مجبوری کۉچیریش؛ طالبان سرپلده‌گی بیر قیشلاق اهالیسی‌نینگ اویلرینی ویران قیلدی
نیما
سرپل ولایتی‌نینگ سیدآباد تومنیده‌گی سیدآباد عربیه قیشلاغی اهالیسی طالبان اۉتگن کون قریب ۲۰ ته اوینی ویران قیلگنی و اولر‌نینگ یېرلرینی پشتون کۉچمنچیلریگه تاپشیرگنینی اَیتماقده. اهالی‌نینگ تأکیدلشیچه، اولر عرب ملتیگه منسوب بۉلیب، طالبان‌نینگ سرپلده‌گی والیسی اولر‌نینگ یېرلرینی اسحاقزی قومیگه منسوب شخصلرگه تاپشیرگن. عینی پیتده، اوشبو اهالی تامانیدن ۸صبح گزېته‌سیگه یوباریلگن ویدیولرده ماشینلر اولر‌نینگ اویلری و درختلرینی ویران قیله‌یاتگنی عکس اېتگن. اهالی‌نینگ اَیتیشیچه، اولر بو حرکتگه قرشی ناراضیلیک بیلدیرگنیده، طالبان جنگریلری اولرگه قره‌ته اۉق اوزگن. قیشلاق اهالیسی طالباننی ملی کېلیب چیقیشیگه کۉره کمسیتیشده عیبلب، اوشبو گروه اویلرینی ویران قیلیش و یېرلرینی باشقه شخصلرگه تاپشیریش آرقه‌لی اېتنیک تازه‌لش همده حدود‌نینگ اجتماعی و جیوگرافیک ترکیبینی اۉزگرتیریشگه اورینه‌یاتگنینی اَیتماقده.
سرپل ولایتی‌نینگ سیدآباد تومنیده‌گی سیدآباد عربیه قیشلاغی اهالیسی‌نینگ بیر قِسمی اۉتگن کون توشدن کېین ساعت تخمیناً اوچلرده طالبان جنگریلری حربی مو‌ترلرده قیشلاققه کیریب کېلیب، اولر‌نینگ اویلرینی ویران قیلگنینی اَیتماقده. اولر طالباننی ملی کېلیب چیقیشیگه کۉره کمسیتیشده عیبلب، اوشبو گروه جنگریلری اهالی‌نینگ اویلرینی بوزیش چاغیده محلی اهالی بیلن حقارتلی و تحقیرلاوچی مناسبتده بۉلگنینی، عیاللر، باله‌لر و اېرککلرنی حقارتلب، کمسیتگنینی بیلدیرماقده.
محلی اهالی طالبان اولر‌نینگ یېرلرینی اسحاقزی قومیگه منسوب کۉچمنچیلرگه تاپشیرگنی و محلی اهالی‌نینگ اویلرینی ویران قیلگنینی دعوا قیلماقده. اولر‌نینگ اَیتیشیچه، طالبان حاکمیتنی قۉلگه کیریتگنیدن سۉنگ، اسحاقزی قومیگه منسوب پشتونلر اوشبو قیشلاق اۉزلریگه تېگیشلی اېکنینی دعوا قیله باشله‌گن. اهالی‌نینگ قۉشیمچه قیلیشیچه، طالبان ۱۴۰۲-ییلده اوشبو قیشلاق اهالیسی‌نینگ یریمینی مجبوری کۉچیرگن، اۉتگن کون اېسه قالگن اهالیگه هم اویلرینی بۉشه‌تایش حقیده بویروق بېرگن و اولر‌نینگ کۉز اۉنگیده اویلرینی ویران قیلگن.
سیدآباد عربیه قیشلاغی اهالیسی اویلرینی بوزیش و بۉشه‌تایش حقیدگی بویروقنی طالبان‌نینگ سرپلده‌گی والیسی قاری بختیار معاذ چیقرگنینی اَیتماقده. قیشلاق اهالیسی‌نینگ بیلدیریشیچه، یېنگیل و آغیر قوراللر بیلن جهازلنگن ۲۰ نفردن آرتیق طالبان جنگریسی تۉرتته هاموی تانکی بیلن قیشلاققه جایلشگن، سۉنگره تخنیک‌لر یاردمیده اولر‌نینگ اویلرینی ویران قیلیب، قیشلاقنی ترک اېتیش حقیده بویروق بېرگن.
اهالی تأکیدلشیچه، اوشبو تومنده‌گی عرب ملتیگه منسوب کیشیلر ملی کېلیب چیقیشی و جمهوریت توزومینی قۉللب-قوّتله‌گنی سببلی طالبان‌نینگ بونده‌ی مناسبتیگه دوچ کېلماقده. اولر قیش فصلی یقینلشه‌یاتگن بیر پیتده یشش اوچون هېچ قنده‌ی باش‌پناه‌سیز قاله‌یاتگنیدن خواطرده و بونده‌ی شرایطده اۉزلری همده عایله‌لری اوچون قنده‌ی باش‌پناه تاپیشنی بیلمه‌یاتگنینی اَیتماقده.
محلی اهالی‌نینگ دعواسیگه کۉره، قریب ۵۰۰ ته عایله قیشلاقلرینی ترک اېتیشگه مجبور بۉلگن و طالبان تامانیدن آدملر‌نینگ اویلرینی بۉشه‌تیش همده ویران قیلیش جریانی همان شدّت بیلن دوام اېتماقده. اولر‌نینگ تأکیدلشیچه، اویلری بوزیلگن و قیشلاقلرینی ترک اېتیشگه مجبور بۉلگن اَیریم عایله‌لر قرینداشلری همده دۉستلری‌نینگ اویلریگه باش‌پناه تاپگن. اهالی‌نینگ اَیتیشیچه، طالبان اوشبو عایله‌لر‌نینگ برچه اوی-رۉزغار بویوملری و جهازلرینی هم بولدوزر یاردمیده توپراق آستیده قالدیرگن.
محلی اهالی طالبان حتا عیاللر و باله‌لرگه هم رحم قیلمه‌ی، قیش فصلی عرفه‌سیده اولرنی اویلریدن چیقریب یوبارگنی، باش‌پناه‌سیز و سرسان-سرگردان قیلگنینی اَیتماقده. اولر‌نینگ بیلدیریشیچه، طالبان جنگریلری محلی اهالیگه: «خواهله‌گن جایینگیزگه بارینگ؛ بو یېر سیزنیکی اېمس»، دېب اَیتگن.
۸صبح گزېته‌سی باشقه بیر حساباتیده ۲۰۲۲-ییل دسمبر آییده سرپل ولایتی‌نینگ اَیریم اهالیسی سکّیزته قیشلاقده‌گی قریب آلتی مینگ جریب یېر‌نینگ اېگه‌للب آلینیشیگه قرشی ناراضیلیک نمایشی اۉتکزگنینی انیقله‌گن اېدی. اوشبو اهالی‌نینگ اکثریتی اۉزبېک و تاجیک ملتلریگه منسوب بۉلگن. اولر یېر-ملکلری اېگه‌لیک حجتلری عدالتلی تېکشیریلمسدن تارتیب آلینگنینی و ناراضیلیکلریگه جوابه‌ن حربی کوچ ایشله‌تیش بیلن تهدید قیلینگنینی اَیتگن اېدی.
شونینگدېک، ۸صبح گزېته‌سی‌نینگ باشقه بیر حساباتیده طالبان‌نینگ غور ولایتیده‌گی والیسی اوشبو گروه‌نینگ قوملر و قبیله‌لر وزیرلیگی بیلن همکارلیکده دولتیار تومنیده‌گی قریب ۶۰۰ ته عایله‌نی کۉچیریش حقیده بویروق بېرگنی قید اېتیلگن. اوشبو بویروققه کۉره، حدود‌نینگ محلی اهالیسی زودلیک بیلن یشش جایلرینی ترک اېتیشی کېره‌ک بۉلگن. بوندن تشقری، اولرگه مال-ملکلری، اېکینچیلیک محصولاتلری، حتا اویلری‌نینگ اېشیکلری و دېرَزه‌لرینی هم اۉزلری بیلن آلیب کېتیشگه رخصت بېریلمه‌گن و اولر حدودنی قوروق قۉل بیلن ترک اېتیشگه مجبور قیلینگن.
بیرلشگن ملتلر تشکیلاتی‌نینگ افغانستان بۉییچه انسان حقوقلری مسأله‌لری بۉییچه مخصوص معروضه‌چیسی ریچارد بنت، اۉز حساباتلریدن بیریده دایکندی ولایتی‌نینگ بیر نېچه قیشلاغیده قریب مینگ ته عایله یېر-ملکلری و اویلریدن مجبوری چیقریب یوباریلگنینی اَیتگن. حساباتگه کۉره، اوشبو عایله‌لر‌نینگ اَیریملری ملک حقوقلرینی حمایه قیلیش اوچون یېترلی امکانیت بېریلمسدن یشش جایلرینی ترک اېتیشگه مجبور بۉلگن.
بیرلشگن ملتلر تشکیلاتی‌نینگ حساباتیگه کۉره، ۲۰۲۱-ییل سپتمبر آییده دایکندی و ارزگان ولایتلریده‌گی ۱۵ ته قیشلاقده یشاوچی کمیده ایکی مینگ و ۸۰۰ نفر هزاره مجبوری کۉچیریلگن. اوشبو عایله‌لر طالبان رسمیلری‌نینگ بویروغیدن سۉنگ اوی-جایلری و یېرلرینی ترک اېتیشگه مجبور بۉلگن.
خلق‌ارا کېچیریم تشکیلاتی ۲۰۲۵-ییل جولای آییده اعلان قیلگن حساباتیده طالبان یېر نزاعسی آرتیدن بامیان ولایتی‌نینگ پنجاب تومنیده‌گی رشک قیشلاغیده یشاوچی بیر گروه هزاره‌لرنی اۉز اویلریدن مجبوری چیقریب یوبارگنینی بیلدیرگن اېدی. حساباتگه کۉره، جبرلنگن عایله‌لر مناسب باش‌پناه و تاوان پولی آلمسدن اۉز یشش جایلریدن کۉچیریلگن. اوشبو تشکیلات ملک حقوقلری‌نینگ بوزیلیشی، شونینگدېک، مذکور عایله‌لر‌نینگ خوفسیزلیگی و تیریکچیلیک منبعلری خوف آستیده قاله‌یاتگنیدن خواطر بیلدیرگن.
