جهان ساغلیقنی سقلش تشکیلاتی: عیال طبیات خادملری عیاللر‌نینگ دوالنیش خدمتلریدن فایده‌لنیشینی آسانلشتیره‌دی
۸صبح، کابل: جهان ساغلیقنی سقلش تشکیلاتی (WHO) اَیتیشیچه، دوالش مرکزلریده عیال طبیات خادملری‌نینگ موجودلیگی عیاللر‌نینگ ساغلیقنی سقلش خدمتلریدن آسانراق فایده‌لنیشیگه امکان یره‌ته‌دی.
اوشبو تشکیلات سه‌شنبه، ۲۸-میزان کونی، خبر بېریشیچه، عیال طبیات خادملریدن فایده‌لنیش امکانیتی اۉزینی ناقوله‌ی حس قیلیش یاکه خواطر سببلی طبیات مرکزلریگه مراجعت قیلیشده ایکّیلنیشی ممکن بۉلگن بېمارلر اوچون علیحده اهمیتگه اېگه.
عیال طبیات خادملری‌نینگ موجودلیگی بېمارلر و ساغلیقنی سقلش خدمتی کۉرسه‌تووچیلری اۉرته‌سیده خوفسیز محیط و ایشانچنی شکللنتیریشگه یاردم بېره‌دی.
جهان ساغلیقنی سقلش تشکیلاتی قۉشیمچه قیلیشیچه، بونده‌ی محیطده عیاللر اۉز تشویشلرینی بیان اېتیش اوچون کۉپراق امکانیتگه اېگه بۉله‌دیلر و ینه‌ده خاطرجمعلیک بیلن دوالنیش خدمتلریدن فایده‌لنیشلری ممکن.
جهان ساغلیقنی سقلش تشکیلاتی‌نینگ افغانستاندهگی وکیلی ادوین سنیزا سالوادور، برچه آدملر یشش جایی یاکه مالیوی امکانیتلریدن قطعی نظر، اختصاص‌لشتیریلگن دوالش خدمتلریدن فایده‌لنیش امکانیتیگه اېگه بۉلیشی مهم‌لیگینی تأکیدله‌دی.
عینی پیتده افغانستان ساغلیقنی سقلش ساحه‌سی سۉنگگی بېش ییل دوامیده طالبان تامانیدن جاری اېتیلگن چېکلاولر آرتیدن جدّی معمالرگه دوچ کېلماقده.
مبلغ یېتیشمسلیگی، انسانپرورلیک یاردمی قیسقریشی، منبعلر چېکلنگنی و عیال طبیات خادملری سانی‌نینگ کمه‌ییشی افغانستان‌نینگ کۉپلب حدودلریده دوالش خدمتلرینی کۉرسه‌تیشنی ینه‌ده قیینلشتیرگن.
