ملا حافظ؛ قندهی قیلیب بیر تکسی هیداوچیسی طالباننینگ والیسی بۉلدی؟
۸صبح
در ای اوشبو گزارشده فراهدهگی طالبان والیسی ملا حافظنینگ حیاتی حقیده سۉز یوریتیلهدی. گزارش نتیجهلری اونینگ مکتبدن قاچووچی یاش و بدخشانده تکسی هیداوچیسی بۉلگن شخصدن قندهی قیلیب طالباننینگ قوماندانلریدن بیریگه، کېینچهلیک اېسه اوشبو گروهنینگ یوقاری لوازملی عملداریگه ایلنگنینی کۉرسهتهدی. محلی اهالینینگ حکایهلری و اونگه یقین منبعلر اونینگ کېسکین اۉتمیشی، ناتۉغری خطی-حرکتلری، طالبان اوروشلریدهگی رۉلی و حربی علاقهلری حقیده معلومات بېرهدی. منبعلر، شونینگدېک، ملا حافظنی «بچهبازلیک»، بیر نېچه «سقالسیز بالهلر»نی سقلش و قمار اۉینهشده عیبلهیدی.
«ملا حافظ» نامی بیلن تانیلگن محمد حافظ، محمد اسحاقنینگ اۉغلی و بدخشاندهگی طالبان اعضالریدن بیری دیر. خبرلرگه کۉره، او ۱۳۵۸-ییلده بدخشان ولایتینینگ وردوج تومنیده توغیلگن. اونینگ آنهسی ناقللردن بۉلیب، الکوزی پشتونلریدن، آتهسی اېسه بدخشانلیک تاجیک دیر.
ملا حافظ بالهلیک و اۉسمیرلیک دورینی بدخشان ولایتینینگ بهارک تومنی مرکزیده اۉتکزگن و اوشبو تومندهگی بهارستان لیسهسیده ۱۱-صنفگچه باشلنغیچ و اۉرته تعلیم آلگن. او ۱۳۸۸-ییلده مکتبنی ترک اېتگن.
اونینگ مکتبدهگی اَیریم صنفداشلری حافظ اۉقیتووچیلری و اطرافیدهگی آدملر بیلن ناتۉغری مناسبتده بۉلگنینی اَیتهدی. اولرنینگ سۉزلریگه کۉره، او مکتب دېوارلرینی تېشیب، اۉقیتووچی کېلگنیده درس وقتیده کلکیندن قاچیب کېتر و صنفده قتنهشمس اېدی. اولر حافظ وقتینینگ کۉپ قِسمینی اۉیین اۉینهش و قۉشیق اَیتیش بیلن اۉتکزگنینی قۉشیمچه قیلهدی. اولرنینگ اَیتیشیچه، بوندهی خطی-حرکتلر اونینگ مکتبنی تماملهمسلیگی و تعلیمدن قالیب کېتیشیگه سبب بۉلگن.
عایله و اجتماعی شرایط
محلی اهالینینگ حکایهلریگه کۉره، ملا حافظنینگ آتهسی محمد اسحاق کمبغل بۉلگن و تیریکچیلیک خرجتلرینی تأمینلش اوچون بهارک بازاریده کیچیک دوکان یوریتگن. او توت، تلخان و بنجاره ساتیب، عایلهسینی باقگن. ملا حافظنینگ ایکّی اکهسی یاکه اوکهسی بار و اولرنینگ عایلهسی آغیر اقتصادی شرایطده یشهگن. او بیلن تنیش شخصلردن بیرینینگ اَیتیشیچه، انه شو آغیر حیات شرایطی و امکانیتلرنینگ یۉقلیگی اونینگ طالبانگه قۉشیلیشینینگ عامللریدن بیری بۉلگن.
طالبان صفیگه قۉشیلیشی و حربی فعالیتینینگ باشلنیشی
ملا حافظ کۉپ ییللیک ایشسیزلیک و ناانیقلیکدن سۉنگ، حتا پولیس صفیگه قۉشیلیشگه هم اورینیب کۉرگن، بیراق بونگه اېریشه آلمهگن. او بیر مدت بهارک – فیضآباد یۉنهلیشیده تکسی هیداوچیسی بۉلیب ایشلهگن. ۲۰۱۱-ییلده وردوج تومنیده طالبان صفیگه قۉشیلیشگه قرار قیلگن. او اۉشه پیتده فیضآبادنینگ یوقاری حدودلری تومنلریدهگی، «تنگ باله» نامی بیلن تنیلگن طالبان جبههلری مسوولی بۉلگن فصیح الدین فطرت بیلن بیرگه حربی فعالیت آلیب بارگن. ملا حافظ سابق حکومت کوچلریگه قرشی طالباننینگ تورلی جنگلریده قتنهشگن و قۉلی همده بېلیدن بیر نېچه بار یرهلنگن.
اونینگ قوماندانلیگی آستیدهگی گروه سابق حکومت خوفسیزلیک کوچلری هجوملریگه بیر نېچه بار نشان بۉلگن و اونینگ بیر قنچه جنگچیلری اۉلدیریلگن؛ بیراق او ینه ینگی گروه توزیب، بدخشاننینگ تورلی تومنلریده سابق حکومت حربی کوچلریگه قرشی جنگ قیلیشنی دوام اېتتیرگن. اَیتیلیشیچه، اوروشدهگی جراحتلر طفیلی اونینگ تنهسینینگ قریب یریمی شکستلنگن و او حاضر هم تنهسینینگ اَیریم قِسملریدهگی آغریقلردن اذیت چېکماقده.
طالبان حاکمیتنی اېگهلهگندن کېین ملا حافظنینگ موقعی
طالبان بدهخشاننی اېگهلهگچ، ملا حافظ دولت ملکلرینی تالان-تاراج قیلیش بیلن شغللنگن و دولتنینگ اَیریم جهازلری همده واسطهلرینی بهارک تومنیدهگی شخصی اوییگه آلیب کېتگن. طالباندهگی اونگه یقین شخصلردن بیرینینگ اَیتیشیچه، دولت ملکی و موسسهلر جهازلری کۉچیریلهیاتگن پیتده ملا حافظ آدملری فیضآباد شهریده قاری فصیح الدین کوچلری بیلن تۉقنهشگن و ایکّی تاماندن بیر نېچه کیشی یرهلنگن.
ولایتلر تۉلیق طالبان قۉلیگه اۉتگچ، ملا حافظ خارجی موسسهلر ایشلری رهبری اېتیب تعیینلنگن و بو لوازمده قریب بیر ییل ایشلهگن. بیر ییلدن سۉنگ او طالباننینگ بدخشاندهگی ۲۰۱۹ عمرثالث فرقهسی قوماندانی اېتیب تعیینلنگن و بو لوازمده قریب ایکّی ییل قالگن. او ۱۴۰۳-ییلده طالبان رهبری هیبتاللهنینگ فرمانی بیلن فراه حاکمی اېتیب تعیینلنگن و حاضرگچه اوشبو لوازمده فعالیت یوریتماقده.
ملا حافظنینگ شخصی حیاتی
اونگه یقین شخصلرنینگ اَیتیشیچه، ملا حافظنینگ شخصی خصوصیتلریدن بیری بیر نېچه ته عایله قوریشگه قیزیقمسلیگی دیر. بونینگ سببینی اولر ناساغلام خطی-حرکتلر و اَیریم ناتۉغری عادتلر بیلن باغلهیدی. او قمار اۉینهشی و اخلاقسیز خطی-حرکتلری سبب اطرافیدهگیلر آرهسیده یامان خُلقلی و ناتۉغری اخلاققه اېگه شخص صفتیده تنیلگن.
اونگه یقین منبعلر حافظنینگ اۉتمیشدن بېری ناتۉغری و اخلاقسیز خطی-حرکتلرگه اېگه بۉلگنینی اَیتهدی. حاضرده اونینگ بیر نېچه «سقالسیز بالهلری» بارلیگی و اولرنینگ اَیریملری اونینگ شخصی قۉریقچیلری صفتیده فعالیت یوریتهیاتگنی اَیتیلهدی.
منبعلرگه کۉره، او کانلرنی تالان-تاراج قیلیشده بېواسطه اشتراک اېتمسه-ده، اوندن آلینهدیگن درآمددن اولوش آلهدی. شونینگدېک، اونینگ اوکهسی قاری باسط بدخشاندهگی ۲۱۹-فرقه دفتر باشلیغی بۉلیب، بو طالبان توزیلمهسیدهگی عایلهوی علاقهلرنینگ کېنگلیگینی کۉرسهتهدی.
حافظ کلان حدودی قولهگنیدن سۉنگ، او یېردهگی آلتی حویلیدن عبارت ملکنینگ بیر قِسمینی ۱۰۰ لکه افغانیگه ساتیب آلیب، ترمیملهگن. او کورهش اۉیینلری و تورلی خیل ییرتقیچ قوشلرنی باقیشگه قیزیقهدی. بو قوشلرنی بهارک حمّامیده اونینگ اوکهسی محمد یاسین باقهدی.
اجتماعی و سیاسی خطی-حرکتلری
ملا حافظ بدخشانگه سفرلری دوامیده بو ولایتگه ۵۰ دن آرتیق قوراللی موترلر بیلن بارهدی و کتّه حربی کوچگه اېگه. او مولوی محبوب خستکی بیلن ازلی عداوتگه اېگه بۉلیب، سابق حکومتگه قرشی اوروش پیتیده محلی منبعلر اونی اوشبو حدوددهگی بیر قنچه آدملر و یاشلرنینگ اۉلیمیگه مسوول دېب بیلگن.
اَیریم خبرلرده اونینگ قاری فصیح الدین بیلن رقابتی هم آچیب بېریلهدی. آنهسی تامانیدن پشتون ملتیگه منسوب بۉلگنی سببلی، طالبان بدخشانده اونی ینهده کوچهیتیریشگه حرکت قیلهیاتگنی، شو آرقهلی اوشبو ولایتده اۉزینینگ اېتنیک موقعی و حکمرانلیگینی سقلب قالماقچی اېکنی اَیتیلهدی. اوّلراق اونینگ قاری فصیح الدین اۉرنیگه طالبان اوردوسی باشلیغی اېتیب تعیینلنیشی ممکنلیگی حقیده هم خبرلر ترقهلگن اېدی، بیراق اَیتیلیشیچه، بدخشاندهگی حاضرگی وضعیت سبب بو مساله کېچیکتیریلگن.
