کابل بیلیم یورتی خادملرینینگ کمسیتیشلردن شکایتی؛ «سابق خادملرگه نسبتن حقارت بیلن قرهلشی کېرەکمی»
آدرینا بهزاد
کابل بیلیم یورتینینگ بیر قطار خادملری اوشبو بیلیم یورتی خادملریگه نسبتاً «طالباننینگ ایکّی خیل و کمسیتووچی مناسبتی» دېب اتهیاتگن حالتدن شکایت قیلماقده. اولرنینگ اَیتیشیچه، طالبان سابق حکومت دوریدهگی خادملر بیلن اوشبو گروه حاکمیتگه کېلگنیدن کېین ایشگه آلینگن شخصلر اۉرتهسیده کمسیتیش قیلهدی همده سابق خادملرگه مېنسیمسلیک کۉزی بیلن مناسبتده بۉلهدی. بو خادملرنینگ سۉزلریگه کۉره، ایلگری باشقروو و اوندن یوقاری لوازملرده ایشلهگن اَیریم شخصلر قویی لوازملرگه توشیریلگن، اولرنینگ معاشی و امتیازلری هم کمهیتیریلگن. اولر اَیتیشیچه، شونگه قرهمهی، کېنگ ترقهلگن ایشسیزلیک و اقتصادی معمالر سببلی اۉز ایشلرینی دوام اېتتیریشگه مجبور.
بو خادملر ۸صبح گزېتهسیگه بېرگن صحبتلریده ینه شونی دعوا قیلهدیلر که طالبان بیر نېچه هفته آلدین کابل بیلیم یورتینینگ قریب ۱۱۵ نفر متخصص خادیمینی هم «تنقیص» بهانهسی بیلن لوازمیدن بۉشهتگن.
کابل بیلیم یورتینینگ خادملریدن بیری نعمت (مستعار)، ایلگری سابق حکومت دوریده ایشلهگن و حاضر هم اوشبو بیلیم یورتیده فعالیت یوریتهیاتگن خادملرگه طالباننینگ مناسبتینی تنقید قیلهدی. اونینگ اَیتیشیچه، طالبان بو خادملرگه نسبتاً کمسیتووچی مناسبتده بۉلهدی و اولرگه مېنسیمسلیک بیلن قرهیدی. او شوندهی دېیدی: «طالباننینگ جمهوریت دوری خادملریگه مناسبتی مناسب اېمس. اولر بیزنی خارلیک بیلن کۉرهدی و بیر نېچه بار حقارت همده تحقیرلشگه دچار قیلهدی.»
نعمت قۉشیمچه قیلهدی: «آلدین آمرلیک لوازملریده ایشلهگن اَیریم خادملر حاضر قویی لوازملر و عادی خدمتچیلیککه تعیینلنگن. شونگه قرهمهی، ایشسیزلیک و اقتصادی معمالر سببلی اولر اۉز ایشلرینی دوام اېتتیریشگه مجبور. بوندن تشقری، خادملرگه معاش و امتیازلر تۉلهشده هم فرق موجود بۉلیب، طالبانگه علاقهدار شخصلر کۉپراق امتیازلرگه اېگه.»
کابل بیلیم یورتینینگ استادلریدن بیری هم رفیع (مستعار)، طالباننینگ اوشبو بیلیم یورتی استادلریگه مناسبتیدن خواطر بیلدیرهدی. اونینگ سۉزلریگه کۉره، طالبان جمهوریت دوریدهگی بیر قطار استادلرنی لوازمیدن بۉشهتیب، اولرنینگ اۉرنیگه اۉزیگه معقول بۉلگن شخصلرنی تعیینلهگن. او شوندهی دېیدی: «طالبان اَیریم استادلرنی تنقیص بهانهسی بیلن ایشدن بۉشهتدی و اولرنینگ اۉرنیگه، اینیقسه شریعت و دینی فنلر فاکولتهلریده، اۉزیگه علاقهدار شخصلرنی ایشگه آلدی.»
بو کابل بیلیم یورتینینگ استادی ینه شوندهی دېیدی: «ایشدن بۉشهتیلگنلرنینگ قریب ۹۸ فایزی تجربهلی و متخصص خادملر اېدی. بو شخصلر حاضر قشّاقلیک، ایشسیزلیک و تورموش معمالریگه دوچ کېلماقده همده اولرنینگ کۉپچیلیگی استرس و باشقه روحی معمالرگه چهلینگن.»
کابل بیلیم یورتینینگ سابق استادلریدن بیری احمد (مستعار)، اَیتیشیچه، طالباننینگ تحقیرلاوچی مناسبتی عاقبتیده استعفا بېریشگه مجبور بۉلگن. اونینگ اَیتیشیچه، آغیر اقتصادی شرایطلرگه قرهمهی، طالبان حاکمیتگه کېلگنیدن کېین هم بیر مدت درس بېریشنی دوام اېتتیرگن، بیراق بو وضعیتنی دوام اېتتیریش اونینگ اوچون امکانسیز بۉلگن.
بو سابق استاد شوندهی دېیدی: «مېن بیر نېچه ییل کابل بیلیم یورتیده استاد بۉلدیم. طالبان حاکمیتگه کېلگنیدن کېین هم ایشسیزلیک کېنگهیگنی سببلی ایشیمنی دوام اېتتیردیم، چونکه ماسترلیک دیپلومیگه اېگه بۉلسم-ده، تیریکچیلیکنی تأمینلش اوچون ارابهکشلیک یاکه کۉچه سوداسی بیلن شغللنه آلمهسدیم. اما وقت اۉتیشی بیلن طالباننینگ جمهوریت دوریدن قالگن پروفیسورلرگه مناسبتی کوندهن-کونگه یامانلشیب باردی.» اونینگ اَیتیشیچه، تحقیرلاوچی مناسبت، خدمت امتیازلرینینگ کمهیتیریلیشی و ناقولهی محنت شرایطلری اونگه کتّه روحی باسیم اۉتکزگن.
احمد قۉشیمچه قیلهدی: «طالبان اعضالری بیزگه تحقیرلاوچی مناسبتده بۉلر و امتیازلریمیزنی کمهیتیرردی. تعلیم درجهمگه قرهمهی، کمراق معاش آلهیاتگنیمنی و هر کونی نااۉرین مناسبتلرگه دوچ کېلهیاتگنیمنی کۉرگنیمده، روحی جهتدن جوده قتّیق ضرر کۉرهردیم و بو حالت مېنی کوندهن-کونگه تاباره حالدن تایدیرردی.» اونینگ اَیتیشیچه، آخر-عاقبت عیناً شو شرایطلر سببلی اۉز لوازمیدن استعفا بېرگن. او شوندهی دېیدی: «حاضر ایشسیزلیک و اقتصادی معمالرگه قرهمهی، هېچ بۉلمهگنده بیلیم و تعلیم درجهسی بۉییچه اۉزیمدن پست دېب بیلهدیگن شخصلرنینگ حقارتی و تحقیرینی کۉتریشگه مجبور اېمسمن.»
بو شوندهی بیرحالده دیر که کابل بیلیم یورتینینگ تیل و ادبیات فاکولتهسیدهگی منبعلر بیر مدت اوّل شونی دعوا قیلگن اېدی که طالباننینگ اَیریم عملدارلری و اعضالری درس مشغولاتلریده قتنهشمسهلر هم، اَیریم پروفیسورلر تامانیدن اولرگه حاضر حسابلنهدی و آخر-عاقبت اولر اوشبو فاکولتهنی یوقاری بهالر بیلن تماملهیدی.
بو منبعلرنینگ اَیتیشیچه، ماسترلیک باسقیچیدهگی اَیریم فاکولته پروفیسورلرینینگ طالبان عملدارلری و اعضالری بیلن دوامتنی قید اېتیش همده اولرنی هېچ قندهی شرطسیز موفقیتلی دېب تاپیشده همکارلیک قیلیشی اوشبو فاکولتهدهگی تعلیم و اۉقوو محیطینی کمسیتیش و عدالتسیزلیککه دچار قیلگن.
