کتابخوانلیک تۉگره‌کلری؛ تعلیم چېکلاولری دوریده قیزلر اوچون پناه
شهرزاد
افغانستانده تعلیم چېکلاولری و قیزلر‌نینگ تعلیم مؤسسه‌لریده قتنه‌شیش امکانیتلری کمه‌ییب باره‌یاتگن بیر شرایطده، بیر گروه قیزلر مطالعه و اۉرگنیشنی دوام اېتتیریش اوچون کتابخوانلیک تۉگره‌کلریگه مراجعت قیلماقده. عادتده کیچیک گروهلرده تشکیل اېتیله‌دیگن بو تۉگره‌کلر کتاب اۉقیش، اجتماعی و مدنی موضوعلر یوزه‌سیدن صحبتلشیش همده قیزلر اۉرته‌سیده فکر المشیش امکانینی یره‌تماقده.
اوشبو تۉگره‌کلرده قتنه‌شه‌یاتگن اَیریم قیزلر‌نینگ اَیتیشیچه، کتاب اۉقیش اولر اوچون شونچه‌که مشغولات اېمس، بلکه بیلیم آلیشنی دوام اېتتیریش و تعلیم محیطی بیلن علاقه‌نی سقلب قالیش یۉلیدیر. اولر کتاب مطالعه‌سی بیلن بیر قطارده ادبیات، تاریخ، جمعیت و کونده‌لیک حیاتده‌گی تجربه‌لری حقیده هم صحبتلشه‌دیلر.
کتابخوانلیک تۉگره‌کلری عادتده بیر نېچه قیز اشتراکیده خاندانلرده، شخصی کتبخانه‌لرده یاکه کیچیک تعلیم مسکنلریده اۉتکزیله‌دی. هر بیر تۉگره‌ک اعضالری بیرار کتابنی تنله‌یدی و اونی اۉقیب بۉلگچ، مضمونینی بیرگه‌لیکده محاکمه قیله‌دی. اَیریم تۉگره‌کلر یوزمه-یوز، باشقه‌لری اېسه اجتماعی ترماقلر و علاقه دستورلری آرقه‌لی تشکیل اېتیله‌دی. قیزلر‌نینگ اَیتیشیچه، بونده‌ی اوچره‌شوولرنی آنلاین اۉتکزیش اولرگه بیرار جایگه باریشگه حاجت قالمسدن، مطالعه مشغولاتلریده قتنه‌شیش امکانینی بېره‌دی.
«کتاب اۉقیش مېنگه هنوز اۉرگنه‌یاتگنیمنی حس قیلیشگه یاردم بېره‌دی»
کتابخوانلیک توگره‌گیده قتنه‌شه‌یاتگن قیزلردن بیری یسنا (نام مستعار)نینگ اَیتیشیچه، گروه بۉلیب مطالعه قیلیش اونینگ کتاب اۉقیشگه بۉلگن قیزیقیشینی آشیرگن. او شونده‌ی دېیدی: «یالغیز کتاب اۉقیگنیمده، بعضاً بیر نېچه صحیفه‌دن کېین چرچه‌ب، کتابنی چېتگه قۉیه‌من. اما بیر نېچه کیشی بیلن کېلیشیب، بیر کتابنی اۉقیشگه کیریشگنیمیزده، اۉزیمنی کۉپراق مسؤول حس قیله‌من. مطالعه‌دن کېین کتاب حقیده صحبتلشه‌میز و هر کیم اۉز فکرینی بیلدیره‌دی».
اونینگ اَیتیشیچه، بو اوچره‌شوولر مطالعه اوچون امکان یره‌تیش بیلن بیرگه، صحبتلشیش و تورلی قره‌شلر بیلن تنیشیشگه هم شرایط یره‌تگن.
آنلاین کتابخوانلیک توگره‌گیده قتنه‌شه‌دیگن ینه بیر قیز رقیه (مستعار)نینگ اَیتیشیچه، اوشبو تۉگره‌ککه قۉشیلیشیدن آلدین او کتابلر‌نینگ اکثریتینی یالغیز اۉقیردی. او شونده‌ی دېیدی: «کتابخوانلیک تۉگره‌گیده مېن اوچون مهم بۉلگن نرسه فقط کتاب اۉقیش اېمس. بیرار موضوع حقیده باشقه‌لر بیلن صحبتلشگنیمیزده، تورلی آدملر بیر متننی هر خیل توشونیشی ممکنلیگینی انگله‌یمن».
رقیه‌‌نینگ قۉشیمچه قیلیشیچه، کتابلر حقیده‌گی صحبتلر اونگه اۉز فکرینی بیان اېتیش و باشقه‌لر‌نینگ قره‌شلرینی تینگلش کۉنیکمه‌لرینی هم مشق قیلیشگه یاردم بېرگن.
قیزلر‌نینگ مطالعه‌گه بۉلگن قیزیقیشیگه قره‌مه‌ی، اَیریملری اوچون کتاب تاپیش هنوز معما بۉلیب قالماقده. کتابلر‌نینگ قیمتلیگی، یخشی جهازلنگن کتبخانه‌لر‌نینگ کملیگی و اَیریم منبعلردن فایده‌لنیش امکانیتلری‌نینگ چېکلنگنی اولر دوچ کېله‌یاتگن معمالر جمله‌سیدندیر.
کتابخوانلیک تۉگره‌گی اعضالریدن بیری بهار‌نینگ اَیتیشیچه، گروه اعضالری بعضاً معین کتابنی تاپیشده قیینچیلیکلرگه دوچ کېلیشه‌دی. او شونده‌ی دېیدی: «بعضاً باسمه نسخه‌سینی تاپیش قیین بۉلگن کتابنی تنله‌یمیز. بونده‌ی حاللرده، اگر اونینگ قانونی الکترون نسخه‌سی موجود بۉلسه، اوندن فایده‌لنه‌میز یاکه کتابنی باشقه‌سیگه المشتیره‌میز».
آنلاین کتابخوانلیک
انترنتدن فایده‌لنیش کېنگه‌یگنی سری کتابخوانلیک تۉگره‌کلری‌نینگ بیر قِسمی آنلاین مکانگه کۉچدی. بو گروهلر‌نینگ اعضالری کتابنی اۉقیب چیقیب، کېین بېلگیلنگن وقتده سېس و ویدیو قۉنغیراقلر یاکه آنلاین گروهلر آرقه‌لی اونی محاکمه قیله‌دیلر.
شونگه قره‌مه‌ی، انترنت صفتی پستلیگی، اوندن فایده‌لنیش خرجتلری و برق تأمیناتیده‌گی اوزیلیشلر آنلاین اوچره‌شوولرنی تشکیل اېتیشنی قیینلشتیرماقده. اوشبو تۉگره‌کلرده قتنه‌شه‌یاتگن ینه بیر گلثوم (نام مستعار)،) شونده‌ی دېیدی: «انترنت یخشی ایشله‌مسه، محاکمه‌نی منتظم دوام اېتتیره آلمه‌یمیز. بعضاً انترنت یاکه برق بیلن باغلیق معمالر سببلی اوچره‌شوو یریم یۉلده قالیب کېته‌دی».
اَیریم قیزلر اوچون کتابخوانلیک تۉگره‌کلری فقط کتاب اۉقیش جایی اېمس. اولر بو اوچره‌شوولرده شخصی تجربه‌لری، اجتماعی موضوعلر و مدنی مسأله‌لر حقیده هم صحبتلشه‌دیلر. تۉگره‌ک اعضالری‌نینگ اَیتیشیچه، بونده‌ی گروهلرده قتنه‌شیش اولرگه مطالعه و اۉرگنیش بیلن علاقه‌نی سقلب قالیش، شونینگدېک، اۉزلریگه یقین فکرله‌یدیگن انسانلر بیلن ملاقات قیلیش امکانینی بېره‌دی.
قیزلر‌نینگ اَیریم تعلیم امکانیتلریدن فایده‌لنیشی چېکلنگن شرایطده کتابخوانلیک تۉگره‌کلری اولر‌نینگ مطالعه فعالیتینی دوام اېتتیریش یۉللریدن بیریگه ایلنگن. بیراق بو تۉگره‌کلر رسمی تعلیم‌نینگ اۉرنینی باسه آلمه‌یدی.
اوشبو مشغولاتلرده قتنه‌شه‌یاتگن قیزلر کتابلردن فایده‌لنیش امکانیتلرینی کېنگه‌یتیریش، کۉپراق کتبخانه‌لر تشکیل اېتیش همده مطالعه و صحبت اوچون خوفسیز شرایطلر یره‌تیشنی ایسته‌یدیلر. اولر‌نینگ اَیتیشیچه، اۉقیشنی دوام اېتتیریش قیزلر‌نینگ تعلیم کۉنیکمه‌لرینی سقلب قالیش، بیلیم و خبردارلیگینی آشیریشگه یاردم بېره‌دی.
