قویی صفت و یوقاری خرجتلر؛ طلبهلر کابلدهگی خصوصی یاتاقخانهلردن شکایت قیلماقده
ایلیا
تورلی ولایتلردن اۉقیشنی دوام اېتتیریش اوچون کابلگه کېلگن اَیریم یاشلر خصوصی یاتاقخانهلرنینگ یوقاری نرخی و اوشبو مرکزلردهگی خدمتلر صفتینینگ پستلیگیدن شکایت قیلماقده. اولر اَیریم یاتاقخانهلرده کۉرسهتیلهیاتگن خدمتلر و یرهتیلگن امکانیتلر طلبهلردن آلینهیاتگن تۉلاوگه ماس کېلمسلیگینی اَیتماقده. اوشبو طلبهلرنینگ سۉزلریگه کۉره، ساغلیق قاعدهلریگه رعایه قیلینمسلیگی، سوو و برق تأمیناتینینگ منتظم اېمسلیگی، طعاملر صفتینینگ پستلیگی، خانهلرنینگ گوجوملیگی همده حمّام و حاجتخانهلر یېتیشمسلیگی اَیریم خصوصی یاتاقخانهلرنینگ اساسی معمالریدن دیر. اولر ایسّیق سوونینگ یۉقلیگی و برق انرژیسینینگ تېز-تېز اوزیلیشی کوندهلیک حیاتلری همده درس اۉقیش جریانلریگه هم معما توغدیرهیاتگنینی قۉشیمچه قیلماقده.
اوشبو طلبهلر ۸صبح گزېتهسیگه بېرگن صحبتیده خصوصی یاتاقخانهلرده اۉقیش اوچون قولهی شرایطنینگ یۉقلیگینی باشقه معمالردن بیری صفتیده تیلگه آلگن. اولر خانهلردهگی گوجوملیک و تینچ محیطنینگ یۉقلیگی دقّتلرینی پسهیتیریب، تعلیم جریانلریگه سلبی تأثیر کۉرسهتهیاتگنینی اَیتماقده. اولر خصوصی یاتاقخانهلر فعالیتی اوستیدن ینهده جدّیراق نظارت اۉرنهتیلیشی همده تۉلاو، ساغلیق، خوفسیزلیک و خدمتلر صفتی اوچون انیق مېزانلر بېلگیلنیشینی طلب قیلماقده.
تحصیلنی دوام اېتتیریش اوچون پنجشیردن کابلگه کېلگن طلبهلردن بیری سید علی، خصوصی یاتاقخانه اوچون آییگه قریب یېتّی مینگ افغانی تۉلهشینی، بیراق کۉرسهتیلهیاتگن امکانیتلر و خدمتلر تۉلهیاتگن خرجتیگه ماس کېلمسلیگینی اَیتهدی. او خانهلرنینگ گوجوملیگی، سوو و برق تأمیناتینینگ یېتیشمسلیگی همده طعاملر صفتینینگ پستلیگی اوشبو یاتاقخانهنینگ اساسی معمالریدن اېکنینی قۉشیمچه قیلهدی. سیّد علینینگ اَیتیشیچه، حمّام و حاجتخانهلر یېتیشمسلیگی همده اۉقیش اوچون قولهی جاینینگ یۉقلیگی طلبهلرنینگ حیاتی و درس اۉقیش جریانینی قیینلشتیرگن. او شخصی حیات دخلسیزلیگیگه رعایه قیلینمسلیگینی هم اوشبو یاتاقخانهدهگی باشقه معمالردن بیری دېب بیلهدی.
اوشبو طلبه شوندهی دېیدی: «بیز بیر آی اوچون یاتاقخانه اجارهسیگه قریب یېتّی مینگ افغانی تۉلهیمیز، حالبوکه خانهلر کیچیک و بیر خانهده کۉپلب طلبهلر یشهیدی. بو خرجتلرنی تۉلهش بیز اوچون جوده قیین. گوجوملیک سببلی خانهده تۉغری اۉقی آلمهیمیز. طعاملرنینگ صفتی هم جوده پست و یاتاقخانهگه دستلب کېلگنیمیزده، طعام و محیطنینگ یامانلیگی سببلی تېز-تېز کسل بۉلردیک. سوو و برق تأمیناتینینگ یېتیشمسلیگی، تینچلیکنینگ یۉقلیگی و شخصی حیات دخلسیزلیگیگه رعایه قیلینمسلیگی هم بیزنینگ اساسی معمالریمیزدیر.»
سروش، تحصیلنی دوام اېتتیریش اوچون غوردن کابلگه کېلگن ینه بیر طلبه، خصوصی یاتاخانهلر خرجتلرینینگ آشیشی باشقه تورموش خرجتلری بیلن بیرگه طلبهلرگه توشهیاتگن اقتصادی باسیمنی کوچهیتیرگنینی اَیتهدی. او طلبهلر اوچون ایش امکانیتلرینینگ یۉقلیگی اوشبو خرجتلرنی تأمینلش مسؤولیتی کۉپراق عایلهلر ذمّهسیگه توشیشیگه سبب بۉلگنینی و اَیریم طلبهلر اوچون تحصیلنی دوام اېتتیریش جدّی معماگه ایلنگنینی قۉشیمچه قیلهدی.
سروش شوندهی دېیدی: «ایش تاپیشنینگ علاجی بۉلمهگن شرایطده بو خرجتلرنی تۉلهش بیز اوچون جوده قیین. یاتاقخانه اجارهسی، قتناو، انترنت و طعام خرجتلرینی حسابلهسک، آیلیک خرجتلریمیز جوده یوقاری بۉلهدی و بو حالتنینگ دوام اېتیشی کۉپلب طلبهلرنینگ تحصیلنی دوام اېتتیریشگه بۉلگن اشتیاقی و امیدینی کمهیتیرگن.»
تحصیلنی دوام اېتتیریش اوچون قندوزدن کابلگه کېلگن ینه بیر طلبه نسیم، اۉزی یشهیاتگن خصوصی یاتاقخانهدهگی طعام و ایچیملیک سووینینگ صفتی پستلیگینی اَیتهدی. او طلبهلر فایدهلنهدیگن سوو تازهلنمسلیگی و تازهلیک حالتی هم یخشی اېمسلیگینی قۉشیمچه قیلهدی. نسیمنینگ سۉزلریگه کۉره، تازهلش اوچون مسوول خادمنینگ یۉقلیگی همده حمّام و حاجتخانهلردن عمومی فایدهلنیش طلبهلر ساغلیغیگه عاید معمالرنی ینهده کوچهیتیرگن.
نسیم شوندهی دېیدی: «بیز یاتاقخانه اوچون آییگه بېش مینگ افغانی تۉلهیمیز، بیراق طعاملرنینگ صفتی جوده پست، ایچیملیک سووینینگ صفتی هم یخشی اېمس و فیلتردن فایدهلنیلمهیدی. یاتاقخانهنینگ تازهلیگی و آزادهلیگی هم جوده یامان، تازهلش اوچون مخصوص خادم یۉق. حمّام و حاجتخانهلر هم عمومی بۉلیب، یېترلی درجهده تازهلنمهگنی سببلی حالتی جوده یامان.»
عینی پیتده کابلدهگی اَیریم خصوصی یاتاقخانهلر مسووللری اوشبو مرکزلرده یاتاقخانه خرجتلری آشگنی و خدمتلر صفتی پست اېکنینی رد اېتماقده. اولر سۉنگگی ییللرده یاتاقخانه خرجتلری آشمهگنینی، بنا، آزیق-آوقت و سوو خرجتلرینینگ آشیشی اېسه اولرگه ینهده کتّه مالیوی باسیم یوکلهگنینی اَیتماقده.
کابلدهگی خصوصی یاتاقخانهلردن بیرینینگ مسؤولی احمد، (مستعار) اۉزی باشقرهیاتگن یاتاقخانهنینگ آیلیک تۉلاوی سۉنگگی تۉرت ییل ایچیده آشمهگنینی و ۳ مینگ ۵۰۰ افغانیدن ۳ مینگ ۳۵۰ افغانیگچه کمهیگنینی اَیتهدی. او شو دورده بنا اجارهسی قریب ۱۲۰ فایزگه آشگنی و آزیق-آوقت محصولاتلری نرخی هم کۉتریلگنینی قۉشیمچه قیلهدی.
احمد شوندهی دېیدی: «بیزنینگ یاتاقخانه تۉلاویمیز سۉنگگی تۉرت ییل ایچیده نهفقط آشمهدی، بلکه ۳ مینگ ۵۰۰ افغانیدن ۳ مینگ ۳۵۰ افغانیگچه کمهیدی. شو دورده بنا اجارهسی قریب ۱۲۰ فایزگه آشدی و آزیق-آوقت محصولاتلری نرخی هم بیر نېچه برابر کۉتریلدی؛ مثلاً، اوّل ۱ مینگ ۷۰۰ افغانی بۉلگن ۲۴،۵ کیلوگراملیک بیر قاپ گوروچ حاضر قریب ۴ مینگ افغانی تورهدی. خرجتلرنینگ بوندهی آشیشیگه قرهمهی، بیز یاتاقخانهدهگی طعام و خدمتلر صفتینی سقلب قالیشگه حرکت قیلماقدهمیز و بیر طلبه اوچون آییگه ۱۵ مینگ افغانی تۉلهنیشی حقیدهگی دعوانی منطقلی دېب حسابلهمهیمیز.»
او شونینگدېک، اۉزی باشقرهیاتگن یاتاقخانهلرده خانهلر، حمّام و حاجتخانهلردن عمومی فایدهلنیلیشینی و بو اصول کۉپلب یاتاقخانهلرده عادتی اېکنینی اَیتهدی. اونینگ سۉزلریگه کۉره، سوو تأمیناتیدهگی معمالر هم اَیریم یاتاقخانهلرنی ضرور سوونی تأمینلش اوچون تانکرلردن فایدهلنیشگه مجبور قیلگن.
عینی وقتده تورلی ولایتلردن کۉپلب طلبهلرنینگ کابلده بۉلیشی بیلن شهرنینگ تورلی حدودلریده خصوصی یاتاقخانهلر هم فعالیت یوریتماقده. اوشبو یاتاقخانهلرنینگ اَیریملری اجتماعی ترماقلرده، جملهدن، فیسبوکده طلبهلر اوچون وایفای، طعام و قولهی امکانیتلر کبی خدمتلرنی ریکلام قیلماقده.
بیراق اَیریم طلبهلر بعضی یاتاقخانهلرده کۉرسهتیلهیاتگن خدمتلر ریکلاملرده اعلان قیلینهیاتگن خدمتلردن فرق قیلیشینی اَیتماقده. اولرنینگ سۉزلریگه کۉره، کابلدهگی خصوصی یاتاقخانهلرده یشهش نرخی جایلشووی و امکانیتلریگه قرهب فرق قیلهدی و اَیریم حاللرده آییگه ۵ مینگدن ۷ مینگ افغانیگچه یېتهدی.
