یونیسف: ۲۰۲۷-ییلده افغانستانده تۉرت میلیوندن آرتیق باله تۉییب-آوقت‌لنمسلیکنی دوالشگه محتاج بۉله‌دی
۸صبح، کابل: بیرلشگن ملتلر تشکیلاتی‌نینگ باله‌لرنی قۉللب-قۉتلش جمغرمه‌سی (یونیسف) افغانستانده اۉتکیر تۉییب-آوقت‌لنمسلیک حالتلری آرتیب باره‌یاتگنیدن آگاهلنتیردی. کوزه‌تیشلرگه کۉره، ۲۰۲۷-ییلده تۉرت میلیوندن آرتیق باله دوالنیشگه محتاج بۉله‌دی.
اوشبو تشکیلات پنج‌شنبه کونی، ۲۳-میزان، اعلان قیلگن حساباتیده افغانستانده تۉییب-آوقت‌لنمسلیک درجه‌سی انقراضلی بۉلگن ولایتلر سانی ۲۰۲۵-ییلده‌گی یېتّیته‌دن ۲۰۲۶-ییلده اۉنته‌گه کۉپه‌یگنینی و ۲۰۲۷-ییلده بو کۉرسه‌تکیچ ۱۴ ته ولایتگه یېتیشی کوتیله‌یاتگنینی معلوم قیلدی.
حساباتگه کۉره، کېلگوسی ییلده قریب ۱،۹ میلیون باله آغیر درجه‌ده‌گی اۉتکیر تۉییب-آوقت‌لنمسلیکدن، ینه اوچ میلیونگه یقین باله اېسه اۉرته‌چه درجه‌ده‌گی اۉتکیر تۉییب-آوقت‌لنمسلیکدن اذیت چېکه‌دی.
شونینگدېک، قریب ۱،۳ میلیون حامله‌دار و اېمیزیکلی عیال تۉییب-آوقت‌لنمسلیک معماسیگه دوچ کېلیشی کوتیلماقده.
اوشبو تشکیلات آزیق-طعام تنقیصلیگی، تازه ایچیملیک سوویدن فایده‌لنیش امکانیتلری‌نینگ چېکلنگنی، آلدینی آلیش ممکن بۉلگن کسللیکلر‌نینگ ترقه‌لیشی و مبلغ یېتیشمسلیگی اوشبو انقراضنی کوچه‌یتیره‌یاتگن عامللر اېکنینی بیلدیردی.
یونیسف چېگره‌لر آرقه‌لی ضرور آزیقلنتیرووچی محصولاتلرنی تشیشده‌گی اوزیلیشلر هم یاردم کۉرسه‌تیش جریانیگه تۉسقینلیک قیله‌یاتگنی و باله‌لر‌نینگ دوالنیش امکانیتلرینی کېچیکتیره‌یاتگنیدن آگاهلنتیردی.
