منچستر شهریده اۉزبېک تیلی ملی کونی نشانلندی
۸صبح، منچستر: بریتانیا‌نینگ منچستر شهریده اۉزبېک تیلی ملی کونی مدنی دستورلر، شعرخانلیک و خلق قۉشیقلری اجراسی بیلن نشانلندی.
تشکیلاتچیلر دوشنبه کونی، ۲۷ میزان، ۸صبح گزېته‌سیگه بېرگن صحبتیده اوشبو تدبیر اۉزبېک تیلینی اسره‌ب-اوه‌یلش، اۉزبېک خلقی‌نینگ مدنیتی و عنعنه‌لرینی تنیشتیریش مقصدیده تشکیل اېتیلگنینی اَیتدیلر.
تشکیلاتچیلر‌نینگ اَیتیشیچه، اوشبو تدبیرده اۉزبېک تیلیده شعرلر اۉقیلیب، قۉشیقلر اجرا اېتیلدی. معروضه‌چیلر اېسه بو تیلدن فایده‌لنیش کۉلمینی کېنگه‌یتیریش، اونینگ رواجلنیشی و رونق تاپیشی اوچون سعی-حرکتلرنی کوچه‌یتیریش مهم‌لیگینی تأکیدله‌دیلر.
شونینگدېک، فرانسه و سویس‌دن بیر قطار مدنی فعاللر ویدیو آرقه‌لی تدبیرده اشتراک اېتیب، اۉزبېک خلقی‌نینگ تیلی و مدنی میراثینی اسره‌ب-اوه‌یلش مهم‌لیگی حقیده سۉز یوریتدیلر.
تدبیر‌نینگ ینه بیر قِسمیده اۉزبېک خلقی‌نینگ اۉندن آرتیق عنعنوی طعامی و هنرمندچیلیک نمونه‌لری نمایش اېتیلدی.
خلق قۉشیقلری‌نینگ اجرا اېتیلیشی، دایره چه‌لیش همده رمزی مدنی چیقیشلر‌نینگ تشکیل اېتیلیشی هم اوشبو تدبیر دستوریدن ا‌ۉرین آلدی.
