کابل اهالیسی: شاوقین افلاسلنیشی آدملرنینگ آسایشتهلیگی و اویقوسینی بوزماقده
آدرینا بهزاد
کابل شهرینینگ اَیریم اهالیسی شهرده شاوقین افلاسلنیشینینگ آرتیب بارهیاتگنیدن خواطر بیلدیرماقده. اولرنینگ اَیتیشیچه، شهرنینگ تورلی حدودلریده بلند و بېزاوته قیلووچی تاووشلر کۉپهییب، حتا اوی شرایطیده هم آدملرنینگ آسایشتهلیگینی بوزماقده. بو اهالینینگ سۉزلریگه کۉره، اَیریم حدودلرده ساتووچیلرنینگ کرنَیلریدن چیقهیاتگن بلند آوازلر تانگنینگ دستلبکی ساعتلریدناق اېشیتیلیب، اولرنی اویقودن اویغاتهدی. شونینگدېک، اولر اَیریم تونلرده پتاقیلر آوازی کېچگچه دوام اېتیشینی و اوروشدهگی پارتلشلر آوازینی اېسلهتگنی سببلی آدملرده قۉرقوو همده اویقو بوزیلیشیگه آلیب کېلهیاتگنینی اَیتماقده؛ بعضاً پتاقیلر آوازی تونگی ساعت ایکّی-اوچلرده هم اېشیتیلهدی.
کابلنینگ سرای شمالی حدودی اهالیسی زهرا (مستعار)، شهردهگی شاوقین افلاسلنیشی کوندن-کونگه کوچهییب بارهیاتگنینی و بو حالت یاقیمسیز تاووشلر پیدا بۉلیشی بیلن آدملرنینگ آسایشتهلیگینی بوزهیاتگنینی اَیتهدی.
بو کابل اهالیسی شوندهی دېیدی: «اینیقسه، ارابهکشلر اۉرنهتگن کرنَیلر، موترلرنینگ بلند آوازی و کېرهکسیز سیگنال چهلیشلر آدملر اوچون یاقیمسیز و بېزاوته قیلووچی تاووشلرنی یوزهگه کېلتیرماقده. مېنینگ ایستهگیم ارابهکشلرنینگ کرنَیلری اوچون مناسبراق مقابل تاپیلسین، تاکه اولر هم اۉز ایشلرینی دوام اېتتیره آلسین، هم آدملرنینگ آسایشتهلیگی سقلنسین.»
کابلنینگ ارزانقیمت حدودی اهالیسی فاروق(مستعار)، شهردهگی شاوقین افلاسلنیشینینگ آرتیب بارهیاتگنیدن شکایت قیلهدی.
اونینگ اَیتیشیچه، ایستهلمهگن و بلند تاووشلر فقرالرنینگ آسایشتهلیگی همده اطراف-محیطنی بوزماقده.
بو کابل اهالیسی قۉشیمچه قیلهدی: «سۉنگگی پیتلرده بو تاووشلر فقرالر اوچون کۉپلب معمالرنی کېلتیریب چیقرماقده. بو تاووشلرنینگ اَیریملری اویقومیزنی بوزهدی و کوندهلیک چرچاققه سبب بۉلهدی. بو حالت انساننینگ روحی آسایشتهلیگینی کمهیتیریشی ممکن. طالبان بو بارهده ثمرهلی چارهلر کۉریشی و شاوقین افلاسلنیشینینگ آرتیشیگه یۉل قۉیمسلیگی کېرهک.»
کابلنینگ خیرخانه حدودی اهالیسی نیلوفر(مستعار)، سۉنگگی پیتلرده شهرنینگ تورلی قِسملریده، اینیقسه بازارلر و تۉرت یۉللرده، شاوقین افلاسلنیشی کوچهیگنینی اَیتهدی. اونینگ سۉزلریگه کۉره، بو حالت حتا آدملرنینگ اویلریدهگی آسایشتهلیگینی هم بوزماقده.
خیرخانه اهالیسی شوندهی دېیدی: «حتا اۉز اویلریمیزده هم آسایشتهلیگیمیز یۉق. اېرتهلب ساتووچیلرنینگ کرنَیلریدن چیقهیاتگن بلند آوازلر بیلن اویغانهمیز. هر لحظهده دقّتیمیزنی بوزهدیگن و آسایشتهلیگیمیزگه خلل بېرهدیگن قندهیدیر آواز بار. شاوقین افلاسلنیشی هوا افلاسلنیشیدېک کۉزگه کۉرینمسه-ده، آدملرنینگ اویقوسی، دقّت-اعتباری و آسایشتهلیگیگه تأثیر قیلهدی.»
نیلوفر قۉشیمچه قیلهدی: «نسبی آسایشتهلیک و سکوت هر بیر انساننینگ حیاتیدهگی حقوقی و احتیاجی دیر؛ اما افسوس که بو معما جوده کوچهییب کېتگن. بېمار آدملر بار عایلهلر شاوقین افلاسلنیشیدن کۉپراق ضرر کۉرهدی و بو تاووشلر اولرنی قیینهیدی.»
زلمی(مستعار)، کابلنینگ کوتهسنگی حدودی اهالیسی، شهردهگی بېزاوته قیلووچی تاووشلرنینگ آرتیب بارهیاتگنیدن شکایت قیلهدی. اونینگ اَیتیشیچه، کابلنینگ کۉپلب کۉچه و تار کۉچهلریده موترلر، موترسایکللر، ارابهلر و ساتووچیلرنینگ کرنَیلریدن چیقهیاتگن تاووشلر آدملرنینگ آسایشتهلیگینی بوزماقده.
بو کابل اهالیسی شوندهی دېیدی: «شخصا مېن شاوقین افلاسلنیشی سببلی دېیرلی هر کېچه ایشدن قَیتگنیمدن کېین باشیم آغریدی. بېکتده موتر کوتیب تورگنیمیزده، بلند و تورلی خیل تاووشلر چرچاغیمیزنی ینهده آشیرهدی.»
زلمی قۉشیمچه قیلهدی: «باشقه تاماندن، پتاقیلر آوازی هم اوروشدهگی پارتلشلر آوازیگه اۉخشهیدی. بعضاً اوخلب یاتگن بۉلهمیز و پتاقی آوازیدن چۉچیب اویغانهمیز. حتا تونگی ساعت ایکّی یاکه اوچلرده هم پېترده آتیشهدی، اما طالبان بو بارهده اعتبار بېرمهیپتی.»
شو بیلن بیرگه، اطراف-محیط بۉییچه متخصص سیدشاه گهرپور شاوقین افلاسلنیشی انسان حیاتیگه ناخوش عاقبتلر و ضررلی تأثیرلر کۉرسهتیشینی اَیتهدی. اونینگ سۉزلریگه کۉره، شاوقین افلاسلنیشی انسانلرنینگ کوندهلیک حیاتینینگ تورلی جبههلریگه سلبی تأثیر کۉرسهتیشی ممکن.
بو اطراف-محیط متخصصی شوندهی دېیدی: «شاوقین افلاسلنیشینینگ اېنگ کېنگ ترقهلگن عاقبتلریدن بیری اېشیتیش قابلیتینینگ پسهییشی و آغیر حالتلرده کر بۉلیب قالیشدیر. بلند تاووشلر تأثیریده قالیش استرس و عصبیلیک درجهسینی آشیریشی همده انساننینگ آسایشتهلیگینی بوزیشی ممکن. شونینگدېک، شاوقین افلاسلنیشی اویقو و آدملرنینگ روحی سلامتلیگیگه تأثیر قیلهدی و آغیر حالتلرده حاملهدار عیاللر اوچون هم ناخوش عاقبتلرگه آلیب کېلیشی ممکن.»
بو آرهده، کابلنینگ چهارقلعه وزیر آباد حدودی اهالیسی بیر نېچه کون اوّل اوشبو حدودده مینیرال سوو ایشلب چیقرووچی کمپنیلر فعالیتیدن شکایت قیلیب، بو کمپنیلر شاوقین افلاسلنیشی و اهالینینگ بېزاوته قیلینیشیگه سبب بۉلهیاتگنینی اَیتگن اېدی.
بو اهالی ۸صبح گزېتهسیگه بېرگن صحبتیده چهارقلعه وزیر آباد حدودیده بیر نېچه ته مینیرال سوو ایشلب چیقرووچی کمپنی فعالیت یوریتیشینی و اولرنینگ اَیتیشیچه، اَیریم فعالیتلر تورلی ناملر آستیده عملگه آشیریلیشینی بیلدیرگن اېدی.
