فایو: ۱۶۸ مینگ‌دن آرتیق بوغدای اوروغی تۉپلمی‌نینگ ترقه‌تیلیشی دهقانلر‌نینگ حاصلدارلیگینی آشیردی
۸صبح، کابل: بیرلشگن ملتلر تشکیلاتی‌نینگ آزیق-آوقت و اېکینچیلیک تشکیلاتی (فایو) افغانستانده بوغدای یېتیشتیریش اوچون مۉلجللنگن تۉپلملرنی ترقه‌تیش دهقانلر‌نینگ حاصلدارلیگینی ۳۲،۸ فایزگه آشیرگنینی معلوم قیلدی.
اوشبو تشکیلات پنج‌شنبه کونی، ۹-مېزان، آسیا ترقیات بانکی، اروپا اتفاقی، جاپان و بریتانیا حکومتلری همده جهان بانکی‌نینگ مالیوی یاردمیده افغانستانده ۱۶۸ مینگ ۲۰۸ ته بوغدای یېتیشتیریش تۉپلمی ترقه‌تیلگنینی معلوم قیلدی.
تشکیلات‌نینگ قۉشیمچه قیلیشیچه، هر بیر تۉپلم ترکیبیده سره‌لنگن اوروغلیک، اۉغیت و عملی اېکینچیلیک بۉییچه تعلیم بۉلگن.
فایو معلوماتیگه کۉره، بوغدای تۉپلملری ۲۰۲۵–۲۰۲۶-ییللرده‌گی اېکینچیلیک موسمیده ترقه‌تیلگن.
فایو تامانیدن اۉتکزیلگن بهالش شونی کۉرسه‌ته‌دی که اوشبو تۉپلملرنی آلگن دهقانلر بو یاردمنی آلمه‌گن دهقانلرگه نسبتاً ۳۲،۸ فایز کۉپراق حاصل آلگن.
تشکیلات‌نینگ قۉشیمچه قیلیشیچه، ایکّی جریب یېرگه بوغدای اېکه‌دیگن بیر عایله اوچون بو اۉسیش قریب ۰،۳۶ تُن قۉشیمچه بوغدایگه تېنگ بۉلگن. بو مقدار عایله‌‌نینگ ینه ایکّی اعضاسی‌نینگ بیر ییللیک بوغدایگه بۉلگن احتیاجینی تأمینلشی ممکن.
فایو شونینگدېک، اوشبو تۉپلملرنی آلگن دهقانلر آره‌سیده بوغدای سمانی حاصلی ۶،۳ فایزگه آشگنینی معلوم قیلدی. سمان قیشلاق عایله‌لری تامانیدن چاروا اوچون آزوقه صفتیده هم ایشله‌تیله‌دی.
