بریتانیانینگ مخصوص وکیلی کابلگه سفری دوامیده افغان عیاللرینی قۉللب-قوّتلشگه اورغو بېردی
۸صبح، کابل: بریتانیانینگ افغانستان بۉییچه مخصوص وکیلی ریچارد لیندسی کابلگه سفری دوامیده افغان عیاللری و قیزلرینی، اینیقسه تعلیم و اجتماعی اشتراک ساحه‌سیده قۉللب-قوّتلشگه اورغو بېرگن.
لیندسی‌نینگ پنج‌شنبه کونی، ۳۱- ثور، اعلان قیلینگن بیاناتیده ایتیلیشیچه، او اوشبو سفر دوامیده بیر قطار افغان عیاللری، اهالی جمعیتی وکیللری و طالبان رسمیلری بیلن اوچره‌شیب، مذاکره‌لر آلیب بارگن.
بیاناتگه کۉره، بریتانیانینگ مخصوص وکیلی افغان عیاللری و قیزلری احوالینی یخشیلش همده بو یۉنه‌لیشده‌گی خلق‌ارا یاردملرنی دوام اېتتیریش مهم‌لیگینی تأکیدله‌گن.
او شونینگدېک افغانستان و پاکستان چېگره‌سی‌نینگ یاپیق قالیشی انسانپرورلیک یاردملرینی یېتکزیش جریانیگه سلبی تأثیر کۉرسه‌ته‌یاتگنیدن خواطر بیلدیرگن و بو حالت میلیونلب محتاج انسانلرنینگ شاشیلینچ یاردمگه یېتیب باریشینی خوف آستیگه قۉیه‌یاتگنینی ایتگن.
لیندسی ینه چېگره اۉتیش یۉللرینی قَیته آچیشگه و انسانپرورلیک یاردمینی یېتکزیش اوچون خوفسیز یۉلکلر یره‌تیشگه چقیریب، ضرر کۉرگن آدملرگه یاردم یېتیب باریشی اوچون اۉت آچیشنی تۉخته‌تیش دوام اېتیشی ضرورلیگینی تأکیدله‌گن.
ریچارد لیندسی عیاللرنینگ جمعیت‌نینگ برچه ساحه‌لریده‌گی اشتراکی افغانستان‌نینگ برقرارلیگی و رواجلنیشی اوچون ضرور اېکنینی و اولر اوچون ایش همده تعلیم امکانیتلری یره‌تیلیشی کېره‌کلیگینی ایتگن.
بریتانیانینگ مخصوص وکیلی افغان عیاللری و قیزلری‌نینگ خوفسیزلیگی، فراوانلیگی و جمعیتده‌گی اشتراکینی آشیریش بریتانیانینگ اساسی اوستوار یۉنه‌لیشلریدن بیری بۉلیب قاله‌یاتگنینی قۉشیمچه قیلگن.
