قندهارده آدم اۉغیرلش حالتلری کۉپه‌یماقده؛ عایله‌لر فرزندلری‌نینگ خوفسیزلیگیدن خواطرده
۸صبح، قندهار: محلی منبعلر‌نینگ اَیتیشیچه، قندهار ولایتیده آدم اۉغیرلش حالتلری کۉپه‌یگن. بو اېسه اهالی، اینیقسه، عایله‌لر اۉرته‌سیده فرزندلری‌نینگ خوفسیزلیگی باره‌سیده‌گی خواطرلرنی کوچه‌یتیرگن.
منبعلر چهارشنبه کونی، ۲۹-مېزان، ۸صبح گزېته‌سیگه بېرگن معلوماتیده اَیتیشیچه، اۉغریلیک و باشقه جنایی حادثه‌لر کۉپه‌ییشی بیلن بیر قطارده، آدم اۉغیرلاوچیلر قندهار شهری‌نینگ تورلی حدودلریدن باله‌لر و کتّه‌لرنی اۉغیرلب، اولرنی آزاد قیلیش عوضیگه عایله‌لریدن پول طلب قیلماقده.
منبعلرگه کۉره، بونده‌ی حادثه‌لر‌نینگ کۉپه‌ییشی اهالی‌نینگ کونده‌لیک حیاتیده معمالرنی یوزه‌گه کېلتیرگن. کۉپلب عایله‌لر فرزندلری اۉغیرلب کېتیلیشیدن قۉرقیب، اولر‌نینگ اویدن یالغیز چیقیشیگه رخصت بېرمه‌یپتی.
عینی پیتده قندهارده‌گی طالبان خوفسیزلیک اداره‌لری هم اوشبو ولایتده آدم اۉغیرلش حالتلری کۉپه‌یگنینی تصدیقله‌گن.
قندهارده‌گی طالبان خوفسیزلیک قومندانلیگی میو‌ند اسملی باله‌نی اۉغیرلشده گمان قیلینگن اوچ کیشینی حبسگه آلگنینی معلوم قیلدی. اولر باله‌نی آزاد قیلیش عوضیگه اونینگ عایله‌سیدن پول طلب قیلگن.
منبعلر‌نینگ اَیتیشیچه، افغانستاندهگی اقتصادی معمالر اَیریم آدملرنی جنایی حرکتلر صادر اېتیشگه اونده‌یاتگن عامللردن بیری حسابلنه‌دی.
