هالندده اۉزبېک تیلی ملی کونی مناسبتی بیلن طنطنه‌لی تدبیر بۉلیب اۉتدی
۸صبح، کابل: هالند‌نینگ آرنهیم شهریده «اۉزبېک تیلی ملی کونی» مناسبتی بیلن طنطنه‌لی تدبیر بۉلیب اۉتدی.
اوشبو مراسم ۱۷-اکتوبر، شنبه کونی «بیرلیک یۉلی» سیاسی-اجتماعی حرکتی تشبثی بیلن تشکیل اېتیلدی.
تدبیرده بیر قطار سیاستچیلر، مدنی و اجتماعی فعاللر، بیلیم یورتی اۉقیتووچیلری، سابق حربیلر همده انسان حقوقلری تشکیلاتلری وکیللری اشتراک اېتدیلر.
مراسمده سۉزگه چیققنلر تورک-اۉزبېک تیلی، ادبیاتی و مدنیتی‌نینگ اهمیتی، تاریخی شخصلر‌نینگ مدنیت و تمدن رواجیده‌گی اۉرنی، شونینگدېک، سۉنگگی ایکّی عصردن آرتیق وقت دوامیده اۉزبېک تیلی و مدنیتی دوچ کېلگن معمالر حقیده سۉز یوریتدیلر.
شونینگدېک، بیر قطار سیاسی، مدنی و علمی سیمالر، جمله‌دن، پروفیسور بسم الله توردیقل میمنگی همده سابق ترانسپورت وزیری دوکتور داوود علی نجفی تیل و مدنی میراثنی اسره‌ب-اوه‌یلش همده اونی کېله‌جک اولادلرگه یېتکزیش مهم‌لیگینی تأکیدله‌دیلر.
استاذ خال محمد شوجۉ‌نینگ «آلاو قعریده توغیلیش» ناملی خاطره‌لر کتابی‌نینگ تقدیماتی، ملی موسیقه اجراسی، شعرلر اۉقیلیشی همده استاذ عبدالحکیم کریمزاده‌‌نینگ خطاطلیک و گۉزل یازوو صنعتی اثرلری کۉرگزمه‌سی تدبیر‌نینگ باشقه قِسملریدن بۉلدی.
تدبیر یکونیده «بیرلیک یۉلی» حرکتی یریم عصردن آرتیق علمی فعالیتی و کوره‌ش آلیب بارگنی اوچون پروفیسور توردیقل میمنگی، انجنیر محمد صالح اکبری و استاد نوروز علی حمیدیگه فخری یارلیقلر تاپشیریب، اولرنی تقدیرله‌دی.
