قاره حجابدن نقابگچه؛ طالباننینگ غزنیده بیرینچیدن آلتینچی صنفگچه بۉلگن قیزلرگه قرشی ینگی تقیقی
۸صبح، غزنی
اَیریم عیال اۉقیتووچیلر و بیرینچی صنفدن آلتینچی صنفگچه بۉلگن اۉقووچی قیزلر طالبان اولرگه «قاره حجاب» کییش، قاره نقاب تقیش، قاره قۉلقاپ و قاره کۉزعینکدن فایدهلنیش حقیده آگاهلنتیرگنینی اَیتماقده. اولرنینگ اَیتیشیچه، بو بویروق بالهلرنینگ مکتبگه کیریشی اوچون قۉییلگن دستلبکی شرطلردن بیری بۉلیب، طالباننینگ بو حکمیگه عمل قیلمهگنلر اوشبو گروهنینگ امر باالمعروف و نهی عن المنکر محتسبلری تامانیدن جزالنهدی. باشقه تاماندن، غزنی اهالیسینینگ اَیریملری طالبان طلب قیلهیاتگن بو کییملرنی ساتیب آلیشگه قُربی یېتمسلیگینی اَیتماقده.
غزنی اهالیسی طالبان تامانیدن قیز بالهلرگه نسبتاً یقینده جاری اېتیلگن چېکلاولرنی اسلامی قدریتلر و خلق مدنیتیگه ضد دېب حسابلهیدی همده بو حالت بالهلرنینگ هم بوندن کېین مکتبگه بارمسلیگیگه سبب بۉلیشینی تأکیدلهماقده. اولر طالبان بالهلر اوچون مکتبلرنی هم یاپیشگه بهانه ایزلهیاتگنینی قۉشیمچه قیلماقده.
رخسار (مستعار)، غزنی شهریدهگی مکتبلردن بیریده درس بېرهدی. او بو چېکلاو قندهی جاری اېتیلگنی حقیده شوندهی دېیدی: «ایکّی کون کېتمه-کېت طالباننینگ امر باالمعروف و نهی عن المنکر خادملری مکتبگه کېلیب، برچه صنفلرنی علیحده کۉزدن کېچیریشدی. اولر مکتب مدیری و باشقه استاذلر بیلن بۉلگن ییغیلیشده جوده جدّی طرزده آگاهلنتیریب، بوندن کېین مکتبگه تۉلیق قاره حجابده، فقط کۉزلر کۉرینهدیگن نقابده و قاره قۉلقاپده کېلیشیمیز، مکتبگه قتنهب یوریش وقتیده اېسه قاره کۉزعینک تقیشیمیز کېرهکلیگینی اَیتیشدی.»
بو اۉقیتووچی قۉشیمچه قیلهدی: «برچه استاذلر و اۉقووچیلرگه، حتا بیرینچی صنف اۉقووچیلریگه هم خودّی شو بویروق بېریلدی. اولر اگر ینه نظارت اوچون کېلگنیمیزده کیمدیر بیزنینگ بویروغیمیزگه عمل قیلمهگن بۉلسه، ایشدن بۉشهتیلیشی و هَیدهلیشینی اَیتیشدی.»
غزنی شهری چېکّهسیدهگی البیرونی قیزلر مکتبینینگ اۉقووچیلریدن بیری زهرا، صنفیدهگی محیط جوده قۉرقینچلی بۉلیب قالگنینی و درسخانهگه کیرگنیده غلطی محیطگه دوچ کېلگنینی اَیتماقده.
بو اۉقووچی شوندهی دېیدی: «بوگون صنفگه کیرگنیمده قۉرقیب کېتدیم. بیر نېچه صنفداشیمنینگ فقط کۉزلری کۉرینیب تورردی و مېن اولرنینگ هېچ بیرینی تنیمهدیم، تاکه هر بیری بیر مرتهدن یوزینی بیزگه کۉرسهتمهگونچه.»
شو بیلن بیرگه، بو اۉقووچینینگ اسمینی حساباتده تیلگه آلیشنی ایستهمهگن آتهسی ۸صبح گزېتهسیگه بېرگن صحبتیده قیزی اوچون ینگی و طالباننینگ امر باالمعروف و نهی عن المنکر محتسبلری طلب قیلهیاتگن مکتب کییمینی ساتیب آلیشگه قُربی یېتمسلیگینی، شو سببلی قیزینینگ مکتبگه باریشینی تقیقلشگه مجبور بۉلیشینی اَیتماقده.
زهرانینگ آتهسی شوندهی دېیدی: «حاضرنینگ اۉزیده هم بو قیزلر کییب یورهدیگن مکتب کییملری بوتونلهی اسلامی و شرعی دیر. بولر هلی بالهلر-کو؛ حتا کتّه یاشدهگیلر اوچون هم یوزنی یاپیش واجب اېمس، قالهوېرسه بو بالهلر اوچون. مېن اۉزیم ایشسیزمن و قیزلریم اوچون شونچه کییم، قۉلقاپ و نقاب ساتیب آلیشگه امکانیم یۉق. اگر اولرگه باسیم اۉتکزیلسه، مېنینگ ایکّی قیزیم بار و اولرنینگ مکتبگه باریشیگه تۉسقینلیک قیلیشگه مجبور بۉلهمن.»
بو حالت طالبان حاکمیتنی قَیته اېگهللهگنیدن سۉنگ اوشبو گروه فقرالرگه، خصوصاً، عیاللر و قیزلرگه نسبتاً قطعی چېکلاولر جاری اېتگنی بیر پیتگه تۉغری کېلماقده. حاضرده آلتینچی صنفدن یوقاری بۉلگن قیزلر مکتبلری، بیلیم یورتیلر و تعلیم مرکزلرینینگ اېشیکلری قیزلر اوچون یاپیق، عیاللرنینگ دولت ادارهلری و مؤسسهلریده ایشلشی هم تقیقلنگن.
