانچی» صفتیده کۉرسه‌تیلیشینی اَیتگن.
شونینگدېک، خواهان اهالیسی دعواسیگه کۉره، طالبان تومن حاکمی اۉرین‌باسری اوشبو تومن‌نینگ جنگل سیدآباد حدودیده قریب ۱۰۰ جریب یېرنی اېگه‌للب آلیب، اونی کانچیلرگه ساتگن. اولر‌نینگ اَیتیشیچه، اونینگ شېریگی طالبان استخبارات باشقیرمه‌سی‌نینگ تشقی علاقه‌لر بۉییچه زابیتلریدن بیری شاه آغا جان بۉلیب، اصلی قندوزدن و تومن حاکمی اۉرین‌باسری‌نینگ یقین دۉستی حسابلنه‌دی. اولر‌نینگ اَیتیشیچه، هر بیر بېش-بسته یېر میدانی ۱۵–۳۰ لک افغانیگه (بیریریم تا اوچ میلیون افغانی) ساتیلگن.
عینی پیتده ۸صبح اختیاریگه کېلیب توشگن ویدیولرده قوراللنگن شخصلر ایشچیلر بیلن تارتیشه‌یاتگنینی، هر ایکّی تامان اېسه ملککه اېگه‌لیک قیلیشینی دعوا قیله‌یاتگنینی کۉریش ممکن. ویدیولرده قزیش ایشلری اوچون ایشله‌تیله‌دیگن اسباب-اسکونه‌لر هم کۉرینه‌دی.
باشقه بیر ویدېاده بیر شخص: « عتیق، کلاشینکوفینگنی تارتیب چیقر و آت، او اۉق اوزه‌دی. او کلاشینکوفینی چیقردی»، دېیدی. منبعلرگه کۉره، طالبان تومن حاکمی اۉرین‌باسری و عتیق اوشبو ویدیولرده کانچیلرنی قۉرقیتیب، اولرنی حدوددن چیقریب یوبارماقده.
بو خواطرلر طالبان‌نینگ اَیریم یوقاری مرتبه‌لی عملدارلری، جمله‌دن، گروه‌نینگ اوردوس باشلیغی بدخشانده یېرلرنی اېگه‌للش و کانلرنی تالان-تاراج قیلیش ایشلریده بې‌واسطه یاکه اۉزلریگه علاقه‌دار شخصلر آرقه‌لی اشتراک اېته‌یاتگنی حقیده‌گی خبرلر بیلن بیر وقتده بیلدیریلماقده. ۸صبح‌نینگ کۉپلب خبرلریده اوشبو طالبان عملدارلری شهربزرگ تومنی و بدخشانده‌گی باشقه اَیریم کان حدودلریگه اۉزلریگه علاقه‌دار اۉنلب کمپنیلرنی جایلشتیریب، کېنگ کۉلمده کان قزیب آلیش بیلن شغللنه‌یاتگنی کۉرسه‌تیلگن.
۸صبح خبرلری‌نینگ نتیجه‌لری شونی کۉرسه‌ته‌دی که طالبان عملدارلریگه علاقه‌دار کېنگ و اویوشگن ترماقلر‌نینگ کان قزیب آلیش فعالیتی هنوز جدل دوام اېتماقده. بو جریان کوچ ایشله‌تیش، فساد و اَیریم طالبان رهبرلری بیلن تیل بیریکتیریش آرقه‌لی تیزیملی روشده آلیب باریلماقده.
طالبان‌نینگ اوّلگی برچه والی‌لری هم کان قزیب آلیش و کانلرنی ناقانونی آلیب چیقیشده اشتراک اېتگن. منبعلر هم اوشبو ولایتده طالبان عملدارلری‌نینگ المشیشی مالیوی کېلیشوولر و مافیا منفعتلری اساسیده عملگه آشیریلیشینی تصدیقله‌ماقده. منبعلرگه کۉره، گروه‌نینگ یوقاری مرتبه‌لی عملدارلریگه کۉپراق پاره بېرگن محلی عملدار معلوم مدتگه اوشبو گروه‌نینگ بدخشانده‌گی وکیلی صفتیده یوباریله‌دی.
اۉتگن آی دوامیده طالبان اهالی تامانیدن کان قزیب آلیش جریانینی تۉخته‌تایش حقیده بویروق بېرگن و اولر اوشبو گروه‌نینگ کانلر وزیرلیگیدن ایشلش اوچون رخصت‌نامه آلیشی کېره‌کلیگینی بیلدیرگن. بیراق منبعلر بو چاره هم طالبان اوچون ینه بیر درآمد منبعیگه ایلنگنینی تصدیقله‌ماقده. اوستاخانه‌لرده ایشله‌یاتگنلر پاره بېریش آرقه‌لی کونلری و کۉپینچه تونلری هم کان قزیشنی دوام اېتتیرماقده.
