اسلام‌آباد طالبان‌گه آگاهلنتیریش بېردی: افغانستان حدودی پاکستان‌گه قرشی ایشلتیلمسین
۸صبح، کابل: شمالی وزیرستان‌ده صادر بۉلگن هجوم‌ده تۉرت نفر پاکستانلیک عسکر هلاک بۉلگچ، پاکستان تشقی ایشلر وزیرلیگی طالبان‌گه دیپلماتیک یادداشت تاپشیریب و افغانستان طالبانی نینگ تی‌تی‌پی گروهینی قۉللب-قوتله‌یاتگنی یوزه‌سیدن خواطر بیلدیردی.
پاکستان تشقی ایشلر وزیرلیگی نینگ مطبوعات کاتبی، طاهر حسین اندرابی، ۲۸- قوس، جمعه کونی، طالبان نینگ پاکستان‌ده‌گی اېلچیخانه‌سی معاونی چقیرتیریلگنینی و افغانستان حدودی پاکستان‌گه قرشی هجوم‌لر اوچون ایشلتیلمسلیگی حقیده آگاهلنتیریلگنینی معلوم قیلدی.
پاکستان اوشبو هجوم‌لرنی عمل‌گه آشیرگن شخص‌لر و اولرنی قۉللب-قوتلگن تامانلرگه نسبتاً تۉلیق تېرگاو اۉتکزیش همده زودلیک بیلن چاره‌لر کۉریشنی طلب قیلدی.
پاکستان اوردوسی هم هجوم عاقبتیده تۉرت نفر عسکر هلاک بۉلگنی و ۱۵ نفر تینچ اهالی وکیلی جراحت آلگنینی بیلدیردی.
اوردو بیاناتیده هجوم افغانستانده جایلشگن ترورچیلر تامانیدن رېجه‌لشتیریلگنی قید اېتیلیب، ایریم گروه‌لر افغانستان حدودیدن پاکستان‌گه قرشی عملیاتلر آلیب باره‌یاتگنینی ینه بیر بار کۉرسه‌تگنی تأکیدلنگن.
پاکستان اۉزحاکمیتینی حمایه قیلیش و فقرالرینی اسره‌ش حقوقینی سقلب قالیشینی بیلدیریب، افغانستان حدودیدن تروریسم اوچون فایده‌لنیش دوام اېتسه، ضرور چاره‌لر کۉریلیشینی آگاهلنتیردی.
