هراتده مجبوری نکاح؛ ایکّی بار اۉلیم یاقه‌سیگه کېلگن قیز
س.ع
هراتلیک یاش قیز مریم (مستعار)، عایله‌سی اونی اۉز راضیلیگیسیز اۉزی تورموش قوریشنی ایسته‌مه‌گن اېرکککه نکاحلب قۉیگنینی اَیتماقده. اونینگ سۉزلریگه کۉره، عایله‌سی‌نینگ بو قراریگه قرشی چیققنیدن سۉنگ، او قتّیق کلتکلنگن و اویدن تشقریگه چیقیب-کېلیشی هم چېکلنگن. شونینگدېک، او حاضرگچه ایکّی مرته اۉز جانیگه قصد قیلیشگه اورینگنینی تصدیقله‌یدی. هر ایکّی سفر عایله‌سی اونی کسلخانه‌گه آلیب باریب، حیاتینی سقلب قالگن.
مریم‌نینگ اَیتیشیچه، او کانکور امتحانیده موفقیت قازانیب، هرات بیلیم یورتی‌نینگ ژنالیستیکه فاکولته‌سیگه قبول قیلینگنیدن سۉنگ، عایله‌سی اونگه اۉقیشنی باشلشگه رخصت بېرمه‌گن. او عایله‌سی‌نینگ مناسبتینی قوییده‌گیچه اېسله‌یدی: «ژورنالیزم‌می؟ نیمه اوچون؟ بیز‌نینگ آبرومیزنی آیاق آستی قیلماقچیمیسن؟ اویدن چیقیشگه رخصتینگ یۉق، قیز!» شوندن سۉنگ او بیر انستیتوتگه اۉقیشگه کیریب، نرس‌لیک تعلیمینی باشله‌گن، بیراق اوشبو تعلیم مرکزی یاپیلیشی بیلن بو امکانیت هم یۉققه چیققن.
مریم‌نینگ اَیتیشیچه، عینی شو دورده عایله‌سی‌نینگ اونی تورموشگه بېریش باره‌سیده‌گی باسیمی ینه‌ده کوچه‌یگن. او باشقه بیر ییگیتنی سېوگن، بیراق عایله‌سی اونینگ مالیوی احوالی سببلی بو تنلاوگه قرشی چیققن و اونی باشقه اېرکککه تورموشگه بېریشنی ایسته‌گن.
مریم‌نینگ اَیتیشیچه، ۲۰۲۶-ییل ۶-جون کونی عایله‌سی‌نینگ ایکّی یقین قرینداشی اونینگ آلدیگه کېلیب: «نکاحینگ اوچون وکیلینگ کیم؟» دېب سۉره‌گن. او اۉشه پیتده گپ نیمه‌ده اېکنینی توشونمه‌گن و فقط آته‌سی‌نینگ اسمینی اَیتگن. کېینچه‌لیک نکاحی عیناً شو کونی اۉقیلگنینی بیلگن. اونینگ بۉله‌جک اېری هم نکاح مراسمیده اشتراک اېتمه‌گن.
مریم‌نینگ اَیتیشیچه، او بوندن آلدین هم کۉپ بار بو نکاحگه قرشی اېکنینی بیلدیرگن و عایله‌سیدن هېچ بۉلمه‌گنده بیر مرته اۉزی ایسته‌گن ییگیت بیلن گپلشیشگه رخصت بېریشنی سۉره‌گن، بیراق اونینگ التماسی قبول قیلینمه‌گن.
او شونده‌ی دېیدی: «مېن راضی اېمسدیم! قنچه ییغله‌سم هم، فایده‌سی بۉلمه‌دی. یوره‌گیم باشقه بیر انسان بیلن بۉلسه-ده، مېنی باشقه بیراوگه مجبوری نکاحلشدی. بو خبرنی اېشیتگنیمده، کۉز اۉنگیمده دنیا قارانغولشدی». مریم‌نینگ اَیتیشیچه، نکاحدن کېین هم او اۉز ناراضیلیگینی دوام اېتتیرگن.
مریم‌نینگ اَیتیشیچه، او نکاحلنگن اېرکککه بو تورموشگه چیقیشنی ایسته‌مسلیگینی بیلدیرگنیده، عایله‌سی بوندن خبر تاپیب، اونی کلتکله‌گن. شوندن سۉنگ اونینگ اویدن چیقیب-کېلیشی چېکلنگن، تېلفونی آلیب قۉییلگن و دۉستلری بیلن اوچره‌شیشیگه رخصت بېریلمه‌گن. مریم، شونینگدېک، حتا شفاخانه‌گه باریب، جراحتلنگن قۉلی اوچون فیزیوتراپی معالجه‌سینی آلیشده هم چېکلاولرگه دوچ کېلگنینی دعوا قیلماقده.
مریم‌نینگ اَیتیشیچه، مجبوری نکاح آرتیدن او حتا اۉز جانیگه قصد قیلیشگه قرار قیلگن. اونینگ قۉشیمچه قیلیشیچه، جاری ییل‌نینگ ۶-جولای کونی اۉز جانیگه قصد قیلیشگه اورینگن، بیراق عایله‌سی اونی شفاخانه‌گه آلیب باریب، حیاتینی سقلب قالگن.
اونینگ اَیتیشیچه، اویگه قَیتگنیدن کېین هم زۉرآورلیک و چېکلاولر دوام اېتگن. مریم ینه بیر بار اۉز جانیگه قصد قیلیشگه اورینگنینی اَیته‌دی. اونینگ تأکیدلشیچه، بو واقعه ۱۵ کونلیک چېکلاولردن سۉنگ صادر بۉلگن و ینه اونی شفاخانه‌گه آلیب باریشگه تۉغری کېلگن.
مریم شونده‌ی دېیدی: «کۉزلریمنی آچگنیمده، ینه اۉشه کۉزنی قمشتیرووچی یاروغلیک، ینه دارو هیدی و آدملر‌نینگ قتنه‌ب یوریشیدن چیققن شاوقین اېدی. مېن دهشتلی عصبی شوکنی باشدن کېچیرگن اېدیم، اما هلی هم نفس آله‌یاتگن اېدیم». اونینگ قۉشیمچه قیلیشیچه، عایله‌سی حاضر او «اونه‌شتیروو» دېب اته‌یدیگن مراسمنی اۉتکزیشگه تیّارگرلیک کۉرماقده. بیراق او بو حالتگه راضی اېمس و هنوز تورموش قوریشگه مجبورلنماقده. او بو وضعیتدن قوتولیش اوچون قه‌یېرگه مراجعت قیلیشنی و کیم اونینگ آوازینی اېشیتیشینی بیلمه‌یدی.
بو عیال شونده‌ی دېیدی: «آوازیمنی اېشیته‌دیگن هېچ کیم یۉق. کیمدیر مېنگه «کېل» دېب اَیتیشی اوچون نجات اېشیگی‌نینگ قَیسی بیرینی تقیلله‌تیشنی بیلمه‌یمن».
مریم‌نینگ اَیتیشیچه، اونینگ ایسته‌گی ناراضیلیگی جدّی قبول قیلینیشی و اۉز حیاتی همده کېله‌جگی حقیده زۉرآورلیک و مجبورلشسیز مستقل قرار قبول قیله آلیشیدیر.
