یریم کېچه آتیلگن پتاقی‌لر؛ کابل عایله‌لری‌نینگ دهشتی و طالبان‌نینگ بې‌پروالیگی
آدرینا بهزاد
کابل شهری‌نینگ اۉنینچی ناحیه‌سیده یشاوچی اَیریم اهالی پتاقی‌لردن معیاریدن آرتیق فایده‌لنیش و اولر‌نینگ پارتله‌تیلیشی، اینیقسه، تون‌نینگ کېچکی ساعتلریده صادر بۉله‌یاتگنیدن خواطر بیلدیرماقده. اولر‌نینگ اَیتیشیچه، پتاقی‌لر‌نینگ کوچلی پارتلش آوازی عایله‌لر آسایشته‌لیگینی بوزیب، عایله اعضالری، اینیقسه باله‌لر آره‌سیده قۉرقوو و خواطر اویغاتماقده. اهالی‌نینگ تأکیدلشیچه، آدملر تورلی قیینچیلیک و باسیملر بیلن کوره‌شه‌یاتگن بیر پیتده، پتاقی‌لر‌نینگ کېتمه-کېت پارتلش آوازی هم ینگی تشویشگه ایلنیب، اولر‌نینگ تینچلیگی و آسایشته‌لیگینی بوزماقده.
کابل شهری‌نینگ اۉنینچی ناحیه‌سیده یشاوچی عبدالله پتاقی‌لردن فایده‌لنیش و اولر سبب یوزه‌گه کېله‌یاتگن شاوقیندن شکایت قیله‌دی. اونینگ اَیتیشیچه، پېترده‌لر‌نینگ بلند آوازی عایله‌سی‌نینگ کونده‌لیک آسایشته‌لیگی و تونگی اویقوسینی بوزیب، عایله اعضالری آره‌سیده قۉرقوو و خواطر اویغاتگن.
کابل‌نینگ اوشبو اهالیسی شونده‌ی دېیدی: «مېن ایران اوروشیدن اېندی‌گینه افغانستانگه کېلگن اېدیم. بیر کېچه اوخلب یاتگنیمیزده، تۉستدن پتاقی‌‌نینگ جوده کوچلی آوازی اېشیتیلدی. شاشیلیب باله‌لریمنی اویغاتدیم، اوروش باشلندی، دېب اۉیله‌دیم. عایله‌مگه: «بیز ایران اوروشیدن قاچیب کېلگن اېدیک، اېندی بو یېرده هم اوروش باشلندی»، دېدیم. بیر نېچه دقیقه‌دن سۉنگ آواز پتاقی‌دن چیققنینی انگله‌دیم».
عبدالله قۉشیمچه قیله‌دی: «اَیریم عایله‌لرده بېمارلر و کېکسه‌لر بار. پتاقی‌لر‌نینگ بلند آوازی باله‌لر‌نینگ روحیتیگه هم سلبی تأثیر کۉرسه‌ته‌دی. حاضرگی شرایطده هېچ کیم حیاتده‌گی معما و تشویشلردن خالی اېمس. پتاقی‌لردن فایده‌لنیش آدملر اوچون ینه بیر معماگه ایلنیب، عایله‌لر آسایشته‌لیگینی بوزماقده».
کابل شهری‌نینگ اۉنینچی ناحیه‌سیده یشاوچی مریم احمدی‌نینگ اَیتیشیچه، پتاقی‌لردن کېچکی پیت، یریم تونده و تورلی مراسملر وقتیده فایده‌لنیش اَیریملر اوچون کۉنگیلخوشلیک و قووانچنی افاده‌لش واسطه‌سی بۉلسه-ده، اونینگ سلبی عاقبتلرینی اعتبارسیز قالدیریب بۉلمه‌یدی.
کابل‌نینگ اوشبو اهالیسی شونده‌ی دېیدی: «پتاقی‌لر‌نینگ بلند و کوتیلمه‌گن آوازی باله‌لر، کېکسه‌لر، بېمارلر همده تینچلیککه محتاج انسانلرده قۉرقوو و خواطر اویغاتیشی ممکن. بوندن تشقری، پتاقی‌لردن فایده‌لنیش کوییش، کۉز و قۉل جراحتلنیشی، حتا یانغین چیقیشی خوفینی هم کېلتیریب چیقره‌دی. اینیقسه، افغانستانگه اۉخشش، کۉپلب عایله‌لر تورلی معمالر و آغیر حیاتی شرایطلر بیلن کوره‌شه‌یاتگن جمعیتده تونگی ساعتلرده کوچلی شاوقین بیلن آدملر‌نینگ تینچلیگینی بوزیش باشقه‌لر‌نینگ حقوقی و آسایشته‌لیگیگه بېپیسندلیکدیر».
کابل شهری‌نینگ اۉنینچی ناحیه‌سی ینه یشاوچیسی نعمت (مستعار)نینگ اَیتیشیچه، کوندوز کونلری هم ترانسپورت واسطه‌لری‌نینگ آوازی شهرلیکلرنی بېزاوته قیلسه-ده، اساسی معما تونده پتاقی‌لردن فایده‌لنیش و عایله‌لر تینچلیگی‌نینگ بوزیلیشیدیر.
کابل‌نینگ اوشبو اهالیسی شونده‌ی دېیدی: «کېچکی ساعت ۸ دن تانگگی ۳ گچه پتاقی پارتله‌تیشه‌دی. بو حالت باله‌لر آره‌سیده قۉرقوو و خواطر اویغاتماقده. مېنیمچه، بو وضعیت طالبان‌نینگ بې‌پروالیگی عاقبتی دیر. گرچه اۉق آوازلری اېشیتیلمه‌یاتگن بۉلسه-ده، سۉنگگی پیتلرده پتاقی‌لر‌نینگ آوازی کوچه‌یدی، اَیریم حاللرده حتا اۉق آوازیدن هم بلندراق اېشیتیلماقده».
نعمت قۉشیمچه قیله‌دی: «محله آقسقاللری جمعه نمازیدن کېین مسجدده بو مسأله‌نی محاکمه قیلیب، پتاقی‌لردن فایده‌لنیش‌نینگ آلدینی آلیشنی طلب قیلیشدی. بیراق شونگه قره‌مه‌ی، آدملر طالبان‌نینگ بو معمانی حل قیلیشیگه اونچه‌لیک ایشانمه‌یدی و حاضرگچه بو باره‌ده ثمره‌لی چاره کۉریلمه‌گن».
کابل شهری‌نینگ اۉنینچی ناحیه‌سیده یشاوچی کوثر (مستعار)نینگ اَیتیشیچه، سۉنگگی آیلرده قووانچلی مراسملرده پتاقی‌لردن فایده‌لنیش‌نینگ کۉپه‌ییشی اهالی‌نینگ روحی آسایشته‌لیگینی بوزیب، عایله‌لر‌نینگ ناراضیلیگیگه سبب بۉلماقده.
کابل‌نینگ اوشبو اهالیسی قۉشیمچه قیله‌دی: «قووانچلی مراسملرنی اۉتکزیش قاعده‌لریگه رعایه قیلمسلیک و اینیقسه، تون‌نینگ کېچکی ساعتلریده پتاقی‌لردن فایده‌لنیش آدملر، خصوصاً، کېکسه‌لر و بېمارلر‌نینگ بېزاوته‌لنیشیگه سبب بۉله‌دی. طالبان‌نینگ فضیلتنی ترغیب قیلیش و علتلر‌نینگ آلدینی آلیش وزیرلیگی پېترده‌لرنی آلیب کیریش و اولردن فایده‌لنیشنی تقیقله‌گن بۉلسه-ده، بو حادثه‌‌نینگ آلدینی آلیش اوچون جدّی نظارت، اوزلوکسیز و عملی چاره‌لر ضرور».
بو ا‌ۉرینده تأکیدلش جایز که طالبان‌نینگ امر باالمعروف و نهی عن المنکر وزیرلیگی تۉیلر، بیره‌ملر و باشقه قووانچلی مراسملرده پتاقی‌لر همده شونگه اۉخشش واسطه‌لردن فایده‌لنیشنی تقیقله‌گن.
بیرآز آلدین کابل‌نینگ اَیریم اهالیسی ۸صبح گزېته‌سیگه بېرگن صحبتیده، اینیقسه، تونده پتاقی‌لر آوازی طفیلی یوزه‌گه کېله‌دیگن شاوقین افلاسلنیشی سببلی تینچلیکدن محروم بۉله‌یاتگنینی اَیتگن اېدی. اولر پتاقی‌لردن کېنگ کۉلمده و معیاریدن آرتیق فایده‌لنیش حیاتلرینی قیینلشتیره‌یاتگنینی، آدملر‌نینگ شکایتلرینی تینگله‌یدیگن و بو حالت‌نینگ آلدینی آله‌دیگن هېچ قنده‌ی اداره یۉقلیگینی تأکیدلشگن.
