گوترش دنیاده کېنگ ترقه‌لگن آچلیک دوام اېته‌یاتگنیدن خواطر بیلدیردی
۸صبح، کابل: بیرلشگن ملتلر تشکیلاتی باش کاتبی آنتونیو گوترش، دنیاده آچلیک دوام اېته‌یاتگنیدن خواطر بیلدیریب، اۉنلب ییللر دوامیده اېریشیلگن ترقیاتگه قره‌مه‌ی، خلق‌ارا آزیق-طعام تیزیمی هنوز جدّی معمالرگه دوچ کېله‌یاتگنینی اَیتدی.
گوترش دوشنبه کونی، ۲۷ میزان، ایکس صحیفه‌سیده یازیشیچه، دنیاده آچلیک درجه‌سی هنوز قبول قیلیب بۉلمه‌یدیگن درجه‌ده یوقاری بۉلیب قالماقده.
گوترش هر بیر انسان آزیق-طعامدن فایده‌لنیش حقوقیگه اېگه اېکنینی تأکیدلب، مملکتلر برچه اوچون ساغلام و یېترلی آزیق-طعام بیلن تأمینلش مقصدیده عملی چاره‌لر کۉریشی کېره‌کلیگینی بیلدیردی.
او قۉشیمچه قیلدی: «کېلینگ، عمومی مجبوریتلریمیزنی عملی حرکتلرگه ایلنتیره‌یلیک همده برچه اوچون برقرار، ساغلام و عدالتلی آزیق-طعام تیزیملرینی تأمینله‌یلیک».
بو آره‌ده، اوّلراق بیرلشگن ملتلر تشکیلاتی حساباتیده افغانستانده آزیق-طعام خوفسیزلیگی بیلن باغلیق معمالر و تۉییب-آوقت‌لنمسلیک حالتلری آرتیب باره‌یاتگنی حقیده خبر بېرگن اېدی.
تشکیلات پنج‌شنبه کونی، ۲۳-مېزان، افغانستانده اۉتکیر تۉییب-آوقت‌لنمسلیک و آچلیک اېنگ یوقاری درجه‌گه یېتگنینی، مملکتده ۱۵،۹ میلیون کیشی اۉتکیر آزیق-طعام تنقیصلیگیگه دوچ کېله‌یاتگنینی معلوم قیلدی.
