چودری: طالبان پاکستان‌نینگ حربی حرکتلریگه برداش بېره آلمه‌یدی
۸صبح، کابل: پاکستان اوردوسی سۉزلاوچیسی احمد شریف چودری طالبانگه ترورچی گروهلرگه باش‌پناه بېریش و اولرنی قۉللب-قوّتلشنی تۉخته‌تیش حقیده آگاهلنتیریش بېرگن. عکس حالده، اولر آغیر عاقبتلرگه دوچ کېلیشلرینی بیلدیرگن.
چودری یک‌شنبه کونی، ۱۰ عقرب، طالبان پاکستان اولرگه قۉللشی ممکن بۉلگن «جزاگه» برداش بېره آلمسلیگینی اَیتگن.
او پاکستان اۉز امکانیتلرینی سینه‌ب کۉریشگه قره‌تیلگن هر قنده‌ی اورینیشگه، جمله‌دن، درون هجوملریگه قرشی توریشگه تیّار اېکنینی قۉشیمچه قیلگن.
چودری هندوستاننی «تروریزم‌نینگ اېنگ ییریک حامیسی» دېب اته‌ب، طالبان و پاکستانگه قرشی قوراللی گروهلر هندوستان‌نینگ واسطه‌چی کوچلری صفتیده فعالیت یوریته‌یاتگنینی دعوا قیلگن.
اونینگ دعوا قیلیشیچه، ترورچی گروهلر افغانستاندن پاکستانگه کیریب کېلماقده و هجومچیلر آره‌سیده طالبان خادملری هم انیقلنگن.
پاکستان اوردوسی سۉزلاوچیسی، شونینگدېک، افغانستاننی، اونینگ اَیتیشیچه، فقط «تروریزم و مخدره مادّه‌لر» ایشلب چیقره‌دیگن مملکت دېب اته‌گن.
بو آره‌ده طالبان پاکستان‌نینگ افغانستان حدودیدن ترورچی گروهلر فعالیت یوریته‌یاتگنی حقیده‌گی دعوالرینی بیر نېچه بار رد اېتیب، مملکتده‌گی خوفسیزلیک معمالرینی ایچکی معمالر و اسلام‌آباد سیاستی بیلن ایضاحله‌گن.
