پاکستان‌نینگ هلمندده‌گی هوا هجوملریده ۱۲ نفر تینچ اهالی اۉلیب و یره‌لندی
۸صبح، کابل: هلمندده‌گی طالبان‌نینگ اخبارات و مدنیت باشقرمه‌سی باشلیغی حافظ عبدالباری راشد هلمندی پاکستان‌نینگ اوشبو ولایتگه اویوشتیرگن هوا هجومی عاقبتیده تۉرت نفر عیال و باله جان بېرگنینی، ینه سکّیز نفر تینچ اهالی یره‌لنگنینی معلوم قیلدی.
هلمندی‌نینگ اَیتیشیچه، اوشبو هجوملر پنج‌شنبه کونی، ۹-مېزان، تانگگی ساعت ۳:۳۰ اطرافیده گرمسیر تومنی‌نینگ صفار حدودیده‌گی اوچ نقطه‌گه اویوشتیریلگن.
اونینگ سۉزلریگه کۉره، اوشبو هجوملرده ایکّی اوی و هییت نمازی اۉقیله‌دیگن بیر جای نشانگه آلینگن.
بو شوندی حالده دیر که پاکستان اخبارات وزیرلیگی اوشبو هجوملر «ایشانچلی معلوماتلر» اساسیده عملگه آشیریلگنینی و نتیجه‌ده ۲۲ نفر «ترورچی» اۉلدیریلگنینی معلوم قیلماقده.
پاکستان‌نینگ اَیتیشیچه، اوشبو مملکت کوچلری «غضب للحق» عملیاتی‌نینگ دوامی صفتیده افغانستاندهگی «فتنه‌الخوارج» و «فتنه‌الهندستان» دېب اته‌لووچی گروهلر‌نینگ ایکّی یشیرین جایی همده اولر‌نینگ طرفدارلرینی هوا هجوملری آرقه‌لی نشانگه آلگن. طالبان اېسه اوشبو هجوملر قربانلری تینچ اهالی بۉلگنینی اَیتماقده.
پاکستان بیر نېچه بار طالباننی قوراللی گروهلرگه باش‌پناه بېریشده عیبله‌گن. بیراق طالبان بو عیبلاونی رد اېتیب، پاکستانده‌گی بې‌قرارلیک اوشبو مملکت‌نینگ ایچکی معماسی اېکنینی اَیتماقده.
