قندهارده طالبان جنگریلری اۉرته‌سیده تۉقنه‌شوو؛ گروه‌نینگ یېتّی کیشی جنگریسی یره‌لندی
۸صبح، قندهار: محلی منبعلر‌نینگ اَیتیشیچه، قندهار شهریده طالبان جنگریلری اۉرته‌سیده یوز بېرگن تۉقنه‌شوو عاقبتیده اوشبو گروه‌نینگ یېتّی کیشی جنگریسی یره‌لنگن.
منبعلر یک‌شنبه کونی، ۱۰ عقرب، ۸صبح گزېته‌سیگه بېرگن صحبتیده، تۉقنه‌شوو شنبه کونی کېچقورون قندهار شهری‌نینگ بیرینچی خوفسیزلیک حدودیگه قره‌شلی مسجد یقینیده صادر بۉلگنینی اَیتیشدی.
منبعلر‌نینگ سۉزلریگه کۉره، تۉقنه‌شوو طالبان‌نینگ قندهارده‌گی خوفسیزلیک قوماندانلیگی ترکیبیده‌گی شهر ترتیبینی سقلش بۉلینمه‌سی جنگریلری موتر آینه‌لریده‌گی قاره‌یتیریلگن پیته‌لرنی آلیب تشله‌ماقچی بۉلگنیده باشلنگن. بیراق هلمند ولایتیدن قندهارگه کېلگن بیر گروه طالبان جنگریلری بو حرکتگه قرشیلیک کۉرسه‌تگن.
منبعلر قۉشیمچه قیلیشیچه، ایکّی تامان اۉرته‌سیده‌گی ماجرا دستلب آغزه‌کی تارتیشوودن باشلنیب، کېینچه‌لیک مشتلشووگه ایلنگن. نتیجه‌ده طالبان‌نینگ یېتّی کیشی جنگریسی یره‌لنگن.
منبعلر‌نینگ اَیتیشیچه، هلمنددن کېلگن طالبان جنگریلری شخصی موترلردن تشقری، بیر نېچه ته رنجر روسوملی موترگه هم اېگه بۉلگن و اولر‌نینگ ایکّیته شخصی موتری‌نینگ آینه‌لری قاره‌یتیریلگن اېدی.
شو بیلن بیرگه، میرویس ولایت کسلخانه‌سیده‌گی بیر منبع اوشبو حادثه‌ده یره‌لنگن یېتّی کیشی مذکور شفاخانه‌گه آلیب کېلینگنینی معلوم قیلدی.
منبع‌نینگ اَیتیشیچه، یره‌لنگنلر‌نینگ اوچ نفری ساغلیغی یخشی، ینه ایکّی نفری‌نینگ احوالی نسبتاً یخشی، قالگن ایکّی نفری‌نینگ احوالی اېسه آغیر.
