سِرلی قاتللیکلر کۉپه‌یماقده؛ ایکّی آی ایچیده ۷۰ نفردن آرتیق کیشی اۉلدیریلدی
نیما
اوشبو حسابات نتیجه‌لری شونی کۉرسه‌ته‌دیکی، فقط سۉنگگی بیر آیدن کم وقت ایچیده تورلی حادثه‌لرده ۲۵ نفر تینچ اهالی وکیلی اۉلدیریلگن. شونینگدېک، سنبله آییده ۴۶ کیشی قاتللیک قربانی بۉلگن. اوشبو حساباتده فقط سِرلی قاتللیکلر رقمی تۉپلنگن بۉلیب، قربانلر آره‌سیده طالبان‌نینگ اوچ نفر اعضاسیدن تشقری، قالگنلری تینچ اهالی وکیللری بۉلگن. قربانلر‌نینگ اَیریملری سابق حکومت دوریده خدمت قیلگن حربیلر بۉلیب، اولر شخصی ایشلری بیلن شغللنگن. اوشبو آدملر‌نینگ اکثریتی طالبان تامانیدن اۉلدیریلگنلیکده عیبلنماقده. باشقه اَیریملری اېسه اۉغریلر تامانیدن اۉلدیریلگنی اَیتیلماقده، بعضی حادثه‌لر‌نینگ عیبدارلری اېسه هنوزگچه انیقلنمه‌گن. اوشبو حساباتده قاتللیکلر‌نینگ اَیریم تفصیلاتلری فقط میزان آییدن باشلب کېلتیریلگن. اوشبو معلومات ۸صبح گزېته‌سیده اعلان قیلینگن خبرلر اساسیده تیّارلنگن. شونگه قره‌مه‌ی، طالبان تامانیدن اخبارات آلیش امکانیتلریگه قۉییلگن چېکلاولر سببلی قربانلر سانی بوندن هم کۉپ بۉلیشی ممکن.
اوشبو حسابات نتیجه‌لریگه کۉره، اېنگ سۉنگگی حادثه‌ده اۉتگن کون کنر ولایتیده بیر ییگیت اۉلدیریلگن. منبعلر‌نینگ اَیتیشیچه، بو ییگیت ولایت‌نینگ اسمار تومنیده‌گی شنگر حدودیده نامعلوم شخصلر تامانیدن پیچاق بیلن اوریب اۉلدیریلگن. قاتللیک سببی و اونی صادر اېتگن شخصلر‌نینگ کیملیگی حاضرگچه معلوم اېمس.
شونینگدېک، جمعه کونی، ۲۴ میزان، بغلان ولایتی مرکزی پلخُمری شهری‌نینگ «بلاک حدودی»ده علاالدین اسملی ییگیت نامعلوم قوراللی شخصلر تامانیدن اۉقاتر قورالدن اۉق اوزیب اۉلدیریلگن. اوشبو قاتللیک‌نینگ سببی و مقصدی حاضرگچه انیقلنمه‌گن.
باشقه تاماندن، اۉتگن هفته تخار ولایتیده ۱۱ یاشلی باله اۉغیرلب کېتیلگنیدن سۉنگ اۉلدیریلگن. باله‌‌نینگ یقینلری ۸صبح گزېته‌سیگه اونینگ جسدی بې‌درَک یۉقالگنیدن ایکّی کون اۉتیب تاپیلگنینی تصدیقله‌گن. دلیللر باله‌‌نینگ شفقتسیزلرچه اۉلدیریلگنینی کۉرسه‌تماقده. بو باله تخار ولایتی‌نینگ خواجه‌غار تومنیده یشه‌گن. اوشبو حادثه‌نی صادر اېتگن شخصلر حسابات اعلان قیلینگن وقتگچه انیقلنمه‌گن.
اوشبو حادثه‌لر‌نینگ دوامی صفتیده ننگرهار ولایتی‌نینگ سرخرود تومنیده بیر ییگیت نامعلوم قوراللی شخصلر تامانیدن اۉلدیریلگن. منبعلر یکشنبه کونی، ۱۹ میزان، ۸صبح گزېته‌سیگه بو ییگیت‌نینگ اسمی اسماعیل بۉلگنینی، او اصلیده ننگرهار ولایتی‌نینگ دره‌نور تومنیدن اېکنینی و هیداوچیلیک بیلن شغللنگنینی اَیتگن.
شونینگدېک، سۉنگگی هفته‌لرده بامیان ولایتیده بیر ییگیت سِرلی روشده اۉلدیریلگن. منبعلر‌نینگ اَیتیشیچه، فیروزعلی اسملی بو ییگیت ۱۶ میزان کونی اۉز دوکانیده طالبان تامانیدن اۉلدیریلگن. منبعلردن آلینگن معلوماتلرگه کۉره، فیرازه‌لی‌نینگ ایکّی اکه‌سی هم اوّلراق اۉلدیریلگن اېدی: اولردن بیری سابق حکومت اوردوسی صفیده خدمت قیلگن، ایکّینچیسی اېسه پروان ولایتی‌نینگ سالنگ تومنیده طالبان جنگچیلری بیلن تۉقنه‌شوو پیتیده آزادلیک جبهه‌سی صفیده جان بېرگن. منبعلر‌نینگ اَیتیشیچه، فیروزعلی تیکووچیلیک بیلن شغللنگن و عایله‌سی‌نینگ یگانه باقووچیسی بۉلگن.
اوشبو حسابات نتیجه‌لری سلطان اسملی ییگیت ننگرهار ولایتی مرکزی جلال‌آباد شهریده اۉغریلر تامانیدن اۉلدیریلگنینی کۉرسه‌ته‌دی. منبعلر‌نینگ اَیتیشیچه، بو ییگیت چهارشنبه کونی، ۱۵ میزان، جلال‌آباد شهری‌نینگ سکّیزینچی ناحیه‌سیده جایلشگن دامان حدودیده اۉلدیریلگن و اۉغریلر اونینگ موترسایکلینی هم آلیب کېتگن. منبعلر قۉشیمچه قیلیشیچه، اوشبو حادثه طالبان‌نینگ خوفسیزلیک نظارت-اۉتکزیش پوسته‌سی یقینیده صادر بۉلگن.
شونینگدېک، طالبان جنگچیلری لغمان ولایتیده آغزه‌کی تارتیشوودن سۉنگ بیر نفر تینچ اهالی وکیلینی آتیب اۉلدیرگن. اوشبو حادثه چهارشنبه کونی، ۱۵ میزان، لغمان ولایتی مرکزی مهترلام شهری‌نینگ عمرزی حدودیده صادر بۉلگن. منبعلر‌نینگ اَیتیشیچه، اوشبو دوکاندار طالبان جنگچیلریدن بیری بیلن آغزه‌کی جنجللشگنیدن سۉنگ، اۉشه جنگچی تامانیدن آتیب اۉلدیریلگن. منبعلر قۉشیمچه قیلیشیچه، طالبان‌نینگ اوشبو جنگچیسی حاضر اېرکین حرکتلنیب یوریبدی و اونگه نسبتاً حاضرگچه هېچ قنده‌ی سۉراق یاکه تعقیب عملگه آشیریلمه‌گن.
اوشبو حسابات نتیجه‌لریگه کۉره، سِرلی قاتللیکلر‌نینگ دوامی صفتیده سراج احمد اسملی ییگیت دوشنبه کونی، ۶ میزان، توشدن آلدین غزنی ولایتی مرکزیده‌گی روضه قیشلاغیده نامعلوم شخصلر تامانیدن اۉلدیریلگن. منبعلر‌نینگ اَیتیشیچه، بو ییگیت اۉز یېریده دهقانچیلیک ایشلری بیلن شغللنه‌یاتگن پیتده قوراللنگن کیشیلر تامانیدن اۉققه توتیلگن و هلاک بۉلگن.
شونینگدېک، ینه بیر حادثه‌ده جوزجان ولایتی‌نینگ آقچه تومنیده بیر ییگیت اۉلدیریلگن. منبعلر‌نینگ اَیتیشیچه، بو ییگیت تومن مرکزیده‌گی اویی‌نینگ یقینیده پیچاق بیلن اوریب اۉلدیریلگن.
تینچ اهالی وکیللری‌نینگ قاتللیکلری دوام اېتر اېکن، منبعلر ۸صبح گزېته‌سیگه جمعه کونی، ۵ میزان، کېچقورون بیر ییگیت بادغیس ولایتیده طالبان‌نینگ جنگچیلریدن بیری تامانیدن اۉلدیریلگنینی تصدیقله‌گن اېدی. منبعلر‌نینگ اَیتیشیچه، اوشبو ییگیت ولایت‌نینگ قادس تومنیده‌گی «جهاندوستلر» حدودیده طالبان جنگچیسی حافظ عبدالحکیم تامانیدن اۉلدیریلگن.
سۉنگگی بیر آیدن کم وقت ایچیده اۉلدیریلگنلر آره‌سیده بیر نفر اۉقیتووچی هم بار. امرالله اسملی اوشبو اۉقیتووچی لغمان ولایتی مرکزیگه قره‌شلی قلعه فتح‌خان قیشلاغیده اۉلدیریلگن. منبعلر‌نینگ اَیتیشیچه، او ولایت مرکزیده‌گی «روشان» مکتبیده فیزیک فنیدن درس بېرگن.
سابق حربیلر‌نینگ قاتللیکلری دوامیده جمعه کونی، ۳ میزان، نورستان ولایتی‌نینگ وامای تومنیده عبیدالله اسملی سابق حربی اۉقاتر قورالدن اۉق اوزیب اۉلدیریلگن. منبعلر‌نینگ اَیتیشیچه، بو سابق حربی قوراللنگن شخصلر تامانیدن اۉلدیریلگن.
شونینگدېک، ایراندن دېپورت قیلینگنیدن سۉنگ بیر سابق حربی طالبان تامانیدن حبسگه آلینیب، کېینچه‌لیک شفقتسیزلرچه اۉلدیریلگن. منبعلر جمعه کونی، ۳ میزان، ۸صبح گزېته‌سیگه بو سابق حربی‌نینگ اسمی محمد نسیم بۉلگنینی و او بغلان ولایتی‌نینگ بغلان مرکزی تومنی ینگی شهریده حبسگه آلینگنینی اَیتگن. منبعلر‌نینگ اَیتیشیچه، اونینگ جسدیده قتّیق کلتکلنگنلیک و اۉق تېککنلیک ایزلری کۉرینگن.
۸صبح گزېته‌سی‌نینگ باشقه بیر حساباتی نتیجه‌لری بادغیس ولایتیده ایکّی کیشی ارقان بیلن شفقتسیزلرچه بۉغیب اۉلدیریلگنینی کۉرسه‌ته‌دی. منبعلر پنجشنبه کونی، ۲ میزان سنه‌سیده، اوشبو ایکّی قربان‌نینگ صورتلرینی ۸صبح گزېته‌سی بیلن بۉلیشیب، اولردن بیری مخابرات آنتنی قۉریقچیسی، ایکّینچیسی اېسه تینچ اهالی وکیلی بۉلگنینی اَیتگن. منبعلر‌نینگ اَیتیشیچه، ایکّینچی قربان اوشبو حادثه وقتیده یانیده بیر نېچه مینگ افغانی پول هم آلیب یورگن. منبعلر قۉشیمچه قیلیشیچه، طالبان جنگچیلریدن بیری اوشبو ایکّی کیشینی بادغیس ولایتی مرکزیدن «قندی زرد» دېب ناملنگن بازارگچه تعقیب قیلگن.
شونینگدېک، ینه بیر حادثه‌ده چهارشنبه کونی، ۱ میزان سنه‌سیده، غزنی ولایتیده بیر صراف نامعلوم قوراللی شخصلر تامانیدن آتیب اۉلدیریلگن. منبعلر‌نینگ اَیتیشیچه، بو ییگیت‌نینگ اسمی گلب‌الدین بۉلگن و او ولایت‌نینگ قره‌باغ تومنیده‌گی ولی داد قیشلاغیده اۉلدیریلگن. منبعلر قۉشیمچه قیلیشیچه، او اۉز موتریده بۉلگن پیتده نامعلوم قوراللی شخصلر تامانیدن اۉققه توتیلگن.
باشقه تاماندن، چهارشنبه کونی، ۱ میزان سنه‌سیده، قندوز ولایتی‌نینگ دشتی ارچی تومنی مرکزیده خال‌الدین قرلق اسملی شفاکار نامعلوم شخصلر تامانیدن اۉلدیریلگن. منبعلر‌نینگ اَیتیشیچه، اوشبو شفاکار اۉز داروخانه‌سی ایچیده پیچاق بیلن اوریب اۉلدیریلگن.
۸صبح گزېته‌سیده اعلان قیلینگن خبرلرگه کۉره، جاری ییل‌نینگ سنبله آییده ینه ۴۵ کیشی تورلی حادثه‌لرده اۉلدیریلگن. اوشبو حادثه‌لر‌نینگ اکثریتی نامعلوم شخصلرگه نسبت بېریلگن. بو حادثه‌لر‌نینگ تفصیلاتلری اوّلراق ۸صبح گزېته‌سی تامانیدن اعلان قیلینگن.
شو بیلن بیرگه، طالبان بیر نېچه بار افغانستانده خوفسیزلیکنی تأمینله‌گنینی و فقرالر‌نینگ حیاتی همده مال-ملکی تهدید آستیده اېمسلیگینی دعوا قیلگن.
عینی پیتده، بیرلشگن ملتلر تشکیلاتی‌نینگ افغانستاندهگی یاردم هیاتی (یوناما) اۉزی‌نینگ سۉنگگی حساباتیده سۉنگگی اوچ آی ایچیده افغانستان‌نینگ سابق مدافعه و خوفسیزلیک کوچلری‌نینگ تۉرت نفر اعضاسی اۉلدیریلگنینی همده اولر‌نینگ کمیده ۱۴ ته اۉزباشیمچه‌لیک بیلن حبسگه آلینیشی و اوشلب توریلیشی حالتی قید اېتیلگنینی معلوم قیلگن.
