کابلده اقتصادی معمالر‌نینگ کېسکینلشووی آرتیدن حامله‌نی توشیریش حالتلری کۉپه‌یماقده
۸صبح، کابل: اَیریم ساغلیقنی سقلش منبعلری‌نینگ اَیتیشیچه، اقتصادی معمالر و عایله‌لر‌نینگ مالیوی امکانیتی یۉقلیگی کابل شهریده عیاللر‌نینگ حامله‌نی آلدیریش اوچون مراجعت قیلیش حالتلری کۉپه‌ییشیگه سبب بۉلگن.
منبعلر دوشنبه کونی، ۲۷ میزان، ۸صبح گزېته‌سیگه سۉنگگی آیلرده کابلده حامله‌نی آلدیریش اوچون مراجعت قیله‌یاتگن عیاللر سانی آرتگنینی معلوم قیلگن.
ساغلیقنی سقلش منبعلری‌نینگ اَیتیشیچه، فقط بیر هفته ایچیده اوچ نفر عیال حامله‌نی آلدیریش اوچون مراجعت قیلگن. بو عیاللر‌نینگ اَیریملری حتا شفاکار قبولی اوچون تۉلاونی هم عملگه آشیریشگه قُربی یېتمه‌یدی.
اَیتیشلریچه، طالبان تامانیدن حامله‌نی آلدیریشگه نسبتاً جاری اېتیلگن کېسکین چېکلاولر اَیریم عیاللر‌نینگ دولت شفاخانه‌لریگه مراجعت قیلیشدن باش تارتیشیگه سبب بۉلگن.
بو حالت طالبان افغانستاننی اېگه‌للب آلگنیدن سۉنگ مملکت وطنداشلری‌نینگ اقتصادی احوالی ینه‌ده یامانلشیب، قشّاقلیک و ایشسیزلیک آرتگن بیر شرایطده خبر قیلینماقده.
چېکلاولر جاری اېتیلیشی بیلن بیر قطارده، اقتصادی معمالر هم کوچه‌یگن. قیزلر آلتینچی صنفدن یوقاری باسقیچلرده تعلیم آلیشدن محروم اېتیلگن، شونینگدېک، مجبوری نکاحلر، وایه‌گه یېتمه‌گن قیزلر‌نینگ تورموشگه بېریلیشی و اېرته حامله‌دارلیک خوفی باره‌سیده‌گی خواطرلر هم آرتگن.
