کابلده آنلاین سودا قیلووچی ۱۰ عیالنینگ حبسگه آلینیشی؛ ساتووچیلر ایش کېلهجگیدن خواطرده
شهرزاد
کابل غربی حدودیدهگی منبعلر طالبان اۉتگن هفته کمیده ۱۰ نفر آنلاین سودا بیلن شغللنووچی عیالنی حبسگه آلگنینی اَیتماقده. منبعلرگه کۉره، بو عیاللر اۉتگن هفتهنینگ چهارشنبه کونی ایش فعالیتلرینی دوام اېتتیریش اوچون کابل غربی حدودیدهگی تورر جایلردن بیریده تۉپلنگن پیتده حبسگه آلینگن. حاضرگچه بو عیاللرنینگ حبسگه آلینیشی و آزاد قیلینیشی حقیده قۉشیمچه تفصیلاتلر اعلان قیلینمهگن.
غربی کابلنینگ اَیریم اهالیسی طالبان تامانیدن تیزیملی باسیملر کوچهییب بارهیاتگنیدن خواطر بیلدیریب، بو عیاللر هېچ قندهی سیاسی یاکه فقرالیک فعالیتینی عملگه آشیرمهگن حالده حبسگه آلینگنینی اَیتماقده. اولرنینگ سۉزلریگه کۉره، بو عیاللر تجارت فعالیتلرینی عملگه آشیریش اوچون تۉپلنگن اېدی، بیراق طالبان کوچلرینینگ باستیریب کیریشیگه دوچ کېلگن و حاضرگچه اولرنینگ احوالی حقیده معلومات یۉق.
علی (مستعار)، محلی اهالی وکیلی، طالبان کوچلری بو اویگه کیریب، او یېرده بۉلگن قیزلرنی اۉزلری بیلن آلیب کېتگنینی اَیتهدی. اونینگ قۉشیمچه قیلیشیچه، محله اهالیسی بو عیاللرنینگ نیمه سببدن حبسگه آلینگنیدن بېخبر.
غربی کابل اهالیسی وکیلی شوندهی دېیدی: «طالبان اۉشه جایگه کیریب، قیزلرنی آلیب کېتدی. بیز بونینگ سببی نیمه بۉلگنینی و نېگه اولرنی حبسگه آلیشگنینی بیلمهیمیز.»
بو حبسگه آلیش بیر قطار آنلاین سودا بیلن شغللنووچی عیاللرنینگ هم خواطرینی آشیرگن. اولردن اَیریملری همکسبلری حبسگه آلینگنی حقیدهگی خبرنی اېشیتگچ، اۉز خوفسیزلیگیدن خواطرگه توشیب، ایش فعالیتلرینی بیر مدت تۉختهتگنینی اَیتماقده.
آنلاین سودا ساحهسیده فعالیت یوریتووچی عیاللردن بیری کبرا (مستعار)، بو عیاللر حبسگه آلینگنی حقیدهگی خبرنی اېشیتگچ، آنلاین دوکانینی بیر نېچه کونگه یاپگنینی اَیتهدی. اونینگ قۉشیمچه قیلیشیچه، بو واقعه روحی حالتیگه تأثیر قیلگن و فعالیتینی دوام اېتتیریش بارهسیده خواطرگه توشیشیگه سبب بۉلگن.
بو آنلاین سوداگر عیال شوندهی دېیدی: «بو خبرنی اېشیتگنیمدن کېین دوکانیمنی بیر نېچه کونگه یاپدیم، چونکه روحی حالتیم یامانلشدی و ایشنی دوام اېتتیریشدن قۉرقدیم.»
آنلاین سودانی عایلهلرینینگ خرجتلرینی تامینلشنینگ یگانه یۉلی دېب بیلهدیگن ینه بیر قطار عیاللر و قیزلر بو عیاللرنینگ حبسگه آلینگنیدن خواطر بیلدیریب، بو حالت دوام اېتیشی عیاللرنینگ ایشلش و درآمد تاپیش بارهسیدهگی سۉنگگی امیدلرینی هم یۉققه چیقریشینی اَیتماقده.
آنلاین سوداگرلردن بیری زلیخا، (مستعار) آنلاین سودا آرقهلی عایلهسینینگ یشهش خرجتلری همده کسل آتهسینینگ دوالنیش خرجتلرینینگ بیر قِسمینی تأمینلشینی اَیتهدی. اونینگ قۉشیمچه قیلیشیچه، حاضرگی شرایطده آنلاین سودا بیلن شغللنیش عایلهسینینگ احتیاجلرینی تأمینلش اوچون اونینگ یگانه امیدیدیر.
بو آنلاین سوداگر عیال شوندهی دېیدی: «آنلاین سودا آرقهلی عایلهمنینگ رۉزغار خرجتلری و کسل آتهمنینگ دوالنیش پولینی تۉلهیمن. مېنینگ یگانه امیدیم شو آنلاین سودا ایشیمدیر. اگر ایشلهی آلمسم، عایلهم خرجتلرینی قندهی تأمینلشیمنی بیلمهیمن.»
بو عیاللر تلیبهن تامانیدن عیاللرنینگ محنت قیلیشی و اقتصادی فعالیت یوریتیشیگه کېنگ کۉلملی چېکلاولر جاری اېتگنیدن سۉنگ، افغانستانده بیر قطار عیاللر یشهش خرجتلرینی تأمینلش اوچون آنلاین فعالیت و اجتماعی ترماقلر آرقهلی سودا قیلیشگه اۉتگنی بیر پیتده حبسگه آلینگن.
شو بیلن بیرگه، سۉنگگی کونلرده منبعلر کابلنینگ اَیریم حدودلریده، خصوصاً، تایمنی حدودیده طالبان محتسبلرینینگ عیاللرنی حبسگه آلهیاتگنیدن خواطر بیلدیرگن. اولرنینگ اَیتیشیچه، تلیبهن محتسبلری تامانیدن عیاللرگه نسبتاً تعقیب و تضییق اوّلگیگه قرهگنده کوچهیگن همده احتیاجلرینی تأمینلش اوچون اویدن چیقهیاتگن عیاللر حبسگه آلینیب، قماققه تشلنماقده.
