بورسیه وعدهسیدن خرجتلرنینگ آشیشیگچه؛ یزد بیلیم یورتیدهگی افغانستانلیک طلبهلر نیمه دېییشماقده؟
افغانستانلیک طلبهلرنینگ اَیریملری ایراننینگ یزد بیلیم یورتیده بیلیم یورتی و یاتاقخانه خرجتلری آشگنیدن خواطر بیلدیرماقده. اولر اوشبو بیلیم یورتی بورسیه بېرگن پیتده اولرگه بېرگن وعدهلرینی عملگه آشیرمهگنینی و حاضر تورلی بۉلیملر خرجتلرینی آشیرگنینی اَیتماقده. طلبهلر بو خرجتلرنی اۉقیشلری توگهگونیگه قدَر تۉلهشلری امکانسیزلیگینی تأکیدلب، بو حالت اولرنی اۉقیشنی دوام اېتتیریش بارهسیده جدّی خواطرگه سالگنینی بیلدیرماقده. اوشبو طلبهلرنینگ اَیتیشیچه، اولرنینگ اَیریملری ۵۰ فایزلیک، باشقهلری اېسه ۷۰ فایزلیک بورسیه آلگن. اولر یزد بیلیم یورتیدن افغانستاندهگی اقتصادی شرایط و ایشسیزلیکنی حسابگه آلیشنی، اۉز وعدهلریگه عمل قیلیشنی و بو طلبهلرنینگ اۉقیشنی دوام اېتتیریشدن محروم بۉلیشیگه یۉل قۉیمسلیکنی سۉرهماقده. بو طلبهلر، شونینگدېک، اَیریملری ایران و امریکا اۉرتهسیدهگی اوروش پیتیده بیلیم یورتیلرنینگ توصیهسیگه کۉره افغانستانگه قَیتگنینی، اما حاضر جدّی معمالر و کتّه مقداردهگی جریمهلرگه دوچ کېلهیاتگنینی اَیتماقده. یزد بیلیم یورتی بوندن اوّل طالبان چېکلاولری سببلی تعلیمدن قالگن قیز طلبهلرنی بیلیم یورتی تۉلاویگه ۵۰ فایزلیک چېگیرمه بیلن قبول قیلیشی حقیده خبر بېرگن اېدی؛ اما حاضر بو بارهده بیلیم یورتی وېب-سایتیده ینگی تفصیلاتلر موجود اېمس.
طلبهلردن بیری شوندهی دېیدی: «۱۴۰۲-ییلده بورسیه آرقهلی اوشبو بیلیم یورتیگه کیردیم و حاضر اوچینچی اۉقوو ییلی اۉتیب بارهیاتگن بیر پیتده بیلیم یورتی مسووللری وعدهلرینینگ بجریلمهگنیگه گواه بۉلهیپمیز. بیزگه بورسیه بېریلگن وقتده خرجتلرده اۉزگریش بۉلمسلیگی و خلقارا طلبهلر اوچون هم تۉرت کیشیلیک یاتاقخانه اجرهتیلیشی وعده قیلینگن اېدی؛ اما حاضر بیرینچی درجهلی و تۉرت کیشیلیک یاتاقخانهدن درَک یۉق.»
اوشبو طلبه قۉشیمچه قیلهدی: «بیلیم یورتیده کوندهلیک حیات خرجتلری کوندن-کونگه آشماقده. مېن ۵۰ فایزلیک چېگیرمه بیلن اوشبو بیلیم یورتیگه کیرگنیمده، دستلب هر سمستر بیلیم یورتی تۉلاوی اوچون اتیگی ۲ مینگ ۱۰۰ افغانی، یاتاقخانه اوچون ۲۹۰ افغانی و اوچ محل طعام اوچون کونیگه کۉپی بیلن ۱۰ افغانی تۉلهردیم. اما حاضر مېنگه جوده کتّه خرجتلر یوکلهتیلگن و هر سمستر بیلیم یورتی تۉلاوی اوچون ۹ مینگ افغانی، یاتاقخانه اوچون ۴ مینگ ۵۰۰ افغانی همده اوچ محل طعام اوچون کونیگه ۷۵ افغانی، بعضاً اوندن هم کۉپراق تۉلهشیم کېرهک. طلبه صفتیده بونچه خرجتنی تۉلهش مېن اوچون جوده آغیر.»
طلبهلر بیلیم یورتی تۉلاویگه چېگیرمه بېریلیشی وعده قیلینگنینی، اما حاضر بو چېگیرمهگه رعایه قیلینمهیاتگنی و خرجتلر آشگنینی تأکیدلهماقده. اولر برچه طلبهلر اوچون اۉقیش خرجتلری آشگنینی، اَیریم یۉنهلیشلرده اېسه بو خرجتلر بیر نېچه برابر کۉپهیگنینی اَیتماقده.
اسمینی اوشبو گزارشده کېلتیریشنی ایستهمهگن ینه بیر طلبه شوندهی دېیدی: «بیز اوشبو بیلیم یورتیگه بورسیه و چېگیرمه آرقهلی کېلگن اېدیک. اوّل چېگیرمهنی حسابگه آلیشردی، اما حاضر بو چېگیرمه دېیرلی یۉقالگن. یاتاقخانه اوچون ۳–۴ مینگ افغانی، بیلیم یورتی تۉلاوی اوچون اېسه ۱۴–۱۵ مینگ افغانی تۉلهیهپمن. طعاملنیش خرجتلری هم آشگن.»
اوشبو طلبه ویزه بیلن باغلیق معمالر هم اولر اوچون جدّی اېکنینی، افغانستانگه بارگن و ویزهسینینگ مدتی توگهگن طلبهلر حاضر قَیتیش وقتیده چېگرهده کتّه مقداردهگی جریمهلرگه دوچ کېلهیاتگنینی قۉشیمچه قیلهدی. اونینگ اَیتیشیچه، ایران و امریکا اۉرتهسیدهگی اوروش پیتیده بیلیم یورتی خارجلیک طلبهلرگه وضعیت یخشیلنگچ، اولر اوچون ویزه بېریلیشینی و ایرانگه قَیتیشلری ممکنلیگینی وعده قیلگن.
بو طلبهلر، شونینگدېک، آلدین«شهید آوینی» یاتاقخانهسیده یشهگنلرینی، اولرنینگ اَیتیشیچه، اوشبو یاتاقخانه یخشی شرایط و امکانیتلرگه اېگه بۉلگنینی قۉشیمچه قیلماقده. اما حاضر اولر امکانیتلری جوده چېکلنگن و خانهلری هم یخشی حالتده بۉلمهگن «علمالهدی» یاتاقخانهسیگه کۉچیریلگن. اولر اَیریم خانهلرده سکّیز نفرگچه طلبه یشهیاتگنینی، بوندهی شرایط طلبهنینگ اۉقیشی و تعلیم آلیشی اوچون ماس اېمسلیگینی اَیتماقده.
طلبهلر بیلیم یورتی خرجتلرنینگ آشیشیگه ایراننینگ اقتصادی حالتینی سبب قیلیب کۉرسهتهیاتگنینی اَیتماقده؛ حالبوکه اولر بیلیم یورتینینگ شرطلر اۉزگرمسلیگی حقیدهگی وعدهسیگه اساسلنیب بورسیه آلگن و حاضر آشیریلگن خرجتلرنی تۉلهش امکانیتیگه اېگه اېمس.
شو بیلن بیرگه، یزد بیلیم یورتی یاتاقخانه اجرهتیش شرطلریده طلبهلرنی قبول قیلیش و جایلشتیریشگه عاید تفصیلاتلرنی تۉلیق بیان قیلگن همده یاتاقخانهگه محتاج طلبهلر هر بیر اۉقوو سمسترینینگ باشیده یاتاقخانه اجاره حقینی نقد پولده تۉلهشی شرطلیگینی اعلان قیلگن.
یزد بیلیم یورتی ایراننینگ دولت بیلیم یورتیلریدن بیری بۉلیب، یزد شهریده جایلشگن. اوشبو بیلیم یورتی تورلی علمی و تعلیم یۉنهلیشلری بۉییچه طلبهلرنی قبول قیلهدی و ایرانلیک طلبهلردن تشقری، خلقارا طلبهلرنی هم قبول قیلهدی.
اوشبو بیلیم یورتی بوندن آلدین کانکورده یوقاری اۉرینلرنی اېگهللهگن و تعلیمدن قالگن قیزلرنی ۵۰ فایزگچه چېگیرمه شرطی بیلن، ۱۴۰۲-اۉقوو ییلینینگ بیرینچی یریمیدن باشلب قبول قیلیشینی اعلان قیلگن اېدی.
