اوچا: افغانستانده آزیقلنیش معماسی ۲۰۲۶-ییلده ینه‌ده آغیرلشماقده
۸صبح، کابل: بیرلشگن ملتلر تشکیلاتی‌نینگ انسانپرورلیک یاردملرنی موافقلشتیریش باشقرمه‌سی (اوچا) افغانستانده آزیقلنیش معماسی ۲۰۲۶-ییلده ینه‌ده کوچه‌ییب باره‌یاتگنینی معلوم قیلدی.
مذکور تشکیلات پنج‌شنبه کونی، ۸ اسد، مملکت‌نینگ ۳۴ ولایتیدن ۲۶ ته‌سیده تۉییب-آوقت‌لنمسلیک‌نینگ کوچه‌ییشی کۉپراق عیاللر و باله‌لرنی خوف آستیگه قۉیه‌یاتگنینی معلوم قیلدی.
بودجه‌نینگ قیسقریشی، آزیقلنیش مرکزلری‌نینگ یاپیلیشی همده آزیق-آوقت و طبی جهازلرنی یېتکزیب بېریش جریانیده‌گی اوزیلیشلر افغانستانده آزیقلنیش انقراضی‌نینگ کوچه‌ییشیگه سبب بۉله‌یاتگن اساسی عامللر حسابلنه‌دی.
اوچانینگ بیلدیریشیچه، جاری ییلده اۉتکیر تۉییب-آوقت‌لنمسلیکدن اذیت چېکه‌یاتگن هر یېتّی نفر عیال و باله‌دن اتیگی بیر نفری جهان آزیق-آوقت دستوری (WFP)تامانیدن کۉرسه‌تیله‌دیگن آزیقلنیش یاردمینی آله‌دی.
حساباتگه کۉره، بیرلشگن ملتلر تشکیلاتی‌نینگ باله‌لر جمغرمه‌سی (یونیسف) آغیر تۉییب-آوقت‌لنمسلیکدن اذیت چېکه‌یاتگن و یوقاری خوف آستیده بۉلگن ۵۷۵ مینگ نفر باله‌نی دوالش اوچون ضرور مبلغ یېتیشماوچیلیگیگه دوچ کېلماقده.
اوچا قۉشیمچه قیلیشیچه، جهان ساغلیقنی سقلش تشکیلاتی (WHO) هم آغیر تۉییب-آوقت‌لنمسلیک و آغیر کسللیکلرگه چلینگن قریب ۳۵ مینگ نفر باله‌نی دوالش اوچون دوالش تۉپلملری همده اساسی دارو-درمانلر تنقیصلیگیگه دوچ کېلماقده.
