کابلده‌گی فاطمهالزهرا شفاخانه‌سی طالبان تامانیدن یاپیلدی
۸صبح، کابل: محلی منبعلر کابل شهری‌نینگ دشت برچی حدودیده‌گی حضرت فاطمهالزهرا یاردملیک شفاخانه‌سی طالبان تامانیدن یاپیلگنی حقیده خبر بېردی.
کابلده‌گی منبعلر دوشنبه کونی،۶ میزان، ۸صبح گزېته‌سیگه بېرگن صحبتیده طالبان عدلیه وزیرلیگیگه قره‌شلی قوراللی کوچلر یکشنبه کونی کابل‌نینگ غربی قِسمیده‌گی دشت برچی حدودیده، ایستگاه مدرسه حدودیده جایلشگن اوشبو شفاخانه‌نی یاپگنینی تصدیقله‌دی.
منبعلرگه کۉره، طالبان اعضالری شفاخانه‌ده‌گی برچه بېمارلر و خادملرنی تشقریگه چیقریب، اونینگ اېشیگیگه مُهر باسیب، قفللب قۉیگن.
اوشبو شفاخانه ایران‌نینگ بیر خیریه تشکیلاتی مالیوی یاردمیده فعالیت یوریتگن و مذکور حدود اهالیسیگه ارزان نرخلرده طبی خدمت کۉرسه‌تگن.
اونگه مراجعت قیلووچیلر‌نینگ اکثریتی کم درآمدلی آدملر بۉلگن.
طالبان حاضرگچه اوشبو طبیات مرکزی نیمه سببدن یاپیلگنی حقیده ایضاح بېرمه‌گن.
اوشبو شفاخانه‌‌نینگ یاپیلیشی سۉنگگی ایکّی هفته ایچیده کابل شهری‌نینگ تورلی حدودلریده شیعه‌لرگه تېگیشلی بیر نېچه ته علمی، مدنی و سپورت مرکزلری، جمله‌دن، دینی مکتبلر، بیلیم یورتی، تلویزیون کانالی و سپورت مجموعه‌سی طالبان تامانیدن یاپیلگن بیر پیتده یوز بېرماقده.
